اول شي احب الفت نظركم الى ان هذي القصص حقيقية وماهيب خرابيط من راسي يعني واقعية بس قبل لا يبدأ الرمي وطلق النار حبيت اوضح لكم معنى الهاكر الصحيح .
الهاكر : اولا كتابة الاسم بالشكل هذا غلط والصحيح هو الخاكر لان الهاكر هو نفسه اللي سوى البرامج وتعب فيه .
واحد مسوي نفسة هكر ، قال للضحية في احد برامج الدردشة والله لا ادخل جهازك هالحين ، ورد الثاني بالتحدي ، المهم صاحبنا الاول قاله انا في جهازك هالحين وش ذي الخلفية الزينة سيارة مكسيما مره وحدة ، المهم وافقت صدفة ان الخلفية صحيحة قام صاحبنا المسكين ((الضحية )) وقع الاتصال بالنت وطفى الجهاز بكبرة .
ياكثر اللي يسوون فيها مخترقين وفاهمين ، واحد منهم سوا لي فيها قال للضحية والله لا ارسل لك الحين فيروز (( فيروس )) يدمر جهازك المهم خوينا ضحك وقاله يرحم والديك ارسل فيروز واذا ما عليك كلافة ارسل معها اغنية حبيتك بالصيف .
واحد اخترق من جد جهاز الثاني وكتب له في رسالة فورية وش رايك العب في جهازك قال الضحية ببرود اصبر شوي ، عاد المخترق خاف وارتاع ان الضحية فاهم ويبي يجيب خبرة نحاش ونسى حتى نعاله في جهاز الرجال .
واحد اخر اخترق جهاز واحد والمضحك انه يوم خذ لقطة للشاشة لقى الضحية هو الاخر مخترق جهاز واحد ،، ومافيه حد احسن من حد
واحد دخل جهاز طيب كله برامج وملفات وصور ويوم خذ لفة حب يرسل رسالة شكر واعجاب للضحية والمضحك ان الضحية رد عليه وقاله انا دايم ادخل من الساعة كذا الى كذا واتمنى نتقابل وفرصة سعيدة .
الهكر منهبلين على برنامج السب سفن ، قام واحد على نياته لاله ولا عليه ونزل البرنامج من موقع وفتحة كله بالباتشات والتروجانات اللي فيه وصار جهازه مثل الحديقة يدخلها كل من هب ودب .
وهذي نصيحة لاتستعمل البرنامج اذا ما تعرفله ولا بتضيع .
واحد اخترق جهاز وكتب رسالة يبي يعلم الضحية انه جهازة فيه منافذ وسهل اختراقة رد عليه الضحية وقال : هلا راشد وينك ، انهبل خوينا وسأله من راشد ، رد عليه مهوب انت راشد ؟ هذا واحد يوميا طاق خيمة في جهازي وتعرفت عليه .
واحد دخل جهاز شخص ثاني ولقى المسكين يدهر في موقع يوضح طريقة الحماية من الهاكر ، وصاحبنا المخترق ماقصر انتظره الين خلص وقال له : هاه بشر عساك استفدت؟؟
واحد يدهر في جهازه ويضيف خلفيات ويعدل المهم زعق اللوك داون وانهبل اخينا وعلى طول عطاه امر ايقاف التشغيل وقام يلعن في الهاكر والمضحك انه ما كان متصل بالنت ولا له نية يتصل .
واحد فتح برنامج الهاكاتاك وشغل البرنامج والمعروف ان البرنامج فيه خانه يطله فيها رقم الاي بي للشخص نفسة ، قام اخينا وقص رقمه ولصقه في خانة الاتصال وماصدق خبر يوم شبك معه ودخل على جهازه بدون ما يدري ومن الفرحة قام يدهر ويقلب الشاشة ويفتح المستندات ويحسب نفسة في جهاز الضحية ولا عنده خبر انه يلعب في جهازة الا يوم عطاه امر اطفاء الجهاز وقبس جهازه على طول .
العرض العادي
