[ هرجة البن والهيل ] !

[سطآم]

أخر قصيده نظمها القلم أتمنى ترتقي للمستوى المطلوب ..

بين الدلال وبين ذيك المعاميل=دنيت من بيض الورق ما صفالي
هز الحنايا صوت رجف الفناجيل=لانه على نفسي عزيزن وغالي
وذكرت دن حجيلها والخلاخيل=لامن تهزع مشيها بالرمالي
يا قيس وإسمع هرجة البن والهيل=ومسامرة نار الحطب للدلالي
راع الهوى له مع سناها تعاليل=لا صار ما قلبه من الوجد خالي
وإسال ليال الجدي وش عقب سهيل ؟=غير الضمى وإسال عن الترف حالي
فرقا العيون الناعسات المذابيل=من خمرتن في كاس خده ثمالي
تسل حالي وأتبع الويل بالويل=وأنعى وصاله بالدموع الغوالي
وجدي عليه إنكان بالوجد تحصيل=وجد العجوز إللي جفوها العيالي
أو وجد حادي خيل قومه على الخيل=خلوه يومن جندلوه الرجالي
لا يا نديمي لا تلوم المهابيل=كود إن منهم ذاق مرّ الليالي
لا شحت إيدين الهوى بالمواصيل=يا قرب درب أهل الهوى للهبالي
وإللي قبالك مرتكي داوي الحيل=باقي على عهد الليال الخوالي
عشقن قديم مأملته المقابيل=غصونه ليان يلاعبن الشمالي
لو طالت الفرقا على ساهر الليل=عيا على صوت الجفا بالسؤالي
والسدره إللي ما جرف عرقها السيل=من عام للمتعوب فيها ظلالي
لليوم يرقب في فجوجه تساهيل=تسمح ويطويها حنين الرحالي

/ سطام الشمري /