فمان الحب يا أغلى الأماني
*********** فمان الي عطانيك وخذاك
بدمعي وآهتي وكل المعاني
**************اقول الله يا كبره غلاك
واقول اليوم وش ذنبي أعاني
************واقول اشلون يتعذر لقاك
صحيح الشوق عذبني وكواني
********وانا ادري الشوق بهمومه كواك
ولكن.. ماتصورت الثواني
**********تصير سنين في ليلة هلاك
عجزت اتصور لغيرك حناني
***********عجزت اتخيل لغيري هواك
واصير لغيرك وغيري مكاني
************واقول لغيرك ايامي فداك
حياتي كلها كانت أماني
********بعمري ما عشق قلبي سواك
نسجت الشوق لك أحلى الأغاني
********قتلت النفس لجل اوصل رضاك
وجار الوقت للفرقا خذاني
*********** أنادم صورة الذكري معاك
حبيبي ما أبي قلبك يعاني
*********** إذا باقي تسميني غلاك
أبيك تعيش للفرحه عشاني
********** وترمي فايت الذكري وراك
فمان الحب.. يا أغلى الأماني
********* فمان الحب.. يا أجمل ملاك
قصيدة لها تاريخ
أتمنى أن تنال الاستحسان
العرض العادي
