الحياه الأليمه في سكن طالبات جامعة الملك سعود؟؟؟؟

[نجمة الود]

الحياه في سكن طالبات سكن جامعة الملك سعود.....

أحطيكم علما بالبدايه ان المديره مصريه الجنسيه اسمها(عفاف الحمودي)...



***هناك بعض القوانين التعسفية في السكن التي يجب النظر فيها أو حتى تغييرها ،والقوانين هي:
1. ممنوع الطبخ (يزعم إنهم خايفين علينا من الحرايق) وتدرون برمضان وش عملوا ...خذوا القدور منا (كل هذا خوف وحرص علينا).. لااااااا وأزيدكم من الشعر بيت ،مانعين السوق اللي بالسكن يجيبوا لنا لحم ودجاج وأرز والكوسا ...تدرون على إيش عايشين (أندومي وجبنة وتونة) وتدرون إن الأسعار مدبلة في السوق يعني ممكن في اليوم نصرف أكثر من 80 ريال وعلى هالموال كل يوم ، وإذا قربت الإجازة يحاولون قد مايقدرون بس يبون يتخلصون من الأغراض اللي عندهم وإذا طلبنا شي يقولون بعد الإجازة ......

2. ممنوع منعا باتا لبس البنطلون (فعند مسك الطالبة متلبسة بالجرم المشهود تأخذ منها بأسلوب أقذر من القذر وممكن تقولك يالله بسرعه إفسخيه وجيبيه وهي قرفانه وواصله حدها قرف منك... وللأسف إن كل رآس ماله بنطلون لاراح ولاجا لكنه يقدر يخليك تكتبين تعهد ( ويال الفشلة يوم تكتبين السبب بنطلون) ويقولون لك بنرجعه ويوم تجين تطلبينه إذا طلعتي إجازة يقولون لك وزعناها على الفقراء كما يدعون)
3. وبعد التعهد لأي جريمة إرتكبتيها مثل جوال كاميرا أو بنطلون أو بلوزة بربع كم أو لبستي العباية داخل السكن تقوم أي مشرفة بالأتصال على أهلك أو حتى مدير السكن نفسه ويبدأ نسج القصص الخيالية القذرة التي لا تدرين إلا وأنتي البطلة فيها (البنت التي لم تربى) في نظرهم...ولولا ثقة أهلك فيك لأصبحتي في عداد الأموات في لحظة حمية من الأهل...
4. والآن قانون إقرار الزيارة وهو كالتالي:
*يحق للطالبة أربع زائرات فقط طوال مدة بقائها في السكن (واللي نسيتيه لايحرج نفسه ويجي) ويجب موافقة ولي الأمر الرسمية وليست الشفهية وختم من جهة حكومية (حتى الأم الأم يااانااااااس لازم لها إقرار زيارة).
*أوقات الزيارة يوم الإثنين من الساعة الرابعة إلى الساعة السابعة مساء ، ويوم الخميس من الساعة العاشرة صباحا حتى السابعة مساء ولكن تجلس الزائرة ساعتين فقط لا أكثر وعند تعدي الوقت يقومون بمناداة الزائرة بالمكرفون ويقولون(زائرة الطالبة...... الحضور للإشراف لإنتهاء وقت الزيارة) أمام البنات كلهم يعني ماتسوى عليها هالزيارة (بصراحه قمة الإهانة).
*عند حضور الزائرة يجب أن تحضر معها بطاقة العائلة الأصلية مع صورة لها ،فإذا لم تحضر لا تدخل السكن وبالطبع مع بعض المقبلات الحلوة من تهزيء وإحراج للزائرة و للطالبة وممكن توصل للطبق الرئيسي ( الطــــرد ) للزائرة دون مراعاة لعمر الزائرة (ماشاء الله عليهم يقومون بالواجب وأكثر).
*يجب أن تكون الزائرة من الأقارب (والله حااااالة) وياويلك لو جت صديقتك تزورك ( كأنك مدخله ولد للسكن مو بنت).
5. ممنوع منعا باتا الطلب من المطاعم الخارجية( هههههه خايفين علينا من التسمم) (والله لا يذوقكم أكل المطعم المقرف ولا يوريكم اللي نلقاه في الأكل من النظافة الزايدة طبعا...)
*مع ملاحظة : أن المطعم للغداء يفتح من 12-3 عصرا واللي يرجع من الجامعه بعد الثالثة الله لايهينه يأكل هوا ويسكت ... والعشاء من 6 –9 يعني صار عصرية مو عشاء واللي يقعد من النوم بعد التاسعة( بعد ماجاء الساعه الخامسة من دوامه) يتحمل غلطته لأنه ماراح يأكل اليوم ولا راح بعد يلحق على السوق اللي تقريبا فاضي لا وبعد كاشخ يقفل الساعة التاسعة والنصف...
6. ممنوع منعا باتا الوكالة النسائية يعني حتى أمي لو تنتحر عند الباب ماتقدر تطلعني .
