بسم الله الرحمن الرحيم
قالوا تطيب وقلت ما هو بضني
انا بلاي من الطبيب المداوي
الله لا يجزاه بالخير مني
اجيه ويزيد البلاوي بلاوي
الشيب داهمني على صغر سني
قدني عقب ذيك المساريح ضاوي
الله ما اقوى حربة اللي طعني
ما كنها الا من يمين العطاوي
اهيم في زحمة زمان(ن) فتني
واصبر ويكويني من الهم كاوي
كني لمنها غابت الشمس كني
من ضيقتي مسجون ولا جلاوي
يا ونتي ونة صويب(ن) يوني
صابوه فرسان القنا والعزاوي
اون من جرح(ن) قديم(ن) سكني
واعيش بين امة محمد خلاوي
والله لو إني لوإني لوإني
بنسى ثلاث دونها الذيب عاوي
لاقول يالنفس الحزينه تهني
واقول يالقلب الشفوق الشقاوي
خلاص من زرع الرجاء والتمني
والناس ما يدرون ويش انت ناوي
يا وقت خاف الله ولا تمتحني
ارفق بحالي يالزمان القساوي
حال(ن) غدى مثل الهلال المثني
يطويه من صكات الايام طاوي
افرح بقرب العيد واضحك واغني
والبس نهار العيد بشت(ن) حساوي
اخفي بلاي من الشواميت لني
ماابغا حد(ن)منهم يثير الدعاوي
واحلى السنين اقفت على كف جني
خسرتها واللي بعد كم يساوي
من عقبها قولوا لمن سال عني
دنياي عقب مخيبين الهقاوي
عزاي منها عقب ما خاب ضني
رفقة راع الكف الكريم النداوي
لولاه خليت الهقاوي تحني
على جبا ذاك القليب السناوي
ون قالوا ادله قلت ما هو بضني
وانا بلاي من الطبيب المداوي
شعر/عبدالرحمن الشهراني
العرض العادي
