قصيده يرددها كل من في المستشفى
فهي قصيده على لسان سيدة وقورة ترقد احد المستشفيات منذ سنوات قصتها مبكية حيل
تقول هذه السيدة قبل سنوات جاء زوجي وطلب مني اروح معاه السوق وقالي اشتري اللي تبين وبأي سعر واشتريت افخم الثياب واجملها وجميع المستلزمات للبيت وغيره ورجعت للبيت مسرورة وفرحانه فجأة قالي زوجي كل هالاغراض مو لك هذي لزوجتي الجديدة وانتي الحين طالق ..بعد هالحادثة اصيبت الزوجة بجلطة وغيبوبه جلست في المستشفى ولا احد يزورها غير اخ لها زارها كم مره وبعدين بطل لما طالت المدة ولازالت موجودة في المستشفى والكل يعرفها وحافظ قصائدها وكلماتها ولما تسألها عن قصتها تبكي بحرقه وتردد قصائد توجع القلب لانها ولهانه حيل على اولادها ولا تدري عنهم شيء فالكل هجرها...
وهذي احد قصائدها تقول فيها
تكفيـن يـا طيـور حـرار افزعيلـي
ابي عن اديـار الاهـل منـك الاخبـار
تكفين حومـي فوقهـم وارجعـي لـي
والا ان حصل لك حومـة داخـل الـدار
تكفيـن حـول ابيوتهـم دوري لــي
سبعـة فـروخ يـوم اخليهـم صغـار
شوفي ضنـاي وعـودي وانكفـي لـي
وشلونهـم يـا علهـم صـارو اكبـار
نسيوادفـاي ونومهـم فـي شليـلـي
وش علمهـم ياعلهـم طـول الاعمـار
قولـي لهـم أن امكـم لهـا عويـلـي
خمسـة سنيـن دمعهـا دوم مــدرار
وقولي لهـم انـي علـى طـول ليلـي
انـوح وليـا قـرب الصبـح انـهـار
وقولـي عيونهـا دايـم لهـا هميلـي
تبكي ليـا شافـت مـن النـاس زوار
كل يوم اقول اغدي حديهـم يجـي لـي
راحـت سنيـن مابـهـم واحــد زار
وانا اللي مـن سبـة سـوات الحليلـي
حالـي تـردت كـل مالهـا وتنـهـار
وفرقى ضنـاي اللـي تـردت بحيلـي
كني على شوفتهم اصلـى علـى نـار
يـا ويلـي كـان الله عجـل رحيـلـي
وانا لـي سنيـن ابـي لوهـي اخبـار
ياعونة الله الله مـن يبـي يتكـي لـي
جارت علـي بامرالولـي كـل الاقـدار
تنكـروا مــن يدخـلـون الدخيـلـي
واللي بوسـط ديارهـم يامـن الجـار
قولـي لهـم ياطيـور قلبـي عليـلـي
الله يكافـي قلوبهـم صـارت احجـار
وانا اللـي لبـراق الخيـال استخيلـي
واقــول يـاعـل (......) للامـطـار
.تكفيـن وسـط ديارهـم صوتـي لـي
شوفي عسى لسمي مع النـاس تذكـار
وقولـي لمـن نسيانـهـم يستحيـلـي
يااللـي نسيتوهـا تـرى الوقـت دوار
ياهيـه ياللـي بالسمـا لـك هديـلـي
ردي خبـر تكفيـن يكفينـي امــرار
شوفي اكااللـي نومهـم فـي شليلـي
من اذان المغرب الـى وقـت الاسحـار
شوفي اكااللـي مااهتنـي فـي مقيلـي
الا بمقيـل معهـم كـبـار و صـغـار
وقولـي لهـم ان كـان حملـي ثقيلـي
مره يجون وعقبهـا شـي مـا صـار
وانــا يتـولانـي كـريـم جليـلـي
يا علني في جنته وسط الابرار..........
قصيده تدمــع لهــا العين....
العرض العادي
