موضوع رائع قرأته لاحد الكتاب الموهوبين
في احد المنتديات
فأحببت ان انقلها لكم ..
تبسمت و طار الفؤاد بفرحته ... يوم انكتب لي في كتاب الغربه صفحات ..
استراحة محارب .. اتعبته الطعون .. وسال دم قلبه على يد هذا وذاك ..
انعزال .. بدايه من الصفر .. اجمع فيها اوراق السنين وارتب احداث الفرح والحزن واكتب سطورها من جديد بحبر الغدر والخيانه ...
كيف يا بشر .. اقرب اثنين سددو لي اقوى الطعون ... ما ذبحني الم طعنات القريب ... ما ذبحني دمي اللي نزف على ايدينهم من غير ذنب و غلط ... قتلتني علمي ان طاعني اقرب الناس ....
حاولت انسى ما حصل .. اكذب الكذبه واصدقها ..اقول انا اقوى من الرماح ... ابتسم واتظاهر بالفرح .. كلن يقول هذا السعيد هذا القوي .. هذا اللي ضحكت له الدنيا و رد عليها وابتسم ... لكنهم ما درو عن ليالي وحدتي وما درو اني سجين في حجرتي .. افكر كيف الخيانه والالم عطية الاثنين ...
في غربتي قلت استريح .. وانهار بعيد عن عيون الخلايق واستريح .. كفاني توزيع ابتسامات .. مبطنه الفرح .. تغطي اطعان الاثنين ...
انا الصبور اللي احتمل .. انا القوي اللي صعد اعلى القمم .. انا الحليم اللي احتوى نزوة مزاجه واعتدل .. انا الحكيم اللي ينسمع رأيه و ينبغى ممشاه .. انا القائد .. انا المبدع.. انا المهم .. انا الغرور بحد ذاته .. انا انا ...
انا الجمل اللي طاح من كثرة طعونه .. انا الجمل اللي مات بغير ارضه .. كله عشان باقي الجمال ما تشهد طيحته .. ما تسمح لي عزتي بواضح الضعف .. وما يسمح لي غروري بالهوان ...
بس الالم اكبر .. والامل ادبر ... واصبحت على قولة ... فلان كني حصان بلا صاحب طوى البيدا حنينه ...
مافادني انعزالي .. بعكس اللي رجيت .. زادني حسره .. ضاف لي حرمان ...
ودي اشكي لهم ... واكشف لهم جرحي و حرماني .. بس المشكله .. هم اللي طعنو .. هم اللي غدرو ..
ياشينها من حاله .. من زود وحدتي .. مالي الا لهم اشتكي دمعتي ... مع انهم سبة ردى الحال و هوانه ...
يا عجب كيف الاقدار ! .. من زود وحدتي مالي الا هالثنين اشتكي لهم... عليهم ... ومن يسأل الجراح عن جور الجراح ؟ ...
يا عجب الاقدار! .. كيف كنتم سبب الجروح .. وكيف انتم البلسم .. مثل سم الافعى .. ما يعالج الا بسمها ...
اقرب الناس وابعدهم .. حاولت انسى لكنكم دمي .. حاولت اغمض .. لكنكم غطا العيون .. حاولت اتظاهر بالفرح و جا لكم على البال طاري .. حاولت اظهر احزاني .. مسحتو دمعتي و كنتو الحضن الحنون ....
ضاع العقل في تناقض افعالكم .. واحترق قلبي من سواياكم ..
يا جماعه .. وش اجاهد ؟ ..
اجاهد طعونهم واحاول انساهم و انسى اللي حصل؟
أو
اجاهد جروحهم وابدا معهم من جديد .. وانسى اللي حصل؟ ..
ويقولون هذا اللي ابتسمت له الدنيا ورد عليها وابتسم ...