معاناتي مع الحب

[المليح]

هذي اول مشاركه مني لكم
واتمنى انها تعجبكم
والجايات اكثر

ملاحظه : هذه قصة واقعيه..ومؤثرة بلحيل..الرجاء عدم اصطحاب المغاتير و اللي معه مرض قلب أو عنده تليف بالكبد تراي مالي دخل لو مت وانت تقرى هالقصه..موب تموت همن تجي تهاوش تقول ما قال لنا...

---------
أنا انسان وسيم بلحيل..يعني مريض بالوسامه..لدرجة اني اذا شفت نفسي بالمراية اتميلح عند نفسي (ايه هين)... لكن ماش مالي حظ أبد مع البنات..ما أدري وش السبب, أكيد التحكيم (متعشي مع نصراوي البارح)..

أنا طابعا غاسل يدي من أني تكون لي أي علاقة مع الجنس الناعم لأني سبق أن حاولت محاولات جاده بس ما عندك أحد, يعني من جنب القده.. بكسر القاء وتشديد الداء (أي وحده تقرى هالموضوع جالسة تقول بقلبها ياربيه وش معنى قده, بس أحسن والله ما اعلم)

حاولت أكثر من مره اني اسوي علاقة بس ماش,
مره بالسوق رحت اتميلح عند وحده وابربش لها بعيوني..طالعتني شوي..وقالت يالله لك الحمد واستفرغت وراحت...
ومره لقيت ثنتين يتهاوشن مع واحد يبيع قماش بنفس السوق واجيك يقال لك بفزع وازلق عليه ولا أبو خريش اذا طقته أم العبيد ويمسكني ويسطرني ذاك التسطير اللي يحبه قلبك, صرت كني دفتر رياضيات فصل صفحة 21 من زود التسطير..همن رحت لمهن وانا فاقن كشرتي واقول هاه وش رايكم بس؟ قالت وحده..وانت وش دخلك اللحين؟ ضف لاناديلك الهيئة شين ويبي يتميلح بعد....
تراها قالت شين من الغيره باين أصلا (ترى ما ضاق صدري أبد)
لدرجة اني حاولت اتعرف على وحده بالانترنت..بس ماش كل ما سولفت مع وحده شوي قالت...يع انت بلوك..وبعض الاحيان يقولون انت أقنور..على حسب البورصة



المهم عشان ما أطول انا مالك أمل اتعرف على بنت... انا رضيت بهالواقع المرير وقلت في نفسي يا رجال حتى أبو يعقوب يحب رقم 15 (وش دخل؟)....

وفي يوم من الايام...كنت مستلقي على ظهري في الملحق جالس العب بسرتي واهوجس لو الضب عنده عكرتين كان صارن كلهن نفس الطعم ولا لأ؟ يعني كان ممكن واحد يصير "سبايسي" والثاني "عادي" ولا الجو ما يساعد...المهم وانا في عز التفكير الا جوالي يدق وحسيت كأن قلبي يدق مع دقة جوالي (ياروحي) عاد انا كنت حاط نغمة يا ناعم العود حقت علي عبدالكريم (أم السقامة يا شيخ) وما قدرت ارد بسرعه جلست متنح وضايع مع الدقه برهة من الزمن...وبعدين رديت.. الا ذيك البنت اللي صوتها يقول للقمر قم واجس محلك (والله من زين الوصف) صوتها موب صااحي ماشالله..يعني كنه خط وحده تكتب بالوردي في غرفة "الله^انت^مره][تهبل][هاهاها" (هذا وصف للشباب اللي عايشين في جفاف وحدهم تشات)...

قالت آلو؟!
قلت هلا والله وغلا (اسمع بالثقل)
قالت خالد؟
قلت اصير لتس خالد يا حبيبتي (اما يا حبيبتي)
قالت هاهاهاها..دمك خفيف
ما قلت شي (جالس اقبص نفسي)
قالت وش اسمك؟
قلت يهمك يعني (يااااااااا روحي يالذيب)
قالت اذا ما تبي تقول براحتك...
قلت لها اياد (يا كبرها عند ربي..اياد ولابس سروال سنه)
قالت طيب يا اياد اكلمك بعدين..طربق..صكت السماعه

طبعا عزيزي القاريء انا جاني احساس صعب ينوصف..حسيت كأن ودي اتسبح...وقلبي قام يناقز..وجاني مغص...وحامت تسبدي (ولو وش السالفة؟) طبعا انا بعد كل هالاعراض عرفت اني حبيت..

