اليوم جايب لكم قصه حلوة تدور على دوار الجامعة ... قصدي تدور أحداثها بين أربع شخصيات تاريخية ..... " أبو جهل .... و مسيلمة الكذاب .... و توباك .... و فؤاد "
كان أبو جهل في يوم من الأيام يدور في الحارة. وأبو جهل زي ماهو معروف فتوه الحارة بس عنده نقطة ضعف غبيه شوي... كان يحب بنت الجيران وإذا شافها في عبايتها طالعه من البيت الولد مسكين يضيع ,وكان متأثر بباب الحارة ومن الحماس كان مايجيب خبز لبيت الجيران الا هو...<< مايحب جميلة أبد
فكان أبو جهل يتدوحس حول بيت الجيران في يوم من الايام الا شوي طلع أبوها اللي هو مسيلمة الكذاب.... وشاف أبو جهل برا ومرتبك شوي جاء عنده وقاله خير أن شاء الله وش عندك توطوط هنا يا مال التبن ؟ ... ابو جهل من الربكة قال لا أبد بس أشوف الشارع مزفلت زين و لا لا ....
شوي مايدري أبو جهل الا والزبيريه أنواع التشطيف ولكن بفضل من الله إستطاع أن يتفادى جميع الهجمات اللي وجهها له مسيلمة وذلك عن طريق حركة ماتركس بالحركة البطيئة كان أبو يجهل عاكف ظهر الين وصل الأرض والشماغ يسفسف من وراء ومن الحماس جت زبيريه على وجهه دايركت بس مسكها باسنانه زي بروس لي !
المهم أنحاش أبو جهل ووصل الين الشارع وهو ضايق صدرة شوي. عشانه ماشاف سميرة "حبيبته" ذاك اليوم وجلس على رصيف البقاله وطلب ببسي قزاز أبو نص وجلس يشرب فيه ويغني أغنية نانسي اللي تقول" و اللي يشوت أبو سميرة شو بنقوله شاطر شاطر واللي يصدمه بسيارتة شو بنقله شاطر شاطر"
في ذي اللحظه جاء واحد بسيارة كرسيدا لونها كوستنائي وسحب جلنط قدام أبو جهل وراحت السيارة تزحف و تزحف الين وصلت لأبو جهل وباقي شعرة وتصدمة !
أبو جهل أنلخم و يوم رجع من الصدمة قام رجع كمومه ناوي يلعن شكل راعي السيارة وراح عند الشباك و طق عليه بقوة.... قاله يبو خير أن شاء الله أنزل تعال خلني أمرمطك شوي و الله أن امسح خشتك في ذا الزفلت الين تطلع نفس لونه ومن زود المرمطة آخلي ـآ البلدية إذا شافوك ركبوا لك عيون قطط أنزل لعن الله أبوك !
أنفتح الشباك نص فتحة وقال راعي السيارة بكل ثقة في النفس ... أبو جهل أشبك ماعرفتني أنا سديق فؤاد نسيتني شوفتني وأنا أسحب الجلنط والسيارة تقول أوووع أووووووووع والله كونت أقدر أسوي أحسن من كدا بس في حرمة معفنه قطعت علي الطريق !
طعععععععع هذا صوت الكف حق أبو جهل جاء على وجه المدعو فؤآد !
وقاله أنت وش فيك غبي بغيت تصدمني الا شوي يا حمار... المهم أنت جيت في وقتك تعال خلنا نتمشى !
فؤاد تحمس وقاله أيوه خلينا نروح شارع البعارير ونفحط هناك ونخلي السيارة تقول أوووع أووووووع والله أن أخلي الشاريع يبكي ....طععععععع نفس الكف الأول !
أقول بلا تفحيط بلا هم أنا مو رايق لك يافؤاد رح رح للعليا بس قلي عساك جبت جوازك.... فؤاد: ايوا جبته معايا بس أنت ماقولت لي العليا صحيح يحتاج لها جواز ..... أبو جهل : أيه يابو وش على بالك أجل تحسب الدنيا سايبة أنت !
