سبحان من يرزق بتوع الملاييـن=الرازق اللي ما يخيب الرجـا بـه
لي عم عنده معـرضٍ للصواليـن=أموت واعرف بس من وين جابـه
وإذا سألته قـال بعـت الدكاكيـن=ما يدري إني ما هضمت الإجابـه
الشاهد إني رحت له قبـل يوميـن=في قصره العامـر ودقيـت بابـه
قال أرحب أرحب عدّد ورد البساتين=يا مرحبا باللي لفا يـا هـلا بـه
قلت البقا عـدّ النفـل والرياحيـن=يا شيخ شمل أهل الكرم والذرابـه
قال اسلم الله يحفظك لي من العين=وآمر أوامر حضرتـك مستجابـة
قلت الصراحة طالبٍ قرب غاليـن=ودي تزوجنـي كريمتـك يـابـه
ثنّى وقال أهليـن والله وسهليـن=والكون ترخص لجل عينك رقابـه
لكن ترا عندي شـروط وقوانيـن=قلت اشرط اشرط يا حبيب الغلابـة
قال أولاً مهـر العروسـة ثمانيـن=غير الرسوم وغير حق العصابـة
والثانية عمك يبي منـك سبعيـن=رسم الأبـوّة والنسـب والقرابـة
وأم العروسة حقها منـك ستيـن=عشانها سـت الحسـن والمهابـة
وإخوانها كلن يبي منـك خمسيـن=عداً ونقـداً تنـدرج فـي حسابـه
وخواتها الخمس عطهن من ثلاثين=عشان تتوثـق عـروق النسابـة
وتجيب طقم عيار واحد وعشريـن=وخاتم من الماس المصفى ترابـه
وأكياس متروسة كعوب وفساتيـن=ألوانهـا وأشكالهـا مـا تشابـه
وموتر بسواقـه وفيـلا بدوريـن=أثاثها مـن بطرتـه ينحكـى بـه
واحجز لنا قاعة بقصر السلاطيـن=واحجز بهـا رقاصتيـن وربابـه
هذي الشروط اللي على بالي الحين=وذكرني اللي ما حسبنـا حسابـه
قلت اذكر الله يا عـدو المساكيـن=واستغفـره لا يبتليـك بعـذابـه
الظاهر إنك منت عارف أنـا ميـن=أنا لو أرقى فوق متـن السحابـه
ما جبت حتى نص درزن مواعيـن=واضحك بكيفك واعتبرهـا دعابـة
شروطكم هذي شـروط المجانيـن=شروطكم شغـل ابتـزاز ونهابـه
شروطكم تقصم ظهـور البعاريـن=شروطكـم همّـن وغـم وكآبـه
شروطكم والله سيـوف وسكاكيـن=تذبح بنات المجتمـع مـع شبابـه
وين الرضا والعطف واليسر واللين=اللـي ذكرهـا الله بمحكـم كتابـه
وين الصفات اللي أمرنا بها الدين=وين اختفى نهج النبي والصحابـة
يا عم جعل اللي خلقنا من الطيـن=يرد عقلك مـن خطـاه لصوابـه
ويجعل نصيبي عند غيرك قل آمين=ويحسن عزا الصابر ويجزل ثوابه
قال أنت لو فكرت تفكير صاحيـن=ما شفت في مجمل شروطي غرابه
حنا بعصـر العولمـة والمزاييـن=ماهوب عصر الفلسفة والخطابـة
الناس تسعى للرتـب والنياشيـن=وأنت اهتمامك بالشعـر والكتابـة
والشعر ما ينفعك لو هو دواويـن=ما دام جيبك مثل بيـت الخرابـة
يا بوك لا تسمع كلام المصاخيـن=واسأل مجرب عاش في وسط غابه
قلت الله أكبر يا محـرر فلسطيـن=من يسمعك يحسبك ذيـب الذيابـه
تراك شايب رأس مالـك رياليـن=والبنت ما تسوى جنـاح الذبابـة
قال انقلع مالت على وجهك الشين=لا عاد أشوفـك عندنـا يالزلابـه
قلت ابشر أبشر لكن الباب من وين=وأقفيت من عنده على صوت بابـه