في يوم الجمعه كنت أصلي الجمعه في الحرم بعد ما أنتهت الصلاه خرجت من الحرم أبي أرجع البيت بسرعه لأن الوالده الله يسلمكم دقت على الموبايل وقالت لي أرجع البيت بسرعه علشان تلحق الغدى وأنا هذاك اليوم مافطرت وطبعا مايت من الجوع .... طولت عليكم صح
المهم السياره في الموقف ( ألي قد راح مكه يعرف أن يوم الجمعه مو يوم الجمعه وبس كل يوم في وقت الصلاه يمنع منعا باتا دخول السيارات في المنطقة المركزية الي هي المنطقه ألي حول الحرم )
المهم أستنى الباص ماجى تقريبا جلست نص ساعه لين وصل الباص طبعا يوم الجمعه زحمه طلعت الباص وجلست أخذنا نص ساعه لين وصلت الموقف من الزحمه
طلعت في السياره وشغلتها وحطيت المكيف على المتوسط وأرمي العقال والشماغ على المقعد الي جنبي وأمشي بسرعه علشان الغدى لايفوتني وقابلتني أشاره حمراء ووقفت وأتلفت يمين يسار مافي أحد وأقطع الأشاره .. أخونا في الله نسي أنهم حاطين كاميرا تصوير عند كل تقاطع المهم وأقابل أشاره ثانيه وأقطعها أما في الثانيه ذي والله كنت أبي أدعم
يوم قربت من البيت وأنا أمني نفسي في الغدى وأفكر هم تغدو ولا باقي يستونني
ألا شوي أسمع صوت من بعيد مثل صوت سيارة الأسعاف والله ماشفت ألا سيارة المرور جايه من جنبي وماشي معاي ويقولي وقف ياصاحب اللكزس وقف ياصاحب اللكزس وقف على جنب
يوم وقفت ألا هو يقولي ليه ماتوقف من اول ليه!
وأنا أرد عليه :
والله ماأنتبهت القزاز مرفوع والمكيف شغال والمسجل شغال وكيف تبيني أسمع .
قال لخويه العسكري ألي معاه سوق سيارته وأنت أطلع معاي ...
أفاااا والله ليه طيب
العسكري : أنت تعرف ليه .
أنا : والله ما أعرف شيئ طيب قولي وش فيه !
العسكري : عليك مخالفتين قطع اشاره .
انا : طيب شفتني أنت .
العسكري : لا يالحبيب الكاميرا شافتك روح المخفر وشوف الفيلم ألي سويته .
وش أسوي خلاص ماعاد أقدر انكر مدام فيه اثبات علي
أدق على جوال أخوي الكبير أبيه يجي يكفلني بس مايرد آخر شيئ أدق على البيت وترد علي الخدامه وتقول بابا م..... فين أنتا قلتلها ماما فيه قالت أيوه قلت عطيني هي
وأكلم الوالده تقولي وينك بسرعه حطينا الغدا على السفره
قالتلها تغدو وعليكم العافيه وقولي لابوي يجيني في المرور
الوالده بصوت عالي ليه خير وش سويت !
لابس قطعت الاشاره ومسكوني
الوالده : ليه طيب تقطع الاشاره هذا آخر شيئ توقعته منك يا....وتستاهل أنهم مسكوك......
المهم وأدخل على الظابط ويقول خير ياعسكري وش عندك مع الرجال
رد عليه العسكري هذا الي قطع ألشارة الي تم رصدة بالكاميرا .....
واقول في نفسي عزى الله باكلها توقيف 6 ايام
(( عندنا في السعودية قطع الأشارة فيها توقيف 3 أيام وغرامة 900 ريال))
رديت على الضابط ::
طيب العسكري شافني وأنا قاطع أشارة ؟؟
رد الضابط لا بس فيه تصوير فيديو عليك أذا كنت تبي تتفرج ماعندنا مانع نتفرج أنا وأنت سوى ....
ألا قولي وين ولي أمرك ....
رديت عليه :: أنا صرت رجال مسؤول على نفسي (( بصراحة أستفزني يوم قلي وين ولي أمرك )) ..
الضابط : الرجال يقطع الأشارة ..
أنا :: لا بس الغدا ....
الضابط :: الغدا هههههههه
أنا : أيه الغدا ... ليه وش فيها .
وأنا جالس أتجادل مع الضابط ألا دااخل أبوي وأثنان من أخواني الكبار معاه ....
قلت في نفسي الله يستر كان واااحد جى يكفي يكفلني وأخرج ...
الضابط :: لا يالحبيب أنت بتجلس عندنا ضيف لمدة 6 أيام وغرامة 1800 ريال تدفعها ولا نحجز السيارة لين تدفع الغرامة .
أنا : الغرامة مقدور عليها ... لكن وش هوله التوقيف يعني مافي أمل للخروج ..
والله لو تقولون لي أصعب مرحلة في حياتة وش هي
كان قلت لكم :: توقيف المرور.
والله الثانوية العامة أهون من عشرة المرور وياليتها 3 أيام وبس
هاذي 6 أيام ....
وهذي قصتي مع الغدا
تقبلوا فائق تقديري وأحترامي
الشكر موصول للمشرف العزيز الممدوح
العرض العادي