7. لإدخال الكمبيوتر المحمول لازم تصريح من الجامعة إن عندي مادة حاسب أدرسها وسالفه طويله عريضة لا بعد حتى الطابعة لازم بتصريح لحالها ( صارت بطاقة أحوال مو تصريح) (وإذا دخلتي الكمبيوتر بالخش ولقووووه معاك.... غنيله بودعك يالضنا ) فيه أحد ياعالم الـــــيوم ماعنده كمبيوتر؟؟!!!
8. ممنوع منعا باتا لبس العباءة داخل السكن (أبي أعرف لييييييييه) اللي تلبس عباية كنها مو لابسه شي الله يستر علينا...
9. ممنوع التمشي بالبجامة داخل السكن (إحزرو لييييييييييييييه؟؟؟؟) لأن قصدك ياشاطرة في هذي اللحظة تغرين البنات يعني كنك الراقصة فلانه وإلا العارضة فلانه....
10. ممنوع تعزمين أحد على غرفتك وإذا رزقك ربي وجتك وجبة من وكيلك لازم تكون على قدك وإلا ماتدخل وإن حبيتي أحد يشاركك فيها ترااااااااااااك أكلتي هوااااااا.....
11. وإذا كنتي على وشك تخرج ماله داعي تحتفلين وإن حاولتي تحتفلين تأكدي إنك ماراح تكملين ثاني يوم يعني بتكونين مطروووووووووووووودة
12. وإذا إنمرضتي كولي بندول وإسكتي.... لأن دكتورة العيادة قصدي البيطرية اللي في السكن راح تشخص حالتك على طوووول حــــــالة نفسية...هذا مع بعض التطمين بقليل من الإستهزاء والتريقة...ويمكن تقولك خوذي الدوا اللي تبينه..!!!! ولو تموتين قدامها ماتعطيك عذر طبي...
13. يحق للطالبة القعدة على الإنترنت ساعة واحدة في اليوم وموأي موقع تفتحينه حتى المسنجر ياويلك وياسواد ليلك إذا جت المشرفة ولقتك فاتحته ،وتدرون كم جهاز كمبيوتر لإستخدام الإنترنت 5 بعين العدو (ماشاء الله ترى مرررررة كثييييييييييييير5كمبيوترات لـ700 طالبة) ومرة صارت هوشة بين البنات وصلت للضرب بسبب إن وحدة زودت على ساعتها خمس دقائق فقط
14. هناك دورات كمبيوتر(إدخال بيانات والمايكروسوفت والفوتوشوب)ودورة لغة انجليزية ودورة تجميل والدورة الوحدة بـ150 ريال والشهادة موثقة من الجامعة نفسها (في هذي الله يعطيهم العافية)بس المشكلة وييييييين :
*الكمبيوترات أغلبيتها خربانه (10 بعين العدو خربانة) (بس زيادة عدد) ومن عصر جدي.
*الشهادات إحلمي يطلعونها أول ماتخلصين أوبعدها بترم لا ااااااا .....
تدرون متى ،بعد مايطلعون روحك عليها وتملين وتفقدين الأمل إنك تاخذينه (لا وكاشخين حاطين في الشهادة "سكن طالبات جامعة الملك سعود"يبون يعلمون اللي وظفوك إنك من السكن) وفيه ناس تخرجت وماخذت شهاداتها...
15. يحق للمشرفة أوالمديرة بجرحك أوإحراجك بأي كلمة تريد وإنتي افتحي فمك بكلمة وشوفي وش يصيرلك .
16. ممنوع منعا باتا باتا جلب الأجهزة الكهربائية مثل (المايكرويف والفرن والخلاطة والمدفأة بأنواعها حتى توصيلة الكهرب)
ملاحظة : ترى موحاطين ولا شي من الأجهزة المذكورة بس حاطين ثلاجة (بعض الغرف مافيها) وعينين كهرب للطبخ عليهن.
17. إذا كنت تبين تسوين حفلة لك أو لأحد من البنات لازم تتبعين الأنظمة التالية :
*لازم تقولين للمشرفة قبل ما تسوين الحفلة أو حتى قبل ماتعزمين أحد (عشان ماتحرجين نفسك لورفضت المشرفة )
*لازم يكون عدد البنات في الحفلة مايتعدى السبعة (يعني بس بنات المبنى الواحد)"أقول أحسن تحتفلين لحالك بغرفتك"
*لاتحاولين تجيبين كيكة لأنه ممنوع (حفلة من غير كيكة عادي تصير في السكن)!!!!
*مايكون فيه ملابس ممنوعة،مثل( البنطلون )
*مايكون صوت المسجل عالي ولو مايكون فيه مسجل أحسن (يعني وقفت على المسجل إذا مانعين الكيكة )
يعني إذا بتتبعين أنظمة السكن في الحفلات ،إجلسي إنتي والبنات بدون صوت بس ناظروا لبعض ولو تجلس كل وحدة لحالها أحسن (عاااااادي مايحتاج يجتمعن البنات )

.... ومــــاخفي كـــــــــــــــان أعظم.......
.... الحياه الأليمه مستمره في سكن الطالبات إلى مالا نهايه.....




مــــنــــقـــــــــوووول

[نجمة الود]

...وللـــــــحديث بقــــــــــيه.....




نجمه***

[~¤§¦ريشة إحساس¦§¤~]

والله فعــــــلا مأساة هذا السكن أقصد السجن ..

وفيه بعض الملاحظات مالها لزوم ويقدرون عليها ..

أول شيء

ليش المديرة مصرية ,,,

فيه آلاف مؤلفة من بنات البلد متخرجات من نفس الجامعة ومحتاجة لهذه الوظيفة عشان تصرف على نفسها وعلى أهلها ..

فالمواطنة أولى ثم أولى ثم أولى وأحق بوظيفة في بلدها سواء حكومية او قطاع خاص

ويتشدقون بالسعودة الي نسمع بها ولا نشوفها

ثانيا

هالملايين كل سنة وين تروحون ليش مايعدلون كمبيوتراتهم المتهالكة ويزيدونها

يعني الطالبات ماشاء الله أكثر منهن مافيه خمسة وخميسة في عين العدو ..

والناس الحين تطورت مثلا في جامعة الامارات ما يعرفون لشيء اسمه ورق او كمبيوتر مكتبي

كل وحدة متأبطة كمبيوترها الشخصي والمحمول وهذا شيء الزامي ..

يعني متطورين أكثر منا

ومشكلتنا نطالب بالحكومة الالكترونية ,,

وين تصير عندنا تقنية وحكومة الكترونية وبعض العقليات المتخلفة والمتحرجة والأميين في عالم تقنية المعلومات يحاربون كل شيء حديث ومتطور بحجة ان هذا الشيء ماله داعي

صدق الله تعالى " وكذبوا بمالم يحيطوا بعلمه " فالناس أعداء ما جهلوا

نجمة الود

هذا اللي في بالي ...

وقد تكون لي عودة اذا تذكرت اي شيء

[أسيرة الود]

حسبي الله ونعم الوكيل


ياناس والله سجن ماهو سكن


الله يعينكم ويساعدكم يارب


الى متى هذا التخلف لاحول ولاقوة الابالله

[الــيزيـــد]

في بيتك ومع أهلك هل تختلف الحياه عن السكن الجامعي

[عيونكـ غرامي]

حسبي الله ونعم الوكيل


ياناس والله سجن ماهو سكن


الله يعينكم ويساعدكم يارب


الى متى هذا التخلف لاحول ولاقوة الابالله

[عازف الحروف]

الله يقويهم فيكم بكل صراحة هناك بعض الطالبات مايستحون على وجيههم

ياطالبات إذا قدكم في بيت اهلكم فسوو الي تبون هذا سكن جامعي حتا الشباب في جامعة الملك سعود نفس الحال ولاكن هناك قوانيين نمشي عليها


عازف الحروف

[أسـيــ الحزن ـــر]

لا حول ولا قوة الا بالله

هذا سجن مو سكن




*يحق للطالبة أربع زائرات فقط طوال مدة بقائها في السكن


ليش وش مسويه هي جريمة قتل 4 زيارات طول مدة دراستها

موافقة ولي الأمر الرسمية وليست الشفهية وختم من جهة حكومية (حتى الأم الأم يااانااااااس لازم لها إقرار زيارة).


ولا فوق هذا بعد

موافقه وختم من جهه حكوميه يعني على بال ما الأم تبي تزور بنتها

بتقعد لها شهر لين تنختم هالموافقه



والباقي اعظم و امر




ما اقول الا الله يعينهن ويصبرهن على ذا السجن



اخوكم

أسيــــ الحزن ـــــر

[نجمة الود]

اشكركم جميعااااا على المرور....... ومثل ماقلت لكم ((وماخفي كان اعظم))