ياشقى دنيــــــــــــــــــا علي زايد ألمها
وياشقى وقت(ن) علـــــي دايم شحوح
بي جروح(ن) كلمـــــــــــــا حاولت ألمها
تنتثر في قســــــــــــــوة الياس اللحوح
مـــــــــــــن يعاون نفس متزايد سقمها
من يشيل الهم عــــــــن قلب(ن) وروح
روحي اللي تشتكي مــــــن نار همها
وقلبي اللي يشتكي نزف الجــــــــروح
آه يادنيا علي أرخت ظلمـــــــــــــــــها
لين خلت كل شي فيني ينـــــــــــوح
فـ الأسى والهم عندي يـــــــــــاكرمها
ويابخلها في السعـــــــــــــاده والفروح
يوم عيني وقتي القــــــــاسي حرمها
شوف شخص(ن) شوفته تشفي الجروح
كم بكت هالعين لكــــــــــــن مارحمها
وكم شكت فــــــــي عتمة الليل وتبوح
من فراق اللي تحــــــــت دوسة قدمها
درب للجنه من إرضــــــــــــــــاها يلوح
أمي اللي صـــــــــارت بقبر(ن) يضمها
ضمني من بعدهــــــــا حزن(ن) لحوح
ليتني باللحد بالي مــــــــــــــع جسمها
مابقى لي بعد فرقاها طمـــــــــــــــوح
كم تمنى خـــــــاطري بوسة خشمها
أو تداعب إيدهـــــــــــا راسي بمسوح
إيه يـمّي للقــــــــــــــدر دمعه رسمها
في عيون اللي رفض قلبـــــــــه يبوح
طول عمره كل أحزانه كتمـــــــــــــــها
وخافقي يمّي من فراقك ذبـــــــــــــوح
صرختي يمّي أبد محد(ن) فهمهـــــــا
ظنهم هالصرخه ياأمي مــــــــــــــزوح
مادروا إن الأسى روحي هـــــــــــدمها
ومادروا فيني الألم شيّد صـــــــــــــروح
كيف بصبر والزمن روحي صدمـــــــــها
كيف بصبر والألم عيّا يــــــــــــــــــروح
ربي اللي قدّر القسمه وقسمــــــــــها
وحكم ربي أفبله بصدر(ن) سمــــــــوح
دام ربي قسمته راد وأتمــــــــــــــــها
مرتضي حكمه وصابر صبـــــــــــــر نوح
آه يمّي فرحتي موتك عدمـــــــــــــها
بس دايم للصبر ببقـــــــــــــــــى نزوح
علّ رب(ن) خالـــــــــــــق الجنه ونعمها
يجعل الفردوس لك يمّـــــــــــــي طروح
آه يادنيا علــــــــــــــــــــــي زادت ألمها
لين خلت كل شي فينــــــــــــي ينوح
فـ الأسى والهـــــــــــــم عندي ياكرمها
ويابخلها في السعـــــــــــــــاده والفروح
العرض الشجري
