هذه الأبيات مرثيه في الشيخ / مشهور بن هايل الشعلان رحمه الله واسكنه فسيح جناته
والهم أهله وذويه الصبر والسلوان
والذي انتقل إلى جوار ربه مساء يوم الثلاثاء الموافق 1/12/1428 هـ
الله من علمٍ دهى القلب طرياه=علمٍ يهز جبال ما ينقويله
علمٍ صباح الأربعاء من سمعناه=ياكثر اللي عجزت عظامه تشيله
وفاة شيخٍ كل ابونا فقدناه=ما لوم عينٍ يوم تبكي رحيله
شيخٍ على الطولات والطيب ممشاه=رمز الوفاء والجود ... رمز الفضيله
للمرجله والنايفه ... سيّر خطاه= درب المراجل دوم عينه تخيله
يالله عساها جنة الخلد مثواه= راع المكارم ... والعلوم النبيله
كم واحدٍ فكّه رغم كبر بلواه= وكم فرّج هموم القلوب العليله
وكم من سجينٍ من ورى الباب ينخاه= جاه البشير وقيل يخلى سبيله
تشهد لأبو فيصل بالأفعال يمناه= مشهور ...حلاّل العضال الثقيله
تنعاه داره والمجالس ومركاه= و تنعاه ربعه والأهل والقبيله
لاشك حكم الرب نصبر ونرضاه= والعبد ماله غير ربه كفيله
وختامها طالبك يالله حسناه= تغفر ذنوبه وأنت حسبه وكيله
العرض العادي
