الفئه الاولى ( الرومنصيه ) الرومنسيه
المتمرسين معناها اللي يسون حالهم رومانسين ويحبووون وتايهين بالحب وهذول تجي عند الواحد فيهم اذا ماصنفر وجهه عند اكبر حلاق وصور خشته ( وشه ) علشان يفهموني اهل الحجاز وهو مسبل عيونه وساهي والا ماسك له قلم وكنه يفكر علشان يقولون انه في لحظة الهام , اذا كان شكله مايؤهل انه ينحط راح واختار له صورة مطرب حلو وانيق والا ممثل وسيم -->> ( مايختارون الا صورة راشد والا مخاوي الليل ) على بالهم كل البنات مايحبون الا واحد من هالمطربين وبس , ودايما اساميهم تجيك متشابهه اسير ؟؟؟؟؟ وحط اي شي بعده
والبنات نفس الشي تروح تختار صورة شاكيرا والا برتني والا وحده من المبرقعات وحطت صورتها تحت اسمها المتعووب عليه
كيف تتعرفون على هذه النوعيه هذول تلاقيهم مطيحين بقسم الشعر والخواطر يكتب هنا وينقد هناك ومره آآآه ومره ايه ومره طاخ ومره طيخ -->> ( طيخ طاخ العتيبي ) مع اعتذاري لك العتبان بس فيهم واحد اسمه كذا عايش بتبوك ارجع لدليل هاتف مدينة تبوك تلقى اسمه بحرف الطاء وهذول في الاخير يطلعون مضروبين , والطامه الكبرى انك تلقى بنفس المنتدى عشرطعش عضو حبيباتهم متوفيات يبون يكسرون الخاطر عليهم وانهم صادقين الشعور والعاطفه والا يمكن موضة السنه هذه حبيبته يموتها
وتلاقون الواحد فيهم يتفلسف وين نزار قباني واحمد شوقي عنهم قسمن عظمن غير يعدموهم وكثير مايهتمون بالخط والزركشه والتلوين واذا جيت للجد تلاقيهم 100% عكس الكلام اللي يكتبونه في قصايدهم وخواطرهم يعني كله لطش بلطش وسرقه يعني لو يسمون قسم الشعر والخواطر ( قسم لطش وسرقه ) اصرف لهم
الفئه الثانيه قسم الدين والدنيا
هذول حقين المواضيع الدينيه وهنا الواحد فيهم حب يصلح اخلاقه دخل وسجل توقيعه تحت واحد من هذه المواضيع الدينيه وليته فاهم للاسف ؟؟ ( طبعا مو كلهم ) منهم ناس فيهم الخير والبركه
ودايم رده على اي موضوع جزاك الله خير ( يعني انه فاهم ...) واتحداه اذا قرا الموضوع
بعدين اذا سالت واحد فيهم عن امور دينه برطم وصار بكبره علامة تعجب واستفهام واذا شفت واحد منهم مسنتر في المنتدى الديني اعرف ان وراه بلوووه كبيره ( نمس ) او يكفر عن ذنب والحمد لله الذى عافانا
الفئه الثالثه الحوار والسياسه
هذول يكثرون فلسفه على غير علم يعني تلاقيه يجادل على الصغيره والكبيره ويقدس كلمة لا ( من مبدأ خالف تعرف ) ويقلبون الساحه فووق تحت الى ان يروح الموضوع للمحذوفات لانهم وبكل فخر الصناعه الوطنيه تجاوزوا حدود الادب في الحوار البناء ؟؟
الفئه الرابعه الرياضه والرياضيين
هذا القسم من الكمليات تجيب لنفسك الصداع اذا قامت الحرب بين النصراويه والهلاليه صحيح ان اهل الرