فيه نوعية من الناس الله ابتلاهم بالدلاخة ( الغباء ) وهم ما يدرون انهم دلوخ وأصحابهم ما علموهم مراعاة لشعورهم
ولكني أستنتجت أن مواصفاتها لكي تعرف هذا أو ذاك دلخ وبجدارة
ومن علامات الدلخ اجارنا الله وياكم كا التالي:
1 / إذا شفت واحد وقف سيارته تالي الليل جنب بابهم وفتح باب السيارة بسرعة واخذ كم حجر معه عشان يطارد له بس ( قط ) كان واقف قدام بابهم فأبصم بالعشرة ان المذكور دلخ وعلاجة كم تفلة من مطوع الحارة وبعدها ان شاء الله انة يتحسن .
/ إذا شفت واحد في السوق منشئ الشماغ وقاعد يلاحق وحدة تسحب وراها 3 أو 4 من عيالها وعلى كتفها شايلة بعد طفل والحبيب وراها من محل الى محل يبغى الحبيب يرقم (ونسي ان عندة في البيت حريم ) فهذا والعياذ بالله دلخ مستدلخ وهذا النوع خطير على الحياة الفطرية
3/ إذا شقت واحد من ها الشباب الي يتابع أرقام خط الصداقة الدولي ويقعد يتصل عليهم وبعد من دلاختة حتى الأنقليزي ما يعرف منة ألا كم كلمة ويتميلح بالساعات عشان الخواجيات يضحكون على دقن الي جابه وأخر الشهر إذا جات الفاتورة يلاقي ذاك المبلغ المحترم صاكينة شركتنا العزيزة للاتصالات بعدها الحبيب يسوي جمعية ( قطة ) مع زملائه عشان يسدد فاتورة الدلاخة وهذا النوع دلاختة مؤقتة تزول بمجرد الزواج .
4/ إذا كفلت واحد كفالة غرم واداء لدى شركة تويوتا لواحد من الأصحاب مطلع ليكزس قيمته فوق 200 ألف ريال وراتبه 4000 ريال وراتبك ماهو ببعيد عنة كله عشان يتمقلط ويكشخ على جماعته وعيال عمة واصحابة ويتميلح في الأسواق على حسابك طبعاً ويحط رجلة ما يسدد ويجيك مندوب الشركة بورقة إلقاء قبض أما التسديد وآلا ابو زعبل وقتها وقف قدام المراية وتف على الي قدامك وقول بكل فخر دلـــلخ مع سابق الإصرار والترصد
وقتها نقول بئس الدلخ والمستدلخ ( الشاري والكفيل ).
5/ أما قمة الدلاخة
فهي ان ترسل لك وحد ة مزيونة بالحيل وشعرها طويل من ها البنيات ذيك الرسالة على بريدك أو رسائلك الشخصية في المنتدى ألي أنت مرتز فيه أنت وبراطمك وتكتبلك إنها معجبة فيك وفي أسلوبك في الكتابة وبعد معجبة في خفة دمك وتقعد طول الليل وأنت قدام المراية تلمع في سنونك الصفر الي فرشة الأسنان عمرها ما قد مرت من جنبها وبعد كم شهر من التسحيب على وجهك تتضح ان البنية الأمورة الحلوة واحد من ها الثيران الشباب الي ساقط في الكفاءة 7 سنوات وحط عصارة فكرة النير في تسحيبك
وقتها اعرف انك قد بلغت قمة هرم الدلاخة .
تحياتي لكم
العرض الشجري
