السلاام عليكم >>>> ردو السلااام يالزلااايب
المهم الباارح طحت يدي على دفتر ابو اربعين وجه ووجه ولقيت المنسم كاتب بعض مواقفه وهو بلح وشلوووون اذا صلح
علشاان ماطول عليكم تعالو شوفو عزوز وش يسووووووووي بابووه
تررررررررررررررررام طخ >>> موسيقي تصويريه
عزوز ذو الستة اعوام :يايبه مابي ادرس ياخي
ابوووه : اجل ياخي الله ابو اللي انت سبهته ... كم مره قلت لك لاتقول ياخـــي والا منــيــب كفو تقول لي يبه ياثور
عزوز : طيب يبه بس مابي ادرس والله مليت من الدراسه والاستاد دايم يهزئني ويقول انك دب ونومك واجد بالفصل
ابوووه : وجع وشلون مليت وانت توك بأولى ابتدائي الله ياخذك .... ماأمداك تمل !!! وبعدين هو صادق الاستاد وانا ابوك وانت لازم تخفف وزنك والا وانا ابوك فيه طالب بأولى ابتدائي امه تصلح له فسحته سندويتش دجاجه مع الرز ....
شف عيونك الله يقطعك معاد تنشاف من هالخدود يالله اذا فتحت عيونك نلزقها بلزاق عشان توضح ....
عزوز : ياخي ياحظي والله مالقاها الا انا عندي ابو خفيف دم وينكت ماشاء الله عليه .....
ماامدا عزوز يكمل كلامه الا وابوه سافه بالتلفزيون واشوا امداه ينحاش لغرفته ولا جاه شي
ابو عزوز وفي لحظة استسلام : وش اسوي بهالولد يام عزوز ذبحني الله ياخذه ذبحـــــني
أم عزوز وهي فاطسه من الضحك وتحاول تسوي نفسها متحمسه : يابو عزوز استغفر ربك وترا ولدنا عزيز احسن العيال بس الظاهر ان هالمدرسه ماعرفوا له والا وش حليله ولدي يسمع الكلام ومؤدب والله انه اذكى من عيال اختي منيره ... مير هذوليك الله يخلف عليهم الظاهر ان روسهم مافيها الا قواطي وقراطيس
يام عزوز انا ادري ان عزوز ذكي والا ظنك هالكلام اللي يقوله كلام واحد عمره ست سنوات ؟؟ نعنبوه احيانا احس انه اكبر مني ويعرف شي مااعرفه
عزوز وهو يطل من فوق الدرج اللي بالصاله : يبه الله لايهينك رح حرك الدش مدري وش فيها قناة ال بي سي ماتطلع وياليت تكفى تقول لمرتك تجيب لي الغدا ترا حايمتن كبدي من استاد عبدالله اليوم ولا افطرت
الله ابو ابو ابو ابو ابو ابووووووووك يالسمرمدي <<< هالكلمات قالها ابوه وهو يمشي مليون بيطلع الدرج عشان يفرش عزيز اللي عــط لغرفته وقفل الباب
أم عزوز : ياعزوز وانا امك ترا مايصلح هاللكلام اللي تقوله لابوك .. وترا وأنا امك ابوك لازم تحترمه وتحسسة انه ابوك مهوب تقوله ياخي والا يابوالشباب والا تدفه وهو نازل من الدرج ترا هاللي تسويه عيب وانا امك ( وجه كله حنان أمومه )
عزيز وبكل تناحة : اقول وش عندك ياأمينة رزق وبعدين ترا اللي بيني وبين رجلتس هذا شغل رجال وماله داعي الحريم يتدخلون عشان ماتحرجون انفسكم بس
أمه : مير الشرهه علي اللي جاية احاتسيك جعلها بوجهك هاللي كنه بطن بزر والا انا اصلا غاسلتن يدي منك والظاهر اني ابوافق ابوك انه ينطلك بالاحداث الين تعقل وتصير رجال
