من خبري بالامتحانات وهاذي حالتنا يوم الجمعه ليلة الاختبار يبدأ الموال السنوي وكالعادة
دحيم جبلي هندسة تكفى ..
ليه وين الهندسة الي شريتها لتس أول السنة ..
ياخي ضاعت ماعاد بقى معي غير هالمثلث
اقول يختي روحي دوريها في الدروج وجمعي بقاياها منيب شاري انا ماغير ااشتري وانتم تضيعون
ياخي والله مهوب انا الي ضيعتها مدري ماعاد لقيتها في شنطتي ..
هيه لاتنسوني وانا ابي قلم أزرق .. وأنا بعد ابي قلم رصاص ومساحه.. وأنااااا ابي عصير للفسحه ( هذا عاد طلب حصيص ألزم ماعليها بطنها )..
تنط عاد امي دايما في أخر السالفه جب خبز للصبح.
وفي تمام الساعة العاشرة.. والنصف يبرطم دحيم ويضف وجهه يجيب الطلبات
عاد تصحصح الدايخة نوير في تالي اليل تراني يادحيم مافهمت بعض الأشياء في الرياضيات
طبعا دحيم الولد الوحيد الموجود بالبيت وهو الوحيد الي داخل علمي >> عاد محد قاله يصير ذكي في بيت فيه مجموعه من الدلوخة
امشي يالكمخة وش الي مافهمتيه ايه الي مافهمته هالدرس وهالدرس وذا المسألة و.......اقول انطمي ويصمخهاااا طع ططع طع توك تصحصحين يالكمخه <<<<< طبعا هي ماستوعبت ليه تكفخت :
طبعا يشرح دحيم والا مايشرح كله واحد القفل الي في راسها ماينفتح الا بشاكوش <<<< حتى شاكوش اشك في جودته
اصبحنا الصبح والزم ماعلينا قلامتنا والشنطة تكون فلته ويتسلط تضبيط الشعر والتكشخ والنظافة في الامتحانات
رجعنا من الاختبار
تجي امي هااااااااااه بشروا عساكم عرفتوا تحلون
طبعا الاجابه دايما اووه يمه تمام
صكينها نومه الييييين المغرب يقالكم تعبانين من الدراسة
قمنا عاد نبي ناكل ثمن نبي نسولف >>>> نرفهه عن انفسنا بعد امتحان الصبح
اجتمعنا ومسكت كل وحده كتابها عاد بصراحة ماأدري ليش الدرس الأول يجيب النوم ماأخفي عليكم وأخفي عن أهلي دخنا ثانيه
بالنسبه لي آخذ غطه وأقوم أفتح صفحه.. آخذ غطه وأقوم أفتح صفحه وعلى هالحال لييييين يجي العشا ..
عاد نوير تحط الكتاب فوق راسها عشان لادخلت أمي يمديها تصرف(يمه انا حاطه الكتاب فوق راسي اسمع لنفسي ) <<< بس صارت قديمه هالحركه ..
وحصيصه بعد ماقامت قالت بالكتاب في ربع ساعة وراجعته في نص ساعه وطمرت للباب وطلعت
جتها أمي وييين ويييين يمي
خلصت
طيب جيبي اسمع لتس وبكل ثقة تطمر تجيب كتابها وتسألها أمي
السؤال الأول ايه يمه هذا كنت بسأل صديقاتي عنه
السؤال الثاني هذا وش أول حرف منه يمه والله اذكره
وعلى هالحال مادرينا الا ونسمع صوت تصميخ الكتاب فوق راسها وترجع لنا مشوشه وبكلتها في يدها وتشر بيدها ترى أمي تسمع >>>قديمه يالطبله