وبعدين ؟ .. يا قلبٍ شقاه .. ينبّـه
.......... لا تستفـز .. الدمعـة المرتـابـه
أدري تمنـى شوفتـه .. وتحـبّـه
.......... وادري مسبب لك قلـق .. بغيابـه
وادري ليا هب الشمـال .. وهبّـه
.......... تفك صدرك للهبـوب .. ومـا بـه
وادري وتدري راحتك تتعـب بـه
.......... وادري وتدري تزعـل وترضابـه
لكن مدامه ما يبيـك إضـرب بـه
.......... عرض الجفا .. ولا تحسب حسابـه
وش شفت منـه الا غـلاك وذبّـه
.......... وش شاف منك الا الغلا وأصخا به
سويت لـه فـي كـل غرفـه قبّـه
.......... من نور وضلوعك حرس محرابـه
وخلاك تمشي فـي هـواه مسبّـه
.......... وتدور لنفسـك عـذر .. تشقابـه
ولا نيب قايل .. لبّه .. ويـا لبّـه
.......... كم قلتها .. ولا ضحـك لـك نابـه
طاغي جمع ماي العيون .. وصبّـه
.......... في جرهدي الهجر وأحيـا أعشابـه
وأقفى وخلا لك شعـر يِكتـب بـه
.......... ولا خذا .. يـا كـود قلـبٍ ذابـه
معلـقٍ بيـن السمـا .. والغـبّـه
.......... مثل الفراغ اللـي سكـن بأجنابـه
وصـوره يناجيهـا رنيـن منبّـه
.......... فـي دار يشبههـا ظـلام الغـابـه
تكفى وهـذي فـوق راسـك حبّـه
.......... خله يولـي .. لعنبـو مـن جابـه
ولا تلومنـي كانـي قـدرت أسبّـه
.......... عذري معي .. شف حالك وما صابه
والجـرح قبـل انـك تـدور طبّـه
.......... دوّر سببه .. ولا تضيـع أسبابـه
واللي جفا .. من دون عذر وسِبّـه
.......... وش تستفيـد بلـومـه وبعتـابـه
خلـه ذعاذيـع الهـوا تلعـب بـه
.......... ويجيـك لا ضاقـت عليـه ثيابـه
كان الضيا يـوم ان شوقـه شبّـه
.......... واليـوم نيـران الصـدود أولابـه
يـا قلـب لا تشـره عليـه وكبّـه
.......... من لا يموتـك عشـق لا تحيابـه
العرض العادي
