حكاوى هنداوى
السلطة فى خدمة الشعب ..ولم تكن يوماً أداةً للقهر..والديمقراطية الحقة هى أن يُحكم الشعب بالشعب ..وللشعب..لا لمصلحة الفرد..!! أو فئة معينة..؟؟ وربما هذا ماجعلنا نرفض الملكية ونظام الطبقية..وهذا أيضاً ما جعلنا نثور على الظلم والطغيان ..والفساد واستعباد العباد.
فما يحدث الآن فى هذا الزمان نوع آخر من الإستبداد والإستغلال..والإستخفاف بعقول الناس..نوع آخر من التعميه والبلطجة..وفرض الرأى بالقوة..وبالمال ..وبالإحتيال فى الكثير من الأحيان..!!
وإليكم قصة الفلاح الفصيح (هنداوى) عندما سأله أحد مراسلى الصحف عن أبن بلدته(فرحات البنهاوى) فأجاب قائلاً :
- إهيييه..!! بقى أنتم ما تعرفوش فرحات باشا البنهاوى..؟!!ماسمعتوش أبداً عنه..؟!! أنتم مش من البلددى..؟!!باينكم مش م البلددى..!! عشان كده منتوش عارفين فرحات باشا.
واستطرد قائلاً - دون أن يسأله أحد- :
- دا عين أعيان بلدنا..لأ مركزنا..!! دا عضو مجلس الشعب عن الدايره بتاعتنا بقاله ييجي خمس ست مرات..
- ........................................؟!
- لا لا..!! راجل البر والتقوى أيه..؟! إنتم باينكم فاكرينها زى الأفلام..!! هوا مش محتاج لكل ده..!!ولا يحتاج لدعايه للإنتخابات ولا لمؤتمرات خالص..!! دا كمان مش محتاج لنا ولا لأصواتنا..!! مهى رايحاله ريحاله..!! دا كمان بياخد أصوات جدودنا وجدود جدودنا إللى ماتوا وشبعوا موت ..وأسماء عيالنا إللى لسه منفطموش..!! المهم إن الكشوف تتملى أسماء..علشان المظاريف تتملى أوراق.. أوراق الإنتخابات..و بنكنوت كمان..!! وبعدين الأوراق تتملى بمعرفتهم هما..ولا يبهدلونا أحنا فى الحر ولا دياوله..!!
-..........................؟!
- مين همه..؟ إهييه..طبعاً ..أصل أنتم مش من هنا..!! دول الباشا المأمور والبيه الضابط وسعادة المستشار والعمده والغفره والفتوات بتوع البنهاوى باشا..!!
- .........................!!
- لا.. لا..أنا قصدى فرحات البنهاوى باشا..لأ.. أبوه عم مصطفى البنهاوى ماكنش باشا ولا حاجه..دا كان الله يرحمه كلاف مواشى فى الزريبه بتاعة العمده إللى فات..
-.................................................؟
آآآآآآه ..سألتنى أمال أبنه جاب الفلوس دى كلها منين..!! ماهو أصل فرحات باشا ده لا مؤاخذه.. كان حرامى مواشى..يهجم على أيوها زريبه فى عز الضهر..ولا حدش يقدر يقوله تلت التلاته كام..!! ههه مع أنها سهله ومش محتاجه حساب..أى والله..لكن الكل كان بيخاف منه..حكمن هوا كان جته..لأ متبصلوش دلوقتى لما كبر وعجّز..أيام لما كان شباب كان طول بعرض..وأيده دى تفصل تلاته زى حضراتكو كده..و لا مؤاخذه..أصلكم سفيفين شويه..لأ الحقيقه ..خالص..الصراحه حلوه..!! المهم مطولش عليكم ..كان بيمسك أجدعها نفر فى البلد ما يسبهوش إلا متكوم على الأرض..مافيهوش حته سليمه ..دا إذا مطلّعش روحه..!! إنما الحق يتقال ..أنه راجل طيب..ماهو الكدب خيبه..!! أى واحد يقصده فى شكلّه ولا تار بايت.. أو حاجه مسروقه ..مكنش يتأخر عنه..وبعدين يبقى يأخد الحلاوه..
-...............................................؟!
