نعم ياتركي سعد من لك يخاوي = أشهد أنك رمزٍ لمعنى الأخوه
أشهد أنه ماتخيب بك الهقاوي = من نخاكم يبشر برجال نخوه
ونعم ياتركي نعم وابك العزاوي = عزوةٍ لي ومن روس عزوه
فالشجاعة كنك بخيت العطاوي = والوفاء والجود فيكم والمروه
ويالله أني طالبك كف البلاوي = في زمانٍ ماش به حيلٍ وقوه
عاويٍ والذيب فالمرقاب عاوي = من المبرز للقطيف لدار صفوه
لاني بلا مهتدي لاني بغاوي = عايشٍ مابين لين وبين قسوه
والسبب فرقا حبيبٍ عود جاوي = من بعد فرقاه وسط القلب فجوه
صح يجرح بس لجروحي يداوي = وكل يوم يحط لي قصه وندوه
كنت احسب أني على فرقاه قاوي = والحقيقة بلوه وفرقاه بلوه
من بعد فرقاه في ليلي سراوي = روح وياضنتي مافيه رجوه
روح ومن دونه دروبٍ ملاوي = والقفل والباب مع ذيبٍ ولبوه
ولايعقد فالحبال الا الزناوي = والوشايه والنميمه طبع زنوه
والزمن لو طال فيه الوقت طاوي = والحكيم يسير من خطوه لخطوه
والدعاوي لو كثر سرد الدعاوي = الدعاوي كلبوها بس دعوه
ولايرد القافله نبح الضراوي = لو وقف في دروبها كلبٍ وقطوه
والصراحه باقيٍ رجل هاوي = وأعتبرها للحصان حساب كبوه
العرض العادي
