السلام عليكم ورحمة الله وبركاته:
هذ اول مشاركه لي وانشاء الله تعجبكم.
هذي سالفه لي مرت من سنه او اكثر, بدايتها واحد من خوياي مدرس وتعين في هجره في عالية نجد تبعد عن عقله الصقور حول50 كيلو صحراء , يعني مافيه زفلت , المهم اتفقنا انا نزوره انا ومعي ثلاثه , المهم طلعنا له نبي نشوف حالته هناك كيف هي وكيف وضعه وكيف عايش هناك.
مشينا له يوم الثلاثاء ومستاذنين كلنا عن الاربعاء من دواماتنا , وصلنا الى حد الردميه (طريق صحراوي) اللي نبيها المهم مشينا معها وحالتنا حاله من المطاب والله لايوريك البطناج فيها , ومع الطريق طحنا في كذا هجره (قريه صغيره) المهم لقينا وحده فيها محطه بنزين صغيره وقفنا وعبينا فيها وقعد نشرب مويه واللي شرب بيبسي واللي شرب دخان وحركنا من عندها , مادرينا غير ورانا ددسن قديمه تكبس لنا ووقفنا لها, الا يوم نزل لنا هاك الشايب ومعاه واحد وجانا وقال لنا : ماتستحون على وجيهكم جاي تشربون المسكرات عندنا !!! ؟ طبعا مافهمنا شي وقلنا اي مسكرات تقصد مامعنا شي مسكر, قال وذا اللي على الطبلون مااشوفه انا شايفني عمى!! ( اللي على الطبلون بيبسي) قلنا ياخوي هذا مو سكار, قال : اجل وشنهو؟ قلنا بيبسي. قال :انا خابر انه بيبسي . والبيبسي مو من صناعه اليهود .المهم عقدنا بالشرح والخناق ومصمل ان البيبسي حرام وانه مسكر, المهم قال كلام واجد ماله داعي ومنها انتم جايين تبيعون هالبلاوي على عيالنا, ومابغى يفكنا لين تجمعو اهل ديرته كلهم عندنا , المهم طفشنا منهم وركبنا موترنا ومشينا ( طبعا انحشنا بالصراحه) ,
رحنا في طريقنا ومع الخط وسوسنا لبعض انا تعدينا الديره المطلوبه , وشفنا هايلكس قريبه منا ورحنا لها يوم قربنا منها يوم راعيها لف وانحاش لحقناه شوي وقمنا نكبس له وماوقف . اخذنا يوم جينا نرجع وبنخليه الا فيه سياره وقفت عندنا وفيها ولد شباب قال: وشتبون بالحرمه يوم تلحقونها !! قلنا ي حرمه ؟ قال اللي على الهايلكس اللي تلحقونها؟ ( شف البدويه كيف تسوق على عكس بنات مدينتنا يمدحون السواق ) قلنا له مادرينا والله انها حرمه وعلمناه وعذرنا وسالناه عن الديره وقال لنا عنها ومشينا .
رجعنا لدربنا الى ان وصلنا لديرتنا وخوينا وقابلناه وسلمنا عليه المهم هذا وقت العصر يوم وصلنا, اخذنا عنده فنجان قهوه وشاهي وسوالف حول ساعه ومعنا ناس من اهل الديره من خوياه المدرسين وغيرهم .
علمناهم بسالفه (المسكرات) يوم الموجودين ضحكو كلهم . وعلمونا عن سالفتهم,( الديره ذي يمكن احد يقرا موضوعي ويعرفها لانها شبه معروفه عند بعض الناس) . اهل الديره ذي متشددين في الدين مع جهل في الدين عندهم كبير لدرجه انهم اللي يلقونه يشرب بيبسي او دخان او المشروبات الغازيه اللي محرمينها هم يجلدونه بعد الصلاة في المسجد ...ترا هذا السالفه صحيحه واسف لعدم ذكر اسم الديره..
بعد السوالف قال خوينا مشينا نبي نتمشى برا وركبنا موتر خوينا ومعنا واحد من اهل الديره اللي يعرف المنطقه كلها ( يعني لنا زي الواسطه هناك عشان ماحد يتعرضنا )....
