السلام عليكم ورحمه الله وبركاته
صباح الخير ...... مساء الخير
عيش بالدنيا مثل عابر طريق
وخذ وصيه من حديث المصطفى
ولاتلوم الوقت لو صدرك يضيق
كل جرح عند ربك له شفا
والجمر لو في لهب ناره حريق
بس بعض احيان يصلح للدفا
عادة الأيام مافيها رفيق
الزمن لو عاهدك لا ماوفا
ناظر العصفور وجناحه طليق
عانق السحاب غرد واحتفى
مادرى الصياد له سهم دقيق
لو درى بالغيب جفنه ماغفا
القدر مكتوب في اللوح الوثيق
وان حدث ماتنفعه كلمة أفا
والأماني بحر والنايم غريق
والوصل لابد من بعده جفا
ومن حمل أكثر بعد مما يطيق
ينكسر عزمه ويمشي على الحفا
والمحيط الشاسع ان واجه مضيق
موجه العاتي تلاشى واختفى
والذهب غالي وله لمعة بريق
مانقص قدره ولو نوره طفى
ومن ضميره حي قلبه يستفيق
حزة الفزعات بتشوفه لفى
والنحل من طيبته يجني رحيق
والعطش من قسوته مابه صفا
والأفاعي سمها والله عويق
جرحها بالدم دايم ينزفا
ولايغرك صاحب الصوت الرقيق
لو تشوف دموع عينه تذرفا
حكمة للوقت خذها ياصديق
من وثقى بالله أفلح واكتفى
ارجوء ان تعجبكم
تحياتي
العرض العادي
