بالاول كنت معارض مسالة الزواج والارتباط وكل ماجابو هالسيره احاول
اتهرب واغير الموضوع بصراحه حياة العزوبيه عاجبتني ما ادري احس ان الزواج بيقيدني
وهذي الصوره كثير ما اشوفها في حياة المتزوجين واللي زاد الطين بله هي المسلسلات
التلفزيونيه والافلام العربيه اللي صورت الزواج انه خصام وخناق وتعقيد وتقييد واقول في
نفسي ليه وانا ويشلي بالزواج وبلاويه؟
بدايته صفقه وطقطقه واخرته قهر و المره تبي والعيال يبون وبالطالعه والنازله وين
رايح ومنين جاي على قولة القايل ( يامن شراله من حلاله عله ) وانا وشلي بها العله .
بصراحه كنت ماخذ الدنيا عرض وطول ومستانس لكن وين بروح من حنة الوالده
اللي عسى ما تشوفني مسوي شي قالت اسطوانتها. ياولدي لو انك متزوج كان مو هذا حالك
انا ودي اشوف عيالك قبل لاموت ومن هالحكي هذا. وبصراحه مع اصرارها والحاحها اللي
شلع قلبي خلاص. استسلمت للامر الواقع وافقت . وكل يوم واصفه لي بنت وهذي طويله
وهذي قصيره وهذي عيونها حلوه وهذي شعرها طويل وبعد عملية الاقتراع وبعد
السؤال والتأكد كان القرار الاخير اني عزمت اخطب ...... بنت واحد من الجماعه
وعلى خيرة الله توكلنا بنخطب ولبست هالثوب والشماغ ومكشخ حتى اني فكرت
اسير لبيت اهلهم على ارجولي واترك السياره حتى لا يتعطف الثوب .استقبلونا
الجماعه احسن استقبال ويوم دخلنا بالموضوع وطلبنا يد البنت بالشكل الرسمي
كان الجو العام هادي وحسيت الجماعه ما عندهم مانع خاصه بعد ما شفت بعيونهم
الفرحه فاستبشرنا خير لكن كان رد ابوها رد تقليدي وقال عطونا فرصه نستشيرها
ومالكم الا طيبة الخاطر.
ورجعنا البيت وبنظر امي انا الحين متزوج كل ما شافتني.. قالت هلا بالمعرس
وعسى ما تحركت المعرس المعرس..لين مضى اسبوع على الخطبه ورحنا بنشوف
الرد وبعد ما قعدنا شوي تكلم ابوها وقال مبروك ياجماعه وهني انبسطوا الوالد والوالده.
وامي قالت لي ان العروس مبسوطه وفرحانه وكل واحد يبارك للثاني.
وبعد هالفرحه دخلنا بالموضوع الجد وهو المهر . ويافرحة ما تمت شوي وجتنا صدمه.
الرجل يبي 160 الف ريال واربع شرايا وذهب غير لوازم العرس والاثاث وشرط
اساسي سياره وبيت بروحها.بدت الخصمه بين الوالد من صوب والنسيب الجديد من صوب
طلع الوالد وهو زعلان وحاولت انا اهدي الموضوع لكن النسيب معند وما عنده غير
هالحكي شي ويوم شفت السالفه كذا قمت وقلت له ياعمي جدي وجدك وانت نفسك
ما تزوجتوا بمهور خياليه واول المهر اما بخياش تمر ولاغنم وبالكثير بعير .
شسالفه خليتوا اسعار المهور ترتفع على ارتفاع اسهم الاوبك.
وبعصبيه قلت له .. ياعم انت مسلم وطنقر ابو العروسه علي وقال غصب عليك
شقاعد تقول ياولد ؟
بس انا ما عطيته فرصه وصرخت في وجهه وقلت له .. اسمع اليهود كانوا يزوجون
بناتهم لكل واحد يخدمهم اربع سنوات او خمس شوف الذرابه وبافريقيا ياخذون مهور
بناتهم غنم وجلود حيوانات اما الذرابه والتواضع عند الصينين ما يطلبون شي ديكين
واربع خنازير واربع سمكات خباط املحين وهذي الطريقه موجوده عندهم من زمان
مو 160 الف . الله اكبر عليك اتخلي بنتك اتعنس بهالطريقه. وبعدين انا طالب يد بنتك
او يد خبير طيران؟الظاهر بتزوج كارلوس البرتو وانت واشكالك وامثالك هم سبب
العنوسه بالمجتمعات.
قال ابو العروس من اللي طاقك على يدك وقال لك تعال اخطب بنتنا. قلت له ما ابيها
وانت بنتك نقعها في ماء واشرب ماها . وانا بتزوج من برا درزن بمهر بنتك هذا.
ما هو الحل مع امثاله. وكيف تتصرف البنت؟
هل يدفع المهر للابو حتى يتم اعتاق البنت من ظلمه ومنعها من زيارته لانه باعها بالماده؟
هل تنصحون الشخص الذي حدث معه الموقف ان يشتكي على ابو البنت للقاضي وليس
مهم ان يتزوج البنت ولكن المهم ان البنت لا تستطيع شكاية ابيها وهي المظلومه
بهذه الطريقه؟
في النهايه اقول ما معك الا خشمك حتى لو كان اعوج .
العرض الشجري
