يالله يامعـبـود يــارب العـبـاد
يالواحد الفرد الصمد وانت المعيـن
يامنـزل الأنفـال والتـوبـه وص
ياخالـق الكفّـار هـم والمسلميـن
طهّر عيونـي والمسامـع والفـؤاد
واقبل رجوعـي يـا إلـه العلميـن
ماني بدايم حـيّ واجـوب البـلاد
ميّت ولـد ميّـت وربعـي ميّتيـن
لازاد عمري مصرعي فالمشي زاد
يقبـل علـيّ ولاعليـه امعارضيـن
وشلون تهنى عيني ابحلـو الرقـاد
وانا ادري ان القبر بيت ٍ لي دفيـن
ياشيب عيني وابك موس الموت حاد
واليا قطع عرق الحياه انعـود طيـن
اليا انتهى عمـري متـى مالله اراد
وازرقّ لونـي وانحجـم دم اليديـن
وحسّيت في جسمي من الموقف براد
والموت شفته بين جمع الحاضريـن
ودبا على جسمي مثل دبـي القـراد
وهزّتني السكـرات ياربّـي تعيـن
والكلّ حولي مرتبك والصمت سـاد
والتفّو اصحابـي علـيّ امحزنيـن
وامّ ولدي لبست من اثيـاب الحـداد
ودموعهـا صبّـاب وبكاهـا يبيـن
وامّي تهلّ الدمع من مـوت ٍ وكـاد
تهـلّ عبرتهـا وتلحقـهـا ونـيـن
وانا دخلت ابحفـرة ٍ غـدرا سـواد
مدري من الناجيـن والا الخاسريـن
مابـه صديـق ولاونيـس ولا وداد
معي العمل مابين زين وبيـن شيـن
يالله يـاربـي علـيـك الأعتـمـاد
تركت فـي دنيـاي مالـي والبنيـن
من عقب نوم ٍ بين الألحف والمخـاد
رقدت تحت الأرض بعـد الأوليـن
وبعد الممات اليا اعلنو يوم المعـاد
يالله تمسكّنـي كتـابـي باليمـيـن
لاجا نهـار ٍ فيـه ياكثـر الحصـاد
للمسلميـن الطيّبـيـن الصلحـيـن
يالله حقـق لـي منايـه والـمـراد
وادخلني ابرحمتـك دار المؤمنيـن