- لا.. ما البوليس موجود وكل حاجه..واتقبض عليه كتير وهوا لسه صغير..لكن مكنش حد يقدر يشهد عليه..وكان بيتحبس له يوم وإلا اتنين ..بالكتير أوى شهر ..ويطلع لنا تانى..فمين عبيط إبن عبيطه..هيروح يشهد عليه..؟!! وإلا يكنش مجنون يعنى..!! بعدين هوا فضل لحد ما اتصاحب على البشوات الظباط وبقم سمن على عسل أبيض ..وبقه يروح يسهر معاهم ..وياخد معاه حاجات لزوم السهره..!!
- .............................؟
- لا يأخى والعياذ بالله.. ماكنش بياخد غير شوية حشيش و بانجو..مخدرات أيه يا أخى..؟! هيا حصلت..!! وبعدين هما كان ناقصهم حاجه..؟! ما كل حاجه كانت تحت إيديهم..نصها يتقيد فى الدفاتر والنص التانى يمزجوا بيه نفسهم.. وبعدين لما يحبوا يبينوا الهمه فى الشغل.. يلموا شوية العيال إللى بيبيعو الصنف على ناصية الشوارع.. يقعدولهم سنه وإلا اتنين فى السجن -على الأقل يكونو ضمنوا أكله ونومه -..وبعدين يطلعوا تانى أشد م الأول.. ويكون طلع ألف غيرهم..!! ياعم أحنا مالنا ..خلينا فى موضوعنا..ماتخلناش نعِك فى الكلام..!!
- ..........................؟!
- بصمات أيه.. وفيش أيه إللى أنت جى تقول عليه..؟!! أنت عارف العسكرى بتاع الفيش بيقبض أد أيه..؟! أنت أديله بس ربع جنيه ..يحط بصمته هوا مكانك.. بدل ماتتعك أيدك بلك.. ومتتطلعش إلا بالجاز..!!
- .............................................؟!
- صفيحة سوابق أيه يا بيه..!! هوا حد فاكر هوا أكل أيه امبارح ..؟! دى حاجات بقالها ياما..والورق كلته الفيران من زمان.. وبعدين دا كان ف الأول .. وبعد كده ماعدش فرحات باشا بيعمل حاجه بأيده..!!راح اسنورد شوية فتوات مانعرفش جابهم منين...؟! هوا بس يشاور وهما إللى بيقوموا بالشغل كله..!! لحد ما بقى هوا الكل فى الكل فى النحيادى.. والنواحى إللى حواليها..
-.....................................؟
- ماتعرفش أيه يا بيه إللى طلع فى دماغه حكاية الإنتخابات دى..؟! مع أنه مكنش ناقصه حاجه..!!والشغل كان ماشى تمام وعال العال.. وكل سنه بيشترى فى أراضى.. طبعاً مش من هنا..!! لأن الأراضى إللى هنا هوا خدها كده عينى عينك بوضع اليد..لكن من النواحى إللى جنبنا ..وولاده فى أحسن الوظايف.. إللى وكيل نيابه.. واللى ظابط.. واللى دكتور.. وإللى مهندس.. وإللى متجوزه أبن البيه المأمور..واللى متجوزه العمده الجديد.. يعنى بقه مناسب الحكومه.. والحكومه مبسوطه منه آخر انبساط.. لأن محدش بيقدر يفتح بقه ويقول بم..!! وهيا عايزه أيه أكتر من كده..؟! وبعدين هوا مبيزعلهاش فى أيوها حاجه..!! وبيوافق على كل حاجه.. و مؤدب أخر أدب ..عمرنا مسمعناله صوت فى المجلس..!! مش زى الشويه المعارضين - الله يخرب بيتهم - ..كل شويه واقفين يزعقوا..مش مخليين حد من زمايلهم يرتاح شويه من دوشة العيال وأم العيال وينام..!! أهو كل واحد فيه من بلاويه إللى مكفيه..
ثم نظر لهم فجأة بإزدراء وقد احتقن وجهة ونفرت العروق على جانبى رقبته وصرخ فيهم مستنكراً:
- وبعدين بقه يا أستاذ أنت وهوه..؟! أنتم بتخلونى ألبخ فى الكلام شويه..ودا مش حلو..إننا نعيب فى الناس الكمل دول.. دولهما كبرات البلد..هما والوزرا والبشوات الظباط والمحافظين ولعيبة الكورة والممثلين والرقصات..!! بصراحة دول ناس ذوق ذوق ..مايتخيروش عن حضراتكم..أى والله..!!
- ......................................؟!
أنتم لسه عايزين منى أيه بقه يأخوانا..؟!خلونى أروح أجرى بقة على أكل عيشى..يعنى لا مؤاخذه كده ..هتنفعونى يعنى..وألا هتنفعونى..؟!