المهم راح ابو جهل وفؤاد للعليا وجلسوا يتمشون ومسكت مع فؤاد يغسل سيارته وراحوا لوحده من المغاسل اللي في العليا... وشافوا واحد ماكانوا يتوقعون أنهم يشوفونه ابد. صديقهم ايام الثانوي اللي كان يحب الوراعين واللي كان فتيت في لعبة الفريرة ماغيره توباك !
وقف فؤاد السيارة ونزل هو وأبو جهل وراحوا لتوباك جاه أبو جهل وقاله: هلا هلا عاش من شافك يا أسود وين الغيبات و لا تقولي الجوازات مسكوك تراني شايف بطاقة أحوالك !
قاله توباك: هلااااااااااا أبو جهل والله من زمان عنك لا ياخوي أي جوازات خبرك عتيق هذا أول أنا الحين مطلوب من الأنتربول, بعدين ياخوي الشرهه مو علي أنت اللي الله يهديك من يوم ماتخرجنا من أولى إبتدائي ماشفناك أنا داري أنك من يوم ماطحت في العرق وانا غاسل يدي منك !
خش فؤاد عرض عشانه حس أنه كان مسحوب عليه سيفون من الخزف السعودي ! فكان يبي يثبت نفسه.... أهلا ياتوباك ماشوفتني قبل دقايق وأنا أسحب جلنط والسيارة تقول أوووع أووووووووع. كعععععععع نفس الكف بس هالمرة من توباك ! > مظلوم هالفؤآد
ياخي أنت وش فيك يافؤاد الين الحين مخروش يامال العمى أنت الين الحين تفحط أبوك ماضيع عربيات هايبر بندة حقت التسوق الا أنت !
جاء أبو جهل وقال ماعلينا يارجال المهم أنت وش تسوي هنا وش عندك ..... قاله توباك ابد أنا المغسلة هذي حقتي.... أبو جهل: بالله طيب وراك لابس نفس اللي يغسلون.... توباك : لا أنت تعرف بعد أن الواحد لازم يتواضع عشان العمال مايحسون أني أنا رئيسهم.... أبو جهل: أهاااااااااا أيه مرة على البركة المغسله. على العموم أنا نبي نغسل السيارة.... توباك :أبشر بعزك يالسنايدي ماتبي ربع تيس بعد ؟ ! .
المهم خلصوا غسيل السيارة وقال أبو جهل: فؤاد خلنا نرجع للبيت ودي أشوف سميرة مشتاق لها... فؤاد: أيوا خلاص بس قبيل مانروح خلينا نمر شارع المليون هدا اللي قريب عشان نسحب جلنط والسيارة تقول أوووع أووووووووع... دببببببببببب
لا مو نفس الكف هذا فؤاد الغبي صدم في سيارة إسعاف وراحت سيارته تشليح ودخل هو وأبو جهل المستشفى وجلسوا فيه شهر .
وبعد شهر طلعوا من المستشفى ورجع ابو جهل لبيتهم وأنصدم يوم درا أن مسيلمة أخذ حبيبته سميرة ونقلوا من بيتهم.... وراح أبو جهل في غرفته يصيح وجته كآبه غير طبيعيه وقرر ينتحر وعلق حبل على المروحه وربط نفسه فيها وذب نفسه !
بعد فترة صحى من النوم ولقى نفسه في المستشفى وفي واحد فوق راسه يقوله: حبيبي ابو جهل شوفتني كيف أنا أنقدت وأخذتك للمستشفى بسرعه وسحبت جلنط والسيارة تقول أووع أوووووع.... !!!!!
مآت آبو جهل بعد مآ آرتفع الضغط عندهـ ... البقآء لله
أقول بلا تفحيط بلا هم أنا مو رايق لك يافؤاد رح رح للعليا بس قلي عساك جبت جوازك.... فؤاد: ايوا جبته معايا بس أنت ماقولت لي العليا صحيح يحتاج لها جواز ..... أبو جهل : أيه يابو وش على بالك أجل تحسب الدنيا سايبة أنت !
آبو جهـــــــل . . . مسيلمة الكذآب . . . توبآكـ . . . و فؤآد ! ! !
العرض العادي
