يا الله تفرج هم قلب ترجاك = يا واحدٍ كل المخاليق ترجيك
يضيق صدري واذرف الدمع سفاك = يا عين يكفي كثرة الدمع تعميك
ياعين ما فاد البكا كفي بكاك = ما احدٍ درى عنك ولا قال وشفيك
لك عام وجروحك تجدد وتصلاك = توقد لهيب وسط قلبك وتكويك
يكفيني اللي صار ما اقدر بلياك = يا عين بالله ارحمي قلب راعيك
انسي ترى النسيان هو قمة دواك = لا تذكرين ايام حزنك وماضيك
عيشي مع الواقع وشوفي لدنياك = صورة جديدة تبتسم بين اياديك
واقول انا للقلب يكفيك ما جاك = حزنك خفي ما يندرى وش بقى فيك
أحس انا في داخلك مثل الاشواك = بالهون تدمي جرحك اللي مكن فيك
يا قلب وسطك علة ما تعداك = بين الضلوع وباقية دايم فيك
تكتم همومك عن هذولا وذولاك = ويلعب بك الهوجاس والهم يطويك
ما به صديق تشتكي له ويفداك = ويخفف احزانك وبالروح يفديك
يدكني وسط المعاليق دكاك = ولا من ذكرته صاب قلبي دواكيك
وختامها يا مدبر الكون بافلاك = افرج هموم ضاقت بصدر راجيك
العرض الشجري
