وش بزين بنهاية الأسبوع ؟؟؟؟؟؟؟؟؟
سؤال غريب عجيب خاصة اذا طرحناه على واحد من الرياض لان الاجابة بتكون <ياخي سؤالك سخيف ,وش بزين يعني أكيد مثل الأسبوع اللي قبله واللي قبله واللي قبله ... ولا شي >
أظهرت دراسة سواها أخصائي اجتماعي <أحتفظ باسمه > على شريحة من شباب الرياض تتراوح اعمارهم بين 19 و26 سنه ان أيام الاسبوع افضل عندهم بكثير من اخر الاسبوع والسبب انهم يعرفون وش بسوون < دوام, دراسه , مشاوير الأهل , مذاكرة> يعني بين الامور هذي . ولما طرح عليهم السؤال < طيب في نهاية الاسبوع مب المفروض انك ترفه عن نفسك وتكسر الروتين؟> الاجابات كانت بالنسب الاتيه
10% الاستراحه وبلاي ستيشن وبلوت
10%ارتباطات عائليه
والبقيه اللي هي 80% يقولون وين نروح كل الاماكن عوايل يا بندور ولا كوفي شوب ولا مطعم ....
ياجماعه هل اللي صاير هذا ترون انه عدل ؟ هل اللي صاير هذا ترون انه صحي ولا ظاهر اجتماعيه صحيحه ؟
يعني مدينة الرياض من اكبر المدن في العالم يتوفر فيها كل شي ماعدا سبل الترفيه والترويح عن النفس ..... الاسواق عوايل , المنتزهات عوايل, الحدايق العامه عوايل ...... كل شي عوايل
والشباب يا بالشوارع يتمشون بدون اي هدف ولا كوفي شوب ولا شيشه ولا يضايقون الناس والعوايل على ابواب المراكز الراقيه وباخر الليل ياكل من الفاست فود وينام .<وعلى فكره كل الممارسات هذي ماهي الا نتيجه للكبت اللي صاير لهم >
ويجي يوم السبت والنفسيه دمار ماعنده اي استعداد انه ينتج لا على مستوى العمل ولا على المستوى الدراسي يبي بس الدوام ينتهي عشان يروح يحط حيله في النوم !!
واعيد سؤالي هل اللي صاير هذا ظاهره صحيه ؟
للمعلوميه ترا الشي هذا صاير بس هنا عندنا وبالذات هنا بالرياض .
طيب انا الأن طرحت الموضوع ابي اقرا رأيكم في الوضع هذا وابي ادري وشي الحلول برايكم ووش اللي ممكن يصير عشان يتغير الوضع واخص بالذكر شباب الرياض
وشكرا.
العرض الشجري