- ...............................................
- الأنتخابات إللى فاتت..؟! والله يابيه ماعرفنا إن كان فيه انتخابات.. إلا لما سمعنا ضرب نار كتير قى البلد..!! وماحدش فينا اتصجر يطلع بره بيته..قلنا جايز فيه عيلتين بيصفوا الخلافات إللى بينهم..!! ولما لقينا الموضوع طوّل وفيه زغاريت نسوان.. قلنا جايز فيه فرح فى بيت العمده ولا حاجه..!! بعدها بيومين عرفنا إن البنهاوى باشا نجح فى الإنتخابات..لخامس مره ورا بعض..!! قمنا كلنا فرحنا إن ربنا نجاه ونصره على إللى عداه ..مع إن مكنش فيه حد من البلد نازل قصاده.. طب وكان لزومها أيه بقى الإنتخابات و المصاريف ع الفاضى..؟! مش كنا إحنا أولى بالفلوس دى..؟! وإلا أيه يا حضرات..؟!
-..................................؟!
- لأ..مافيش حاجة زى دى حصلت عندنا ..والحمد لله.. لكن طراطيش كلام سمعناه عن الدايره إللى جنبنا..!! لما فيه واحد تانى من الناس إللى بالك فيهم..؟! إللى دقنهم طويله ومدلدله..كان مرشح نفسه ضد كبير البلد.. وقامت عركه مبعدهاش عركه.. والدم كان فيها للركب.. والصناديق إنحرقت وإترمت فى الترعه.. وعادوا الإنتخابات من تانى..!! إنما والحق يا بيه ..فى المره التانيه ماحدش سمعلهم صوت..؟!والأمن كان مستبد والحمد لله..!!
وفجأة نظر إليهم متعجباً وكأنه يراهم لأول مره وسألهم:
- أنما أنتم مين..؟! وبتسألوا كل الأسئلة دى ليه..؟!
-................................................
- آآآآآآآآه قلتلى بقه..!! أنتوا بتوع الجرانين إللى بتيجى عند الواد أسماعين البقال.. وبيعملها قراطيس لب وفول للعيال..!! والنبى يابيه تكلمولنا ريّسكوا..يبطل يجيب الحبر المضروب بتاعه ده علشان بيهبب هدوم العيال وبيطلع كده فى الأيدين عمال على بطال و بيتبت فيها وما بيطلعش منها ولا بالطبل البلدى ..!!
- .............................................؟
- أحنا ما بنعرفش أيوتها أخبار .. إلا من إللى بيجيبوه لنا فى الراديو والتلفزيون بتاع الحج عب عال..إللى دايما بيفتحه لنا على خطاب الريس فى عيد العمال.. والناس كلها تسقف عشان المنحه..مع إننا ماحنش عمال..ولا بينوبنا منها سحتوت ولا ريال.. وسمعنا طراطيش كلام أنها اتلغت كمان..!! طب ليه يا بيه..؟! ماهى كانت بتفرج ع الموظفين الغلابه..وأكيد كانوا هيفرجوها علينا أحنا كمان..!!
-......................................
- والناس الأمريكان مالنا بيهم..؟! دول ناس ملهمش أمان ..ممكن فى أى لحظه يبيعونا زى الخرفان.. ويخدونا لحم ويرمونا عضام.. والناس بتوع الشيشان ..متشفولهم حل وتحوشوا عنهم الروس ولاد المجوس دول..!! وألا يعنى الحكايه عافيه وألا هى عافيه..؟!واليهود مش أحنا أدنالهم قبل كده علقه مكلهاش حمار ف مطلع..؟! أمال طالعين فيها ليه اليومين دول..؟! ومافيش حد عارف يكلمهم..والعالم كله بيبوس أيديهم..عشان يراضيهم..وهما راسهم وألف سيف ماهم طالعين من فلسطين..يعنى البيت بيت أبونا والغرب بيطردونا..هما يقربوا لفرحات باشا البنهاوى ولا أيه يا بيه..؟!
-.........................؟
- أنا محسوبك هنداوى.. وصابر على البلاوى ربنا يعافينا ويعافيك والكل كليله..
-....................
- أنت بتكتب أيه..؟! طب أنا أسمى مكتوب..؟!
-...!!
- طيب..!!
إمبراطورية النصب (1) حكـاوى هنــداوى
العرض العادي
