:
:
طابت أوقاتكم بالحب
نص إنسان عابر
:
:
معذور لو ذبلـت اهدابـي وعـودي نحـل
مادام الاقدار في وجهـي تطـش الجـروح
في خبت الاحلام ناقـة وبضلوعـي فحـل
يهدر ويزبـد ولـه بيـن الحنايـا جمـوح
من يوم صار الغموض يلف وجـه المحـل
وانا اعصر البال وابحث عن مجرد وضـوح
مالي وماللزمان اللـي سـرى واضمحـل
يبوح والا عسى عمر الزمـن مـا يبـوح
لو كان للنخل موقـع فـي سـواد الوحـل
ماكان مضرب مثال ابن الحـلال الطمـوح
اذكر وانا فالطريـق ومـر موكـب زحـل
شفتك على العرش بالوجه الحزين الصبوح
في معصمك نقش حنـى وبهدبـك الكحـل
وبعاتقك رعد غيـم ونـوض بـرقٍ يلـوح
وبخـدك الصبـح وبثغـرك مـلاذ النحـل
والمسك والعود الازرق من عروقك تفـوح
قلت ازرعك في رصيف الذاكرة لـو رحـل
صوتك , وصار المكان انسان من دون روح
لكـن صوتـك تربـى داخلـي واستـحـل
نزوح فكـري وفكـرت استميـل النـزوح
واحـل عقـدة ومـن عقّـد حبالـه يحـل
قـدام لا يعقـده حبـل الزمـان الشحـوح
جيت ابدويٍ على العشبـة نـزل وارتحـل
والبدو من حيث ما ينبـت حياهـا تـروح
انسان عابر شرب وجهـك وعـوده نحـل
جا لك بلا جرح واقفـى ممتلـي بالجـروح
:
:
تحياتي