يعيـن الله يادنيـا تسـوق ايامـهـا الاحــزان=يعيـن الله وانتـي مثـل قفـل ضـاع مفتاحـه
يعين الله وجروحي لهـا فـي كـل وقـت شـان=كذوب اللي يقـول ان الزمـن بيـداوي جراحـه
سقى الله يوم انا يمـه غريـر يزعـج الجيـران=سقى الله يوما انا طفل يصـج البيـت بصياحـه
سقى الله يوم كان اقصى طموحي...لعبـة الدنـان=نهاية يومي المغرب....واخاف الليل.... واشباحه
سقى الله يوم انا البس بشت ابوي وثوبه القيطان=واقلد كل شي فيه.. حكي.... وجد.........ومزاحه
واشيل المسبحه مثله ليا هوجس وهـو سرحـان=يفكر واحسب ان اللـي عطـاه الفكـر مسباحـه
سقى الله بيتنـا ذاك البسيـط ومدهـل الضيفـان=شجـاع يهـزم الغـدارء بقنديلـه ومصبـاحـه
تكحلنا القناعـه لاطمـع... لاهـم ...لا حرمـان=واذا جاء الليـل تكفينـا ثـلاث اخـوان طراحـه
جميع الذكريات اللي غـدت فـي قفـرة النسيـان=تحاكي حلوهاا عبـره وبمـوق العيـن سباحـه
خذتني غربة عنوانها...... غربـه بـلا عنـوان=ابي عقب التعب راحـه ولكـن تصعـب الراحـه
رجعت اليوم مثل اللي رجع عقب القنص خسـران=غدا طيره وجاء.. يسحب سلوقيه وملواحـه ....
قصيده مابعـد مـرت ببـال مساعـد وضيـدان=هواجيس ابدوي هيمـان يعشـق عيـن فلاحـه
وروح(ن) تايبه كانـت تبـي لذنوبهـا غفـران=خطاي انـي كتمـت اسرارهـا بعيـون بواحـه
تقوليـن المطـر ماهـوب يمـه دايـم هـتـان=اجل معذور قلب فـي همومـه ضاعـت افراحـه
انا يمـه غلطـت ولانـي اول واحـدن غلطـان=ابونا ادم مـن الجنـه خـرج باسبـاب تفاحـه
انا مليت مـن كثـر الجفـا والهـم والحرمـان=وش الدبره؟ وحظي صار قفـل ضـاع مفتاحـه
(قصيده مابعـد مـرت ببـال مساعـد وضيـدان)
العرض العادي
