&&سواليف وحده طفشانه&&
في هذا المساء القاسي المظلم امام عيني تاهت كلماتي وضاعت أفكاري ...ورحت
ادورها في كل مكان ... في المطبخ .. والصاله.. والمجلس .. والحوش ... بس مالقيتها
واكتشفت ان السبب الذي يكمن وراء ضياعها هو ضيقة الصدر اللي اعيشها ذا اليومين
... احس بالعبرات تزنطني زنطاًواحس بتكة في صدري ومغص في بطني واحس
عيوني تناتق من مكانها وكلما غمضت عيوني احس اني في الصحن الدوار
ومن زود الهم اللي فيني احس اني معاد اقدر اميز بين ابو جلمبو ومفتاح اربعطعش
وهذا راجع كما ذكرت آنفاً لضيقة الصدر اللي اعيشها ذا اليومين وكلما احسست بتلك
الأعراض اتجه الى غرفتي وأكبر المخده وأطقها نومه لييييييييين يطيح اللي براسي
===============
سالفه ثانيه :
منذو صغري وانا اموووت بحتسي الرجاجيل . ... أذكر جدي وعماني وابوي لين
اجتمعو احلف على اخوي خايب الرجا : والله مايصب القهوه الا انا
كله بس علشان اقعد معهم واسمع سواليفهم احس ان سواليفهم صدقيه موب مثل حتسي
الحريم ......
تعالو شوفوني وانا قاعده في مجلس حريم فيه ام وائل وام مهند وام ريم وام مرام .. ...
وام صعفق <<< ذي شكلها داخله بالغلط بينهم
المهم الصراحه ماتجوز لي سواليفهم ... يعني تجي او وائل وتقول : شفتي ام انجي
واااااخزياه قصت شعرها كابوريا وصبغته باحمر طلعت شيفه وعععععععع
الله يصبر رجلها على خشتها
والثانيه تقول مادريتي عن ام يارا ... رجلها دابغها لين عضت الارض عشانها صلحت
مكرونه بالباشمل ونست تحط فيها جبن .... تدرين احسن تستاهل من قالها ماتعزمني
لعرس اختها جعلها المصع
عاد انا تفوح تسبدي من ذا الهرج اللي ماادري وش يبي ... واحاول اني اغير دفة
الحديث الي مواضيع سياسيه واقتصاديه << بسم الله علي مثقفه
بس ماش مافيه فايده
========================
سالفتون اوخرى : ( قايلتلكم ترا بضيعكم في الاملاء)
بينما كان الزعيم ( ابوي حفظه الله ورعاه وادامه ذخرا للاسلام والمسلمين )
كان توه جاي من الدوام وجالس بالمقلط يحتري الغدا ... دخلت عليه والابتسامه شاقه
وجهي وانا اقول : هلا والله بالغالي ولد الغاليه هلا وغلا .... وشلونك يا وبيي عسى
ماتعبت عسى ماعليك خلاف
ابوي صار وجهه كذا >>>>
انا : حمودي حبيبي ( تمووووون )
ابوي : جعلتس المصع قولي امين ...اخلصي قولي وش تبين
انا : ابي سلامتك ياخلف جداني ويابعد خلقاني يؤ .. قصدي خلاني .... علمني بس وش
اجيب لك تبي قهوه ... شاهي ... تبي كليجا آمر تدلل يبه
ابوي قفلت معه : الله ينزع روح الظالم ... انتي شكلتس تبين شي ...اخلصي وش تبين
يالخبله
انا : الله مير يسلمك .. ودي اطلب منك طلب واللي يرررررررحم امك لاترده
ابوي : وش تبين
في هذه اللحظه قمت ووقفت عندالباب خوفا من اي هجوم غاشم
انا : يبه ابيك توديني للبر ... الصراحه انا مليت ابي افحط واطعس على كيف كيفي
وانا قلتها والا ماقلتها مادريت الا بجزمة ابوي وانتو بكرامه ماشيه مليووون جايتني
عاد انا طبعا ماوقفت حطيت رجلي على الخامس وهجيت وماعاد تشوفون الا غباري
=====================
سالفة رابعه
انتم عارفين اني الحين بالطايف وكل يوم تلقوني باحد هالمنتزهات والملاهيات اللي
تارسه الطايف وفي يوم رحنا للملاهي وبينما انا ادور واسعسع في ذا الملاهي انا
وخواتي اذ استوقفتني لعبه رهيبه الصراحه عجبتني ولو انها تخوف وقفت عندها ساعه
اناظر الخلق اللي يركبونها وانواع الصراخ والهبال وبينما انا في ذا الحظات الجميله
الا خواني وخواتي كل واحد منهم يتحداني اركب ذا اللعبه وانا عاد جنوني احد يتحداني
........ وانا اللي اقص لي تذكره وطيرااااااااااان احل لي مكان واركب
ويجي الهندي ويربطني ... وكان الكرسي اللي وراي فيه رجال مع بزارينه
وبيني وبينكم كنت مستانسه اول ماركبت ..... وخواني يناظروني نظرات يتطاير منها
الشرر ,,,,بسم الله علي ...... المهم وتشتغل اللعبه .... واول مااشتغلت كانت هاديه زي
ما اكون في مرجيحه اخوي الصغير بعدين بدت سرعتها تزيد شوي شوي وانا بالعة
الصراخ بس ماش مالها وتزيد ... بعدين بدت العربه تتقلب مره يمين مره شمال
ومره القى نفسي فوووووووووق .... وفجاة القىنفسي تحت ... وساعه انقلب يصير
راسي تحت ورجولي فوق لين قامت كبدي تتقلب وساعتها ماقدرت اكتم اللي في قلبي
شغلت الماطوور وبديت اصارخ ........... وااااااااااااااااااااااااااااااااااا...........
........ يااااااااامممممممممممااااااااااااه (يمه ) .......... يااااااااااااااربببببيييييييييييييييه(ياربيه)..... .... خلاااااااااااااااااااااااااااااااص جعععععععععلك تموووووووووووووووووت ( ادعي على الهندي )
واااااااااااقااااااااااااااااااااااااااااااف ( وقف ) ياربييييييييييييييييه
وخواني واقفين وغشيانين من الضحك والرجال اللي وراي يهدي فيني ويسمي علي ويطمني وانا اصارخ ماعندي فيه وهو يقول : خلاص خلاص يا اختي ماصار شي تراها لعبه
وعلى ذا الحاله لين وقفت اللعبه
يوووه واخيرا اشوى اني مامت
وانزل من العبايه وشكلي صاير غلط
العبايه انعفست والطرحه مالقيتها والنقاب ارتفع عن عيوني وصار على جبهتي ونص عيني اليمين هو اللي طالع بس ..... والتنوره انفك سحابها (مدري وشلون ) وتزحلقت وصارت تسحب بس اشوى ماطاحت
ومن يومها حرمت اركب العاب الا المرجيحه والزحليقه
العرض الشجري
