هاااااااااااااااااي بناااااااااااااااااات هاااااااي شباااااب كيفكم اليوم؟؟ ان شاالله تمام؟؟
المهم اليوم كتبتلكم موضووع عني وانا في المدرسة وان شاالله يعجبكم.
اليكم الموضوع:
كان يوم ربوع والحصة التانية وكان الفصل هدؤ ومافي رجة مو على العادة والكل طفشان المهم انوا انا كنت طفشانة فقلت يا بت بلا طفش اقعدي طالعي في بنت بنت وشوفي ايش بتسوي المهم طالعت في الصف الي جمبي لقيت نصهم نايم والنص التاني بيتاوب المهم جيت بأطالع في صفي لقيت الي قدامي بيشخمطوا على الماصة طالعت في الي ورايا لقيتهم بياكلوا فصفص جيت للصف التالت عاد هادا صف الله اعلم بيحالوا المهم طالعت لقيت الي ورا في فميمهم كرتون لبان ومهم داريين فين ربهم حاطتهم المهم جيت ادير وجهي وارجع اكتب على الماصة زكرياتي على قول (ابلة انعام الله يزكرها باالخير)الا شي غريب لفت نظري في الفصل التعبان دا حزروا ايش شي لقيت بنت متحمسة وتسمع للأبلة وعيونها مفرصعة وقاعدة تكتب الملااحظات المهمة في دفتر خاص للأشياء المهمة قلت يابت ركزي مين دي البنت الفايقة الا بعد تفكير عميق قلت بلا شك دي دافورة الفصل (سلمى) المهم درت وشي ورجعت اكتب زكرياتي على الماصة المهم
فجأة دق باب الفصل طبعاً الكل طالع والي نايم صحي يشوف ايش فيه والي بياكل خبى اكلوا هههههههههه
دا كلوا خوفاً من انوا يكون فوزي او سلوى (الوكيلة والمديرة) المهم ترى سلوى هيا الي دايماً تسير معايا مواقف معاها المهم دخلت خاله(وهي المستخدمة او عاملة التنظيف ونقول لها خاله) المهم الكل طالع بيستنى تقولنا ايش دخلها الفصل المهم قالت :جمانة. يووووووووووه عاد انا نطيت (اي نقزت)وقلت هلا قالت :تعالي بعد الحصة (لفووزي )آآآآآه قصدي فوزية المديرة . قلتلها خير ان شاالله ايش سويت؟؟
قالت:تعالي وانتي تعرفي. والله فكرتني باالمسلسلات السورية لمن تجي الشرطة تاخد احد الا يقولها خير شو فيه ؟ شو عملت؟؟ يقوموا يقولوا:بتعرف هونيك.
المهم مو دا موضوعنا المهم قعدت افكر يابت افتكري ايش سويتي دا الأسبوع افتكري يلا
آآآآه يمكن لمن كدبتي وقلتي انك مريضة وانك ما شردتي من الفصل وانك كنتي تبي تروحي البيت لا ما اظن لأنوا دا الموضوع قديم .
طيب يمكن لمن سويتي نفسك مريضة وما حضرتي ولا حصة بس لا يا بت دا الكلام لو اسبوع لالا ما اظن.
طيب يمكن لمن عاندتي الوكيلة وخليتي الخرص في ادنك لا ما اظن لأنوا بعدها الوكيله سارت تمزح معايا ولا كأنوا سار بيننا شي .
طيب يمكن لمن قعدتي تستهبلي على ابلة الدين وتقوليلها حرام يلبسوا العجايز سروال طويل تحت التوب لأنوا تشبه باالرجال بس ما اظن الموضوع مايستاهل انها تشتكي عليا لأبس هادي الأبله ماتحب تتفاهم يمكن هيا اشتكت .
اها يمكن لمن قعدت انا وبيشو نكنس الفصل في الصرفة ولقطتنا الأبله وهزءتنا بس برضوا ما اظن يعني احنا كنا بنسوي عمل خير ما اظن اننا حنتهزء عليه.
المهم دق الجرس وطبعاً مافهمت ولا شي من الحصة الي يسمع اني كنت حأفهم لووووووووول المهم رحت لفوزي وانا طالعة في الدرج طبعاً على اقل من مهلي لكن لا مفر في النهايه وصلت الغرفة :
دق دق دق
فوزي:مين؟؟
انا:جمانة
فوزي:اتفضلي
انا :بأستغراب اتفضل الله يستر من بدايتها شكلوا الموضوع مصيبة ههههههههه
المهم دخلت
انا: خير ايش فيه ايش سويت ؟؟
فوزي:لا ولا شي بس دا مو كتابك؟؟
انا: استر يارب ايوا ايشبوا فيلوا حاجة انا كاتبة شي؟؟قوليلي ترى صدقيني عندي عزر(خخخخخ والله الخوف يسوي بلاوي)ِ
فوزي: لا بس نسيتيه امس فس المدرسة
انا : نعم ؟؟انتي مناديتني دحين عشني نسيت كتابي؟؟
فوزي: ايوا ليش فبها شي؟؟
انا:لا سلامتك بس انا حسبت اني سويت مصيبة جديدة.
فوزي:هههههههههههه لا انتي مدري ايش قصتك دا الأسبوع مؤدبة ماشاالله .
انا :طيب شكراً باي. وخرجت من الفصل.
انا:والله قهر وشي يرفع الأعصاب دحين بعد حرقان الأعصاب يطلع اني نسيت كتابي اهيء اهيء والله مدرسة غبية وتافهة يعني كانت ارسلتوا مع الخالة ولا لازم يعني تخوفني والله فوزي دي انا اعرفها تكرهني كره العمى وهيا مناديتني عشان تضحك عليا اساساً دي مديرة &&&&&*ووووو
الوكيلة سعاد:جمانة مين هيا ال &&&&&&؟؟.
انا:ها ؟؟ لا ولا احد.
الوكيلة سعاد:طيب ارجعي على فصلك لا اكتبك محضر.
انا :محضر؟؟ لالا انا حأرجع وترى كنت بأمزح.
الوكيلة سعاد :طيب يلا اجري ولعد اشوفك هنا.
انا: طيب. وانا رايحة قلت والله حاله
الوكيله سعاد:نعم؟؟
انا :جريت على اسفل.
المهم وانا بأمشي قعدت اقول ايش هوا المحضر ؟؟والسؤال الين دحين مني لاقيتلوا جواب وكل ماسويت شي يهددوني بكتابة محضر حتى ماما لمن سألتها ماعرفت.
المهم دخلت الفصل لقيت ابلة اللغة العربية.
الأبلة :فين كنتي؟؟
انا :عند فوزي آآآآه اقصد فوزية.
الأبلة:طيب خليكي واقفة .لووووووووووووووووول
وسلامتكم.
تحياتي:بنت احلى واحلى
مشوار رايح و مشوار جاي
العرض العادي
