(بسم الله الرحمن الرحيم)
هي غلطتي والا الزمن دوم غلطان ** منك العتب ؟والا العتب من زماني
أحيان أحس الحزن .. لـ أجلي وأحيان ** أقول هذا الحزن ماهو عشاني
ياليتها غربه وادوّر لي أوطان ** ياليتها دمعه وتنسى زماني
ياليتها كلمه وادوّر لي إنسان ** ياليتها ساعه واعدّ الثواني
كل العمر وأنا مع الهم خويان ** لاضاق صدره زارني وابتلاني
أكذب عليك إن قلت عايش وفرحان ** واكذب عليك ان قلت موتي كفاني
من ياخذ همومي ويعطيني إنسان ** ماجاه مثل اللي من الحزن جاني
المشكله ماهي بغلطه وندمان ** المشكله ليه الوفاء دوم فاني
صوره وملّتها من الشيل جدران ** ورده وذبلت ومن قطفني رماني
كل آدمي يفرح وتنساه الأحزان ** الا .. انا .. عمر الحزن مانساني
ماعاد باقي بالعمر كثر ماكان ** والصمت يقتل فرحتي والأماني
هات الحزن مادامها احزان بـ أحزان ** هات الحزن دام الفرح مالقاني
ياليل وين الصبح كل يوم سهران ** أسهر وحزني يحتوي كل مكاني
يابلاد عمري مابقا فيك سكان ** ويادمع عيني من بقا مابكاني
وياقسوة الأيام حنّي بـ (**** ) ** لو راح ماتلقين ( **** ) ثاني
أحيان أحس الحزن .. لـ أجلي وأحيان
العرض العادي