عزوز: اشغلتونا بهالاحداث كل شوي بنوديك للأحداث واخرتها ماوراكم الا الحتسي بس يالله الله يعافيتس روحي لرجلتس تراي مشغول وعندي شريط بلاي ستيشن الدوري الاسباني ناوي العب بحسبت برشلونه
بعد صلاة العشاء وفي جو عائلي وابوعزوز وام عزوز ووالدلخ عزوز جالسين بالصاله يتفرجون على مسلسل لبناني ومنسجمين مع المسلسل
عزوز : الحين يبه الدخـــان زين
ابوه بعد مامغصه بطنه وبلع ريقه : وراه وانا ابوك وش انت ناوي عليه وجع
عزوز : لا والله سلامتك بس اسأل
امه : وانا امك الدخان مهوب زين ولايشربه الا الدشير وتراه يجيب السرطان
عزوز: شفتوا شفتوا شفتوا يوم اقولكم مابي ادرس ترا استاد عبدالله يدخن .. يعني داشر يعني انا صادق يوم قلت مابي ادرس لأني اخاف يدشرني
ابو عزوزوهو متحطم ومتحسف انه اعرس : وانا ابوك ماعليك من استاد عبدالله انت خلك بحالك وانتبه لدروسك والسنة الجايه ابنقلك لمدارس عيال خالتك الاهليه هاه وش قلت
عزوز: ايه العب علي مثل العاده ياخي وانت مابعد سددت اقساط موترك ....
ابو عزوز: اسمع عاد .. والله لو ادري انك تفكر تدخن والا تجرب الدخان اني لااذبحك واجدعك
بالزباله ...
عزوز : طيب ورا ابو استاد عبدالله ماذبحه ورماه بالزباله وهو يدخـــن
الأبو حس انه توهق ويبي يصرفها :
الا وش رايك نروح للبقاله وانا ابوك نشتري بعض الاغراض
وفي طريقهم للبقاله :
عزوز العله :الا يبه ابسألك
ابووه :هلا حبيبي اسأل وانا ابوك اسأل
عزوز وبكل سباهه : الحين اذا كبرت وابي يجيني عيال وش اسوي
ابوه : ههههههههههههههههههههههه اذا بغيت تجيب عيال لازم تتزوج وانا ابوك
عزوز: طيب وشلون يعني ؟؟ وش دخل العرس بالعيال ؟؟
ابوه : شف شف شف وانا ابوك هالخبل اللي بيقطع الاشاره الله يهديه بس <<< ابوه في محاوله يائسة لتغيير السالفه .... بلش به وسؤاله ...
عزوز: المهبول مايدري انه بيصدم ويمكن يموت <<< الحيوان يسايس ابوه
ايوه يبه ماقلت لي وش دخل الزواج بالعيال
يا عزوز كح كح ياولدي العيال مايجون الا اذا تزوج الواحد لأن الحرمه هي اللي تولد وتجيب العيال
عزوز: يعني طيب ماتموت الحرمه وهم كل شوي يشقووون بطنها عشان تولد ؟؟؟
ابوه وبكل ثقه : ههههههههههههههههه لالالالا وانا ابوك الولد مايطلع مع بطن امه
عزوز بكل سباهه بريئة : اجل من وين يطلع
ابو عزوز : الله ابو ابو ابو ابو ابوووووووووووك ياحيوان والشرهه اصلا على اللي يوديك للبقاله مير هونت ولافيه بقالات ولا شي وابيك من الحين الين نوصل البيت تنطم ولا تقول اي كلمه
وهذي اللي قدرت الطشه انتهت ..... يالله عاد .... اتحفونا بردودكم ....
عزوز : العضو عزوز
عزيز : بعد العضو عزوز
ابوه : راشد
امه : رفعه
الاستاد : الاستااذ بس بحذف النقطه
من مذكرات عــــزوز وهو صغيرررر ...
العرض العادي
