تحية طيبة للجميع ..
قصيده اعجبتني وابحرت معاها واحببت ان
يبحُر بها جميع من ينتسب لهذا الصرح،،
هذا أناجيت أتظلم سيدي وأطلبك في لفت النظر=هل تنصف المظلوم من ظلم الزمان اللي وطاه
معذور لو جيت أعتذر غيري تعذر وأنعذر=ماخطيت لكن الزمان أخطى وحملني خطاه
حقٍ علي أصبر ومن صُبّر على شيء صبر=والصبر لو فيه المرارة من ملذات الحياه
على سفينة حبكم ظميان في عرض البحر=هبت عليه العاصفه ثم انتثر ماعون ماه
يبّس شفاياه الظما ولا تصبّر ما قدر=ولا شرب من البحر زاد الظما على ظماه
بين البدايه والنهايه لا إتجاه ولا مفر=يقبل ويقفي يستدير بدون وجهه وإتجاه
والموت قام إدارج التابوت لأبواب القبر=والموج غاضب والكفن منسوج بخيوط الوفاه
وحارت بعينه دمعته لوجات في صلد الحجر=ذاب الحجر كما يذوب الكحل في عين الفتاه
قطع رجاه من الحياة وبّركه حكم القدر=بارك كما يبرك بعير شال حمل ما قواه
ما هو بوده يلفظ أنفاسه ولا حوله بشر=أما صديق بيّحه وإلا ولد عمٍ بكاه
وإلا عفيفاتٍ يطرَّنّ الجيوب من القهر=هذي رمت عنها القناع وذي رمت عنها العباه
على ظهر سفينته يطوي مسافات العمر=مستوحش وحشة نبي الله يونس في دجاه
فجأه وهو ساهي خطف عينه سنا برق ظهر=يبرق على بعد المدا ويضيح في الغبّة سناه
وحنت مباكير الرعود وهب نسناس المطر=ريح المطر يطرق وريده والسحب غطت سماه
وأسقاه ربي من سحابه وأنجلى عنه الضجر=وشرب وصدّر وأرتوى وأبحر على درب النجاه
وتذكرك يا ظامر السرجوف يا ترف النحر=يا غايته ومناه في دنياه ويا شمعة هواه
أنت السفينة والبحر لا جاك علمي والخبر=أنت الظما والماء بليّا شك وبدون إشتباه
البارحة لك وأمس لك واليوم وأيام العمر=لليل ليلك والنهار يشع من خدك ظياه
يابو جديل أشقر مثل الشعاع إذا انتشر=وإلا كما نبع الغدير اللي تحدر للوطاه
يابو حجاج دارته تشبه هلال أتلى الشهر=والخشم سيف جّرده حامي السريه من خباه
والعين نجدية ترعرع في محاجرها السحر=لا سجت برموشها جرت فؤادي من عراه
خدٍ كما روض الزهر وإلا قمر خامس عشر=من استلذ بحبته حوّل على جمر الشفاه
جمر الشفاة اللي تواقد فوق وضاح الثغر=ومبسمك لا وا هني من قبلة و إلا سقاه
ياقوتة في رقدتك كنه مبللها الخمر=خمر الثمان ومن طعم خمر الثمان أدرك منَاه
والعنق عنق الجازيه لا روّحت حل العصر=لا روحت من بطن وادي وامرحت في اللي وراه
وتفاحتين بابليه في بساتين الصدر=الصدر راوي والخصر طاوي كما خصر المهاه
فخذك فخذ بكر تغض الطرف وتحب الستر=والساق تحفه عاج لا مثله ولا في مستواه
وخضاب كفك جنةٍ خضراء على ضفة نهر=وإلا جناح الطير لا فزعه حس قناصٍ رماه
هذي وصوفك يا لطيف الروح يالظبي العفر=وأنت الذي ربي على كل المزايين اصطفاه
وأنت الذي طيفك يسامرني على ضوح القمر=أوسده يمناي وأقلب صفحة الذكرى معاه
وقف ترى عمري بدونك يا بعد عمري هدر=وإلا تعال أودعك وأكتب معك لأهلي وصاه
وصاة مجنون قضى نحبه وهو يهذي شعر=يهذي بحب اللي غرس رمح المحبه في حشاه
يا سيدي حلمك علي وأنا أعتذر عن ما بدر=أصفح عن المذنب ولا تسمع دعايات الوشاه
يا ونتي ونة كسير عظم ظهره ما جبر=و إلا فول الأسحم اللي طاردينه من عشاه
وإلا حصان طمرته تعجب عيونك لا طمر=يصهل صهيل العز والطراد ما يلحق مداه
ياما عليك أجر ونّات العشايا والفجر=وأبكي كما يبكي يتيم يكسر الخاطر بكاه
هذا وأنا سيدي جيت أطلبك لفت النظر=هل تنصف المظلوم من ظلم الزمان اللي وطاه
احترامي وتقديري للجميع
وضاح