يا وجــودي كل ما هبّ نسـناس الشمال
وجد من حدّه زمانه على اللي ما يبـــيه
و يا وجودي كلما اضحيت ثم مال الظلال
لا غفت عيني و لا ذقـــت شي ٍ مشتهيه
وجد من قفّى و هْو في رجا كلمة تــعال
و إلتفت من عقب ماْ اقفى ولا حد ٍ لدّ فيه
و يا عذابي لا دنا الليل من روس الجبال
وانتهى يوم ٍ من العــمر ما عــاد أرتجيه
و انتي أبعد من سما الحلم ووصالك محال
يا بعد من هلّ دمــعي ضحى الفرقا عليه
يا غناتي لا تحســبين دمعــي يوم ســال
ضعف و لاّ خــوف و لاّ كـذا و لاّ كــذيه
و الله إنـي من رجال ٍ يضـــدّون الرجال
لكن الحظ ّالردي ســــاق دمعي كل أبيه
و الله إني كــلما دار حوليــك الجـــدال
قمت كنّ الموت يشّر على قبــرى بيديه
و الله ان قد لي و انا اصّد لاجالك مجال
صــدّة اللي لا تضايق تذكّــــر قبر أخيه
ومن سألني قلت مدري وإذاعاد السؤال
قلت له تكفــى سؤالك ترى ما هو وجيه
وش تبيني اقول عن من ترى ذبحي حلال ؟
و الخطا منها عليّ صرت أحبه و أهتويه
عذرها لو ماْ تْعــذّر مثل و اضـــرب مثال
واحــد ٍ ما يعرف الحرّ الاشقر يشـــتويه
وان رجــــعنا للتواصــــيف لله الكــــمال
لا انتهى ليل المزايـــــين جاتك تبــتديه
كنّها غفل ٍ مع البدو طاويــــها الحيال
ما يمـــيّز وصفها إلا نـبيه ٍ من نـبيه
وآ هني اللي وصلها و ذاق من الزلال
رشــفة مع غفلة الناس من فيها لفــيه
ياْ اول أحلام الطفوله على حــد ّالخيال
الرجى باللي حمى البيت من حملة بريه
حال دونك سيف عنتر و تاسع حول حال
باْثر حول ٍ حال دونك و انا ادعى هيه هيه
هيه ياللي غرّك الحسن و اطغاك الجمال
و الله أني اموت ما شفت لأوصافك شبيه
لو يسام الحسن و التيه بجــــنيه و ريال
ما بقى في سوق غيرك ريال و لا جنــيه
كيف أهدّك للمقــادير و انتي راس مال؟
راس مال و مال و المال ماْ يعطى السفيه
حافظك حفظي لعيني و رمشي لك جلال
و انتي تْشـــحّين بالما و انا شفّــي مويه
شايف ٍ ظلمك و ساكت و طال الليل طال
لا نويتي طعـــن قلبي و انا ما قلت ليــــه
لو بقى للهيل صبر ٍ على فــــوح الدلال
ما بقى للقــــــــلب صبرٍ على شي ٍ يجـيه
و انتي تْسوقين عقلي على حدّ الهبال
تحسبين ان من بغى شي يقدر يشـــتريه
و لاّ انا يا وجد حالي وجود ٍ ما يقال
وجد من ضحّـــى بغاليه لْرضــا والديه
و يا وجودي بأول العمر قبل ألبس عقال
وجد من باع آخر العمر في رغبـة ذويه
و يا وجودي كل ما هبّ صوتك من شمال
وجد من حدّه زمانه على اللي ما يبيــه
ضيدان بن قضعان
العرض العادي
