عندما تأتي الغيوم وتشرق الشمس لتصلخنا تصليخ غير طبيعي(ويقولون ليه جلد السعودين كنه عكرة ضب) وعندما تتحرك الستارة من جراء ذرات الهواء التي تجعلها تتحرك وعندما يصل الهواء البارد ويدخل الى رأسي (ياعيال ترى جو السعودية خبل من جد أجل وشلون شمس تصلخ وهوا بارد) عند حصول كل هذا تأتي امي بكل رقة وبكل حنان وتقول :قم صل الفجر ياوجه العنز وانا اقول لها ان شاءالله يمه ابقوم الحين تراني محافظ على الصلاة قالت آها بس يلا قم لااترفس ببطنك<....ماناقصها الا عجرى وسلسلة وبنت البكار ونا اقول يمه المفروض انس تقوميني بهدوء ورقة ليه هذا الاسلوب الجاف؟ أشرت امي خشمها وقالت تراها واصلة معي..هذا ان ماقمت الحين أبنتف شنبك اللي كنه قذلة تيس سوري..
وانا اللي اقوم ورحت اتوضى ورحت المسجد ولالقيت ولا أحد يصلي معي وحتى الامام البنقالي من زود العجز مؤقت ساعة اذان على وقت صلاة الفجر وحاطها عند الميكرفون وقلت خل انتظر شوي الى وقت الاقامة وجلست انتظر الين دخل الامام وعيونه كلها غمص قال:ماشاءالله داشر كبير في يجي صلاة الفجر..وانا وقتها كان ودي امسكه مع برطمه وأقطه تحت تريله بس المشكلة اني بالمسجد..وقلت لايكثر..خل نصلي..وصليت انا وهو جنب بعض والشيبااان كلهم هاللي مسوين فيها بالمجالس صاكينها رقدة من عقب ماسهروا على قناة بانكوك المتحدة
.رجعت البيت والقى امي مسنترة عند الباب وتقول لي رح سو لي بيض قلت ها والخدامة ليه ماتسوي لس قالت المسيكينة هي من امس جالسه تدهن ركبتي ومانامت الا الساعة وحدة الليل قلت لها طيب انا مانمت الا الساعة ثنتين قالت اقول رح سو لي لا اجلدك فلكة ورحت اسوي البيض ويوم قربت أخلص منه جت أمي وقالت وخر بس ماتعرف تسوي وعطتني سندويشة بيض وقلت والله ياهي حلوة من يدي قالت أمي تخسى وتعقب والله ماسواها الا أنا وأنا اللي أفك فمي وأقول سويتيها يالنصااااابة(كنه يكلم واحد من العيال مهوب أمه هالحمار) قالت اقول الفقا أنا اللي مسويتها والحين انت ليه ماتقوم وتغسل وجهك الذي لايمكن الاتصال به الآن وتروح للدوام والا الظاهر انك ماتدري ان الولد النظيفوا مظهرهو ظريفوا(متأثرة بمناهج نحو الامية)
رحت غرفتي وخذت دش على الطاير<.....يعني رحت وشريت دش؟(اتحداكم تجيبون أسرع من كذا)أستثني من هذا التحدي دبة تسوي رجيم..وعقب ماخذت دش لبست ملابسي وتكشخت وطقيت شماغــي كوبرا وصرت وش زييني وألف بنت تتمناني..وطلعت من البيت ودقيت سلف السيارة ورحت الدواام بشركة الاتصالات<...شبو عليه تراه موظف بشركة الاتصالات(والله مالي دخل)
جلست على المكتب حقي وعلى فكرة ترى انا معينيني بقسم الحريم بس قسم بالله انواااع الازعاج بهالقسم والأشكال تحوم الكبد اللي وجهها كنه بعير مبوبز واللي وجهها كنه غوريلا منحاش من قفص,واللي خشمها مدري وشلون قايل كنه نفق مكه واللي برطمها كنه مقفى قرد افريقي واللي خدودها كنها ريال بجيب عجوز واللي ضروسها كنها طقم فناجيل مكسور نصها واللي عيونها كنها عيون عربجي توه طالع من هوشة (تراني أتكلم عن اللي يكشفون)اما اللي يجون متغطيات ومتسترات مالنا شغل فيهم الله يديم الستر على الجميع..
أول وحدة جتني عبده تتميلح عندي وتقول :ياخوي انا طلعت شريحة أمس ولا عرفت آركبها ..قلت لها عطيني جوالك قالت في البيت قلت اجل ليش جايه قالت هههههه امزح معك معي الجوال وخذته منها وركبت لها الشريحة واشتغل الجوال وقالت اثر الطريقة سهله قلت ايه سهله..وشوي الا اشوف البنت جت وجلست جنبي وتقول وشلون ركبتها علمني قلت لو سمحتي روحي واجلسي على الكرسي المخصص لجلوس العملاء انتي وذالريحة هاللي كنها فم صعيدي ماكل درزن بصل..قالت ليه اجلس هناك انا ابي اتعلم طريقة تركيب الشريحة قلت لها لايكثر واذلفي بس واجلسي على الكرسي لا أفقع عيونس يالطقاقة(هيه انت وشفيك شكلك بايعها والا الظاهر ماتدري ان اللي قدامك خالة يعني ان طرطعت والله ان تخلي جن الرياض كله يدخل فيك) وراحت البنت وجلست قلت لها هاه وش تبين هالحين اخلصي قالت شف ثوبك فيه وصخ ..نزلت راسي ادور الوصخ ولا لقيت وصخ قلت تستهبلي انتي! قالت ههههه واحد صفر..وانا اللي اصوت على السكرتي الخال وطلعها برى عقب مارقمها (ان شاءالله يقتمعو راسين بالحلال ويبئو زي العصافير<...الشرهة على اللي علمك تدعي..
جلست في المكتب وافتح الانترنت على الاقلاع والقى لي موضوع لدعلج ونا اللي ادق على هندي البوفية واقول يلا سرعه ..جيب شاهي قال الهندي أكيد انتا في يفتح اقلاع عشان كذا يبغى شاهي قلت آها بس ..يلا جيب الشاهي وكثر السكر قال ان شاءالله انا في كثر سكر ياسكر..وجاب لي الشاهي وانا اللي اتكي واقرى الموضوع وأجلس أضحك وشوي الا خويي اللي بالمكتب الثاني راسل لي مسج يقول قصر صوتك فضحتنا ..المشتركين يضحكون على ضحكك..ويومني وصلت نص الموضوع ..ويقطع قرائتي صوت جميل عذب كصوت العصافير المغردة وصوت رقيق هش قائلا" :السلام عليكم والتفت ولقيت وجه وش زيينه غير كل البنات اللي جو..وجهها كالزبدة في نعومته وكالقشطة في بياضه ولابسه جنز وفنيله..وكوعها أبيض وعرفت انها مهيب سعودية قالت بكل نعومه أنا سورية بس عايشه بالسعودية ومتأثره بلهجتكم(احد اسالس انتي وكوعس الابيض) قلت لها سمي آمري انتي وبس.قالت انا جايه ابي اطلع شريحة جديدة قلت ونا العرق يصب من جبهتي كنه شلال(كني شفت شلال عاد أنا وجهي) وقمت سكرت موضوع دعلج وفتحت برنامج الشرائح..وقلت تبين شريحة مفتوحة والا بطاقة سوا؟ قالت لاوالله ابي شريحة مفتوحة قلت لها ممكن الاقامة لوسمحتي جت البنت وشالت الكرسي اللي جالسه عليه وجلست جنبي وأنا العرق يصب من كل مكان في وجهي حتى مع اذني وقالت والله الاقامة في البيت ياخوي ممكن تطلعها باسمك؟؟ قلت لها ان شاءالله ولو تبين بطاقتي الثنتين ماتغلا عليك..بس عطيني المبلغ وعطتني الفلوس وطلعت لها الرقم وقلت ابطلع لس رقم مميز لاراح ولا جا..وعطيتها الشريحة وقلت لها عندس جهاز ؟ قالت ايه عندي وعطتني الجوال وركبت لها الشريحة وقالت ممكن تخزن رقمك عندي؟ قلت أبشري وخزنت رقمي بجوالها باسم وائل (مستحي يكتب شليويح) وقالت خزن رقمي عندك باسم سوسن راحت ونا على طوووول خزنت رقمها بجوالي
وأرسلت لها رسالة :-
حبيتس من أول نظره
أفكر فيس بكل طمره
يازين ريحة فنيلتس الحمره
ياليت طول حياتي ماتصيرين سمره
المرسل:-
وائــــل
9655xxxxxx+
خلص الدوام ونا طول وقتي افكر بهالبنت حتى موضوع دعلج ماكمتله ورجت البيت وتغديت حتى أمي لاحظت اني أفكر وطول الوقت سرحان وطول يومي اقرى كتب عن الحب والزواج <...يقال لي الحين رومنسي..
جلست في البيت طفشان والطفش لاعب فيني لعب وجتني فكره جهنمية وهي اني أروح منفوحة بحارتنا القديمة (لاوالله ذهين ماشاءالله عليك) دخلت عليهم وكل قام يرحب فيني وجلست اسولف مع اخوياي القدامى واتطمن على احوالهم لقيتهم كلهم داجين وشهاداتهم لافينها في حزم بصل..شربت قليلا من الشاي الحالي ذو السكر الكثير(ياخوي طس مناك طس) وعلمتهم سالفتي مع البنت سوسن وعلمتهم اني طحت بالحب وتعلقت فيها .. وكل قام يذب علي اللي يقول انت وجهك وجه بنات ياخوي انت حدك تشبك تكروني يبيع فستق واللي يقول وجهك كنه قطو ضاربه شوط واللي يقول انت وخشمك اللي تقول صدام كابرس ماسك خط الخدمه واللي يقول جايب سكروب يبي يوزن خشمي المايل هاللي كنه برج بيزا واللي يقول لو تحط جبهتك سبورة بمدرسة باحد الهجر أبرك لك واللي يقول وش هالاذاني أول مرة أشوف اذن ماتشبه اختها..يعني الزبدة انهم جرحوا مشاعري وحطموني وخلوني أطلع وانا حزين وأنشد: لن يخفف الذي حصل من عزيمتي بالحب ..لاكن ابحاول وانشاءالله أنجح بهالتجربة وأنا متأكد اني بنجح بأذن الله<..... وتلومهم يومهم يذبون عليك يالمتنبي..
من أول خفقة بصدري
وأنا فيك أرسم الأحلام
من أول طاري الأشواق
وأنت أول اطيااااااافي
المرسل:-
سوسن
9655xxxxxx+
(هيه انتم وش تبون بالرقم تناظرون ترى هذي من محارمنا)<...تحسون انه مستعجل على الزواج
استمرت العلاقة بيني وبين سوسن .وجاء يوم من الايام وجتني رسالة على صندوق بريدي واثره فاتورة سوسن لأن جوالها باسمي..ودقيت على سوسن وقلت لها يلا تعالي الحين بالمكتب وسددي جوالك تراني متحمس يالحمرا العطرا (أمحق اسلوب ) انتظرتها حول الساعة الين جت وهي اللي جايه وتصيح واقوم واقول وراس تصيحيين..قالت تعبانه ياوائــل قلت ياجعل اللي فيس فيني بس علميني وش فيس ..قالت اخوي الصغير سرق كل فلوسي حرام عليه ..قلت الله يعوضس ان شاءالله قالت والفاتورة من يسددها قلت انا لس ياعمري وانتي لي بعد ونا مستعد أجي واخطبس الحين من اهلس قالت يسلمووو حبيبي بس مو هلأ تجي تخطبني لاكملت دراستي ونا موافقة من الحين .. وراحت وسددت فاتورتها بكل شفاحه ودلاخه من شخصي الكريم <..ماودك تاكل تبن...عقب يومين دق علي خويي وهو اللي يبشرني ان فيه وظيفة اطلق من وظيفتي الحين وراتبها أكثر ..والوظيفة في احدى الشركات الأهلية ونا بدون شعور قدمت استقالتي وقدمت ملفي بهالشركة واقبلوني هناااك...ودقيت على سوسن عمري أبشرها وهي اللي تصيح وتقول ليه طلعت من وظيفتك بالاتصالات قلت أبد راتب عالي يفيدنا في زواجنا وراحة أكثر ..قالت طيب ياوائل ما ودك تقابلني عند مطعم الشلال ؟ قلت لها غريبة انتي اللي تطلبين موعد قالت لاوالله مشتاقة لك ولخشتك قلت طيب الساعة ست حلو ؟ قالت حلو ..وتكشخت ورحت هناك ولقيتها جنب معلم الشاورما وتكلم وتأشر علي وتصيح وتقول :_
x
x
x
x
x
x
x
x
x
x
x
x
x
x
x
x
x
x
x
هذا ياخوي اسمه وائـــل ودايم يزعجني ويتحرش فيني بالتلفون وجاني اخوها معلم شاورما وعيونه تطلع منها شرار ومعه عقال (من بدو سوريا)وجلدني جلد الين عضيت الأرض وندمت على وقتي اللي ضيعته معها..
مايستفاد من الموضوع :_
1_ صلاة الفجر حافظوا عليها
2- المفروض من البنات مايسوون مثل سوسن والمفروض ان الموظف يتحكم بمشاعره .( الى المنتدى الادبي)
3-تدليع الشغالات قد يؤدي الى عواقب وخيمة مثل ماسوت امي (مدلعين شغالتهم وكل يوم يشترون لها كرتون اندمــــي)
وهناك بعض الفوائــد التي يستنبطها القاريء من خلال قرائته) ويلومني بحبك يا خلفهم عقب هالجملة )
ملحوظة :-
تراني مانيب موظف بالاتصالات يعني القصة نصبة يعني لاأحد يجي يشب علي ويهاوشني والايجيني واحد ويقول طلع لي رقم مميز..
العرض العادي