رحنا نمشي لان معنا عيال قالو نبي حليب ابل وقفنا عندنا ناس بدو اهل خيام من جماعه خوينا ( الواسطه) وجينا عندهم دقينا بوري طلعت لنا حرمه وقالت وشتبون قال الواسطه :السلام عليكم ياام محمد ، محمد هنا قالت لا لكن اقلطو انت وخوياك لا بس بنمشي ( الحرمه عندهم تنوب عن الرجال في علوم الرياجيل)
مشينا من عندهم ورحنا لناس ثانين جينا لين وقفنا عندهم وطلع لنا ولد شباب واضحه عليه اثار البداوه المهم عرف واسطتنا وقلطنا عندهم وجهز لنا قهوه ( لحد الان كل ماذكرتها ودي ارجع واتقهوا منها مرا ثانيه )
تقهوينا وجاب لنا حليب خلفات (طازج) وشربنا منه كلنا ماعدا واحد منا خايف من المالطيه على حد كلامه ...
(عاد في جلستنا وخوينا اللي مقلطنا مع ان عمره في حدود ال28 سنه لكن مايعرف يقرأ ولايكتب وعندنا اخوان له اعمارهم مابين ال14-18 ثلاثه مادرسوا )
سالناه ليش مادرست ؟ قال وش فايده المدرسه ؟ بعدين اصلا الوالد رافض انا ندرس!!
قلنا له ليش؟ قال يقول مافيها خير, بعدين نصف جماعتنا مادرسوا ....
جينا نمشي حلف علينا نتعشى عندهم , حاولنا نرفض لكن ماقدرنا , ( صدق ان البدو اهل كرم صحيح)
المهم جلسنا عندهم وجاهم جماعتهم اللي عزموهم .
(عاد شف الشخصيات عندهم ,طريقتهم اللي مرسم مرسم فيهم خلاص ماعاد وراه شي ,زار القلابيات والشماغ طاق العقال فوقه اللهم انه عشرين مرزام له . والطاقيه مغطيه على الحواجب والثوب بعذرهم ماحولهم مغاسل )
المهم تعشينا وسوالفهم صراحه يحبها قلبك . سوالف وقصيد المؤرخ يستفيد في مثل مجلسهم .
مشينا من عندهم ومااقول الا الله يكثر من امثالهم وليت كل الناس مثلهم . لكن لاحياة لمن تنادي ( الزمان ذا تجي عند الواحد تدق الباب عليه يفتح لك وعلى طول يقول وش تبي ؟؟؟ مافيه تفضل او يالله حيه ؟مع الاسف, الا من رحم ربي )
عاد اذكر سالفه واحده جاي من جده للرياض له اشغال هنا المهم مر على ناس من جماعته يصيرون له قريب , المهم طق عليهم الباب فتح له واحد من العيال على قد عمره المهم يسلم عليه وكيف حالك واخبارك وعلومك وياخذ معه نصف ساعه سوالف !!! وين ؟ عند باب بيتهم ,لوانه خويه من عيال الحاره مو مشكله لكن ضيف من بعيد قريب له ( ولد عمته ) المهم الرجال قام يتلطع ينتظر يقول له اقلط تفضل !! ماش ماحولك احد المهم قفا من عنده ومشى عاد وش قال ذاك تامرني شي !!!! ياذاك انك سويت خدمه ؟؟؟
ايه عاد نرجع لسالفتنا ( يقولون الخبل ماينسى سالفته )
بعد العشاء رجعنا للبيت اللي خوينا مستاجره معاه مدرسين اثنين عاد شف المدرسه حقته عدد طلابها 52 والمدرسين 3 فقط واحد منهم اردني الجنسيه .
المهم بتنا عندهم ويوم طلع الصبح مشينا راجعين للرياض طبعا الديره اللي اهلها متشددين طبعا مشينا طبلون سيارتنا من عندهم ( ماعليش حنا رخوم )
عاد لفت نظري في رحلتنا ذي كيف ان البدو المرأه عندهم متفوقه على المرأه عندنا وان الكرم عندهم افضل من الكرم عندنا
المرأه عندهم ترعى في الغنم عند بعضهم ويسوقون السيارات حتى السيارات الكبيره يسوقونها ( الوايت ) ومابالك بصلخ الذبيحه وطبخ العشاء و السمن البقل اللي يسوونه وغير وغير
للمعلوميه الناس قبل يامنون على نسائهم اكثرمنه الان , يقولون ان السبب الناس قبل نيتهم صافيه لكن الان نيتهم اصبحت فاسده .... !
انا اقول الكلام هذا يمكن صحيح
وسلامتكم واسف على الاطاله ........ وشكراااا .
العرض العادي