صرت عايش على أمل انها تكلم مرة ثانية...وصرت اربع ساعه وعشرين افكر فيها..وهي من جد شكلها سحبت علي..جلست ثلاث ايام ما كلمت.. لدرجة اني صرت اهوجس فيها طول وقتي..وصرت انغف كثير (هذا دليل التفكير العميق) لدرجة اني صرت اتفنن..وتعلمت فن التكوير من كثر التفكير... وفي عز ما انا افكر الا جوالي دق واناظر الا هذا رقمها..انا كنت مخزن رقمها وكاتب "اللي تحبني" تحسون واثق.. المهم اول ما شفت رقمها رحت اركض غرفتي وتعطرت بسرعة, وغسلت يديني (ضروري) وجيت امشي مليون والجوال لسى يدق (تحس متأثر بذاك الكرتون اللي كان يجي العصر..اللي يقول بيب بيب) المهم اول ما رديت

قالت أهلين اياد
قلت منهو اياد؟ (والله من الدجه)
قالت انت مو اياد؟
قلت الا الله يقطع بليتستس ما ينمزح معك انتي؟ هاهاها (يلعن ام التصريف يا شيخ)
قالت طيب اياد ممكن نتعرف اكثر؟
قلت تبين اعطيك رقمي يعني؟ (قايل لكم من جنب القده)
قالت نعم؟! (ولو المسكينه عجزت تستوعب الكم الهائل من الدلاخه)
قلت لا ولا شي..وشلون نتعرف أكثر يعني؟
قالت ابي أشوفك في مكان عام..ممكن؟
قلت افا عليتس..ممكنين (ذابحتني الثقه..قايل لكم وسيييم)

وتواعدنا اني اقابلها في حلة القصمان بعد الحاح شديد مني, لأنها كانت تبي تقابلني في اللوبي حق الفيصليه..وانا بصراحه مدري وشو اللوبي ولا بغيت احط نفسي في موقف طولي...

والله واكشخ ذيك الكشخه..واتعطر..وافرش سنوني..وانعم....الخ
و اروح للحلة, طبعا حنا كنا متفقين انها تشوفني من بعيد وانا اشوفها وخلاص نروح.. انا نزلت شوي ادورها واتلفت بس ما شفت احد.. شوي واناظر من بعيد الا فيه واحده جالسه تستفرغ والحريم متجمعين عليها وهي ترافس و ترجف وجا الاسعاف واخذها.. المهم انا جلست احتريها بس ما شفت احد.. وبعد 8 ساعات وربع من الانتظار قررت اني ارجع للبيت وقلت في نفسي عادي أصلا الانترنت بالامارات ببلاش (هالمره من جد وش دخل؟)...
وهالمره عاد البنت من جد سحبت علي..
ثلاث اسابيع ما اتصلت..وهي كانت موصيتني اني ما اتصل عليها ابد..هي بس اللي تدق علي.. بس ولو زلبتني بصراحه..وانا ذبحني الشوق..قلت يا ولد ما بدهاش دق عليها دقه وقفل (حركات صبايا ).. وطبعا ما اعطتني وجه..
وبعد ما شفت ان الدعوه طالت قلت بكلمها واللي يصير يصير..وادق عليها وترد علي وحده..صوتها موب مثل صوت خويتي اللي يقول للقمر قم واجلس محلك..انا طبعا جاني شد عضل بخشمي من الصدمه..

قلت مين انتي و وين حبيبتي؟ (اما حبيبتي انا بعد)..
قالت انت اياد؟
قلت مين اياد؟ (يا حوووول)
قلت ايه ايه انا اياد.. وين حبيبتي؟
قالت حبيبتك خلاص انساها تكفى..راحت ذلفت..طست ماااتت..لا عاد تدق على هالرقم واللي يرحم والديك..طربقع..صكت السماعه

انا حسيت كأن الارض قامت تدور (تكفى ياللي جبت شي جديد اللحين) و خنقتني العبره..وطحت على ظهري..بعدين..شلت يدي..دخلتها تحت الفنيله...وقمت العب بسرتي ورجعت افكر بالضب خويي أبو عكرتين...............................

الزبدة ............
اي واحد وسيم مثلي لا يخلي حبيبته تشوفه كذا بدون مقدمات.. لأنها ممكن تروح فيها مثل حبيبتي.. لازم يمهد لها الموضوع أول..يعني كل يوم تشوف شي منه..مره خشته..مره عيونه..مره اذانه..وهكذا دواليك.. والا ترى بتصير النهاية مأساويه مثل اللي صار لي..