يازين بنت شفتها يابو مرزوق=وانا علي بدلتي قبل ساعه
ترمي نجوما عاليه بالسما فوق=عند الفهد تمشي بخف ولكاعه
نزلت من الباص والشعر مدفوق=شفت الجدايل واحسب انها صناعه
يمسك جدايلها على راسها طوق=وتلبس سواير مع خاتم وساعه
تمشي وتوزن خطوة الرجل في ذوق=وقامت تناظرني بنظرة دلاعه
ولحقتها جوا البقاله من الشوق=والعقل طاير والفكر في ضياعه
وقمت اتحوسن حولها غرب وشروق=ودي اغازلها بفكر وبراعه
قالت سلام وصرت بالحيل مطفوق=قالت صديق ارجوك شيل البضاعه
وجهي تقلب وانقلب كله عروق=وحلقي يبس واحترت ويش الصناعه
استغربت عيني من الزين منطوق=وتحملت ماقالت بعزم وشجاعه
قلت اطلبي وانتي على الراس من فوق=بس آمري وانا اجيلك بطاعه
قالت وربي خالق كل مخلوق=ماكان قصدي في كلامي لكاعه
كنت احسبك هندي وشغال بالسوق=وجهك يشابه لهذيك الجماعه
قلت ارحمي لو شفتي الوجه محروق=من حر شمس ولعت في شعاعه
وراسي لوشفتيه يابنت محلوق=لا لا تحسبيني من اهل المجاعه
انا موظف رافع هامتي فوق=حارس على حد الوطن في دفاعه
قالت كلامك ولع القلب بحروق=ارجوك تكفى لاتكمل وداعه
وحقك علي ان كان تطلبني حقوق=كلمه وزلت واعتبرها اشاعه
قلت انسي اللي صار يابنت مسبوق=مامن ورى كثر الشكاوي نفاعه
هاتي يدينك وارسمي رحلة الشوق=وحبل الهوى تمسكي في شراعه
وابني هرم حبا من الساس موثوق=مايهدمه اهل العذل والقطاعه
قالت كلامك صيف به غيم وبروق=مابه مطر لو شفت قوة شعاعه
وزمر لها باص النقل ياملا العوق=قالت ابمشي خل عندك مناعه
وأقفت وقلبي انتزع منه معلوق=وراسي تفجر من قوة صداعه
وركبت بجنب اللي على الطاره يسوق=واقفى يوادعني ويرفع ذراعه
راحت وانا كني على الوجه مصفوق=ماظن يافيصل بوصله شفاعه
هاذي حكاية قصتي يابو مرزوق=اللي جرت ياخوك في ظرف ساعه