القصة اللي جايبتها لكم هذي قصة واقعية صارت في الدوحة وصارت لاقرب قريب لي والرومنسيات هم اللي بيردون وبيقدرون قصتهم والقصة دارت بين شاب اسمه ( خ ) والبنت اسمها( ن) انا بخليكم مع قصتهم وابيكم في ردودكم تعطوني رايكم وتختارون لهم لقب يناسب علاقتهم وحبهم لبعض
القصة بدت في مطار الدوحة الدولي كانوا الاثنين مسافرين لقضاء فريضة الحج لسنة 2006 وفي صالة الانتظار كانت البنت جالسة وكان الشاب يتمشى في الصالة لين مايحين موعد الطيارة وهو يتمشى جات عينة بالصدفة في عين البنت وفي نفس الوقت كانت البنت بعد بدون ماتقصد تناظره وصدت وفي هاللحظة بدت علامات الاعجاب والحب من اول نظرة وتعلق الشاب فيها وصادف انهم في نفس الرحلة ونفس الحملة كان الشاب دايما يوقف عند باب الحملة يتمنى بس لو يشوفها من بعيد عشان يرتاح والشاب حبها وكان يحاول طول فترة الحج انه يتقرب من اهلها ونجح وتعرف على اخوها والبنت كانت حاسه في حبه او اعجابه بس متخوفه انها تستعجل او انها مجرد فترة اعجاب وتزول بس في الحقيقة هي حبتة وكان الشاب في زحمة الحج ورمي الجمرات كان يحاول يحمي البنت من زحمة وتدافع الناس وطول ماكانوا يدعون ويصلون مع كل لحظة يدعون انهم يكونون لبعض وان ربهم يوفقهم ويرزقهم لبعض وطول فترة الحج تقريبا 12 يوم كانت دعواتهم وطلباتهم كلها انهم يكونون لبعض واخر يوم حاول الشاب التقرب للبنت بس يبي منها الرد هي حاسه فيه والا لا يبي يعرف أي اشارة منها كانت جامدة معاه ماكانت تطالعه اذا طالعها بس هي بداخلها كل الاشارات والردود تقول انها دارية وحاسه به بس الشاب كان خايف يرد البلاد وهو ماعرف منها لارد ولا عنوان ولا اي معلومة توصله لها وعلم امه بالسالفة وانه يبي هالبنت الام طبعا فرحت لولدها وراحت تكلم البنت وعطتها الرقم واوعدتها البنت انها اول مايرجعون للبلاد تكلمها ورجعوا للبلاد واول ماوصلت البيت ارسلت بمسج لوالدة الشاب وبلغت الشاب بان المسج من البنت اللي كان يبيها ومع الوقت تعلق الشاب في البنت اكثر والبنت نفس الشي واكثر وطلب منها ان يشوفها مع العلم انه طول هالفترة ماشافها ولا مرة بس حبها باختيار قلبه ووافقت البنت وكان اول يوم يلتقون فيه كان في الشتاء والجو مغيم مع شوي مطر والجو في غاية الروعه التقوا في كافيه وركبت البنت معاه في السيارة ومسكوا يد بعض وكل واحل يوصف حبه للثاني وشافها واعجب بها اكثر واول اهداء من الشاب للبنت كانت اغنية زايد الزايد-مشكلتي واهدت البنت اغنية تنحط عالجرح كأول اهداء لحبيبها وكبرت علاقتهم وزاد حبهم واحترامهم لبعض وصاوا يكلمون بعض وكل واحد يتطمن عالثاني ويخططون لمستقبلهم ويحطون اهدافهم ويطلعون يتغدون ويتمشون مع بعض كل مكان في الدوحة زاروه مع بعض خاصة البحر كانت البنت دايما تطلب من حبيبها ان ياخذها للبحر وكانوا محافظين على علاقتهم بان محد يخون او يترك الثاني وتبادلوا القلوب وفي يوم من الايام طلب من امه انها تتقدم لطلب يد البنت لولدها وفعلا جات الام وكلمت اهل البنت وبكل سهولة ردوا عليها ان البنت =مخطوبة= والبنت مب مخطوبة طبعا انحطوا في موقف صعب والاهل ماجابوا خبر للبنت ان الشاب تقدم لها ومافقدو الامل وحاول الشاب يكلم ابو البنت وكلمه بالموضوع ورد عليه وقال له انشالله برد عليك ولاجابو خبر وحاولت البنت انها تفتح الموضوع مع اهلها وكان ردهم انهم رافضين الشاب بدون أي سبب وبدون مايسالون عنه وكان كل واحد منهم يصبر حبيبه وجدهم خلاص غارقين في بعض ومستحيل احد يتخلى عن الثاني حاولوا انهم ينهون علاقتهم البنت ارتفعت حرارتها بسرعه حتى المستشفى تفاجئوا والشاب جاته حالة اكتئاب وعصبيه فضيعة مما خلاهم بعد 3 ايام يرجعون وهم كلهم حب وشوق لبعض وفي اجازة الصيف اهل البنت بيصيفون لمدة شهر في استراليا وفرنسا وتركيا ومر شهر 7 اتعس واطول شهر في السنه البنت مانامت يوم السفر طول الليل كانت تكلم حبيبها وفي السفر ماحست بالسفر ولا بحلاوة ومتعة السفر كان كل همها حبيبها ورجعتها وكانت كل متضايقة وحبيبها نفس الحاله مايعرف ينام وهو ماسمع صوتها ولا يعرف هي وينها الحين ولايركز في الطريق ولا شغلة باله مشغول فيها والكل يفكر في الثاني وهم بعاد بينهم اميال وبحار ومحيطات وبلادين ويفكرون هو وين؟ نايم قاعد؟ صاحي مريض؟ مرتاح متضايق؟ محتاج شي؟ والاتصالات عندهم كانت ضعيفة الشبكة شبة معدومة واذا كلمتة البنت مب اكثر من دقيقتين ويقطع الخط وحاولت البنت انها ترجع بس اهلها رافضين لتكملة الرحلة تمت 9 ايام في استراليا وكلمت عمها يرجعها ورجعت من استراليا لسوريا لمدة 8 ايام وفي سوريا الاتصالات احسن بشوي كان بينهم اتصال وفي اليوم الثاني لها وهي في سوريا كانت البنت طايرة من الفرح انها بترجع لحبيبها بعد اسبوع مب شهر جاها اتصال من حبيبها وكانت تبشرة وتقول له انها راجعة بعد اسبوع كان الارسال يقطع وسكر الخط وفي اليوم الثالث قامت الصبح وكان يوم الاثنين وموعد رجعتها السبت قامت على رنة المسج من حبيبها وقرت الرسالة وكان كاتب لها مسج ان ابوه لقى لولدة بنت وان الملكة هالاسبوع واذا ماسمع كلامة بيزعل ابوه عليه وكاتب نهاية المسج الله يرزقج باللي احسن مني ومع السلامة تخيلوا موقف البنت وهي تاركة اهلها من استراليا علشان ترجع له ويقول لها هالكلام طبعا البنت قرت المسج مليون مرة تبي تتاكد من الكلام ومن المرسل وحاولت انها تتصل له ماكان يرد وترسل له بمسج بعد مايرد البنت من قوة الصدمة راحت للسفارة وطلبت اسرع رحلة للرجعة ودخلت على السفير وماتم مكان في سوريا ماراحت له علشان ترجع ويوم الاربعاء الصبح قالوا لها اذا بترجعين اليوم بتنتظرين في البحرين يوم كامل وبنسحب الجواز والا أنطري لين يوم الجمعة الصبح والبنت بدون تفكير ومن تاثير الصدمة وافقت انها ترجع واسحبو منها الجواز ورجعت بروحها من سوريا وفي المطار جاتها بنوته صغيرة تبيع ورد وقال لها خذي ورد للي تحبيه ردت عليها بكل حزن والم اهدي الورد لمن؟ اللي احبه راح.
وطول ماكانت في المطار وفي الطيارة كانت من كثر الحزن كانت تدمع عينها وتبكي بداخلها وبدون تفكير انها حتى لو رجعت هو بيكون مب لها وفي مطار البحرين ماكانت تبي تعطيه خبر بس قالت بتجرب وارسلت له بمسج انها في البحرين ورد عليها باتصال وهو مصدوم سالها شعندها في البحرين لوحدها؟ وشلون رجعتي لوحدك؟ قالت له انا رجعت عشانك ولاتقولي ليش؟ وشلون؟ وسالته اذا هو خطب والا للحين؟ رد عليها وانتي تتوقعين اني بسويها؟ قالت له وابوك؟ قال لها ابوي مايعرف باللي بيننا بيزعل علي بس لين عرف شكثر احبك بيعذرني. وقال لها اذا بتطولين في البحرين باجيك وقالت له لا بكره بكون عندكم وفي المطار لقت حجز بعد ساعه ورجعت في نفس اليوم ورجعت البيت وكلمت حبيبها وقال لها لقيتي مكان في البحرين؟ قالت له انا في البيت ودارت الايام عليهم وهم مثل ماهم يحاولون انهم يكلمون الاهل مع العلم بان الشاب مب قطري خليجي بس من مواليد قطر وعنده وظيفة وماعلية قضايا او سيرة تخل بالشرف والبنت قطرية من عائلة كبيرة في قطر واهل البنت رافضين رفض بات وحاولت تكلم اهلها لاكثر من 7شهور وبدون فايده والشاب يبي البنت والبنت تبيه ويحبون بعض اكثر من مشاهير القصص الرومنسية وكلموا استشاريين وقضاة وعلماء دين عن مشكلتهم وكل واحد منهم عطاهم راي والكل متناقضين لدرجة انهم فكروا بكل الطرق لحد ماجا يوم راحت فيه البنت والشاب الى المحاكم وحولوهم لمركز الاستشارات وجابوا اهل البنت وكلموهم وللاسف طلع المركز يشجع على الكذب والخداع بدل لايحل الموضوع يزيد الموضوع فتنه جابوا الاهل وعرفوا منهم الموضوع ان البنت تبي الشاب والاهل رافضين بدون سبب وجابوا الشاب وقال لهم انه يبي البنت شافوا الموضوع كبير شصار قالوا للبنت ان الشاب انسحب من الموضوع وانه وقع تعهد بانه مايجيك ولا يتعرض لك البنت انصدمت وكذبت الموضوع وجابوا الدكتوره والاستشارية عشان يشهدون على صحة الكلام والبنت اهلها اسحبوا منها كل التلفونات وماتقدر انها توصل للشاب وتقول له وطلبت انها تكلمة عندهم رفضوا ولم رجعت البنت البيت كلمت حبيبها وقالت له باللي صار وحلف الشاب وقال ان هم قالوا له ان البنت اللي ماتبيه وانها بتنسحب ولين الحين موضوعهم وهم مايقدرون على فراق بعض الله يعينهم ويصبرهم
هذي قصتهم اللي انا اعرفها طبعا اذا استجوبنا احد منهم بيعطينا القصة بكل تفاصيلها
وناطرين ردودكم
مع العلم انهم للحين يحاولون ولاتنسون تسميتكم لهم لانهم بصراحه يستحقون تسميه اروع من الف ليله وليلة لان علاقتهم صادقه وبلا خداع وخيانه وهذا نادر في هذا الوقت
العرض العادي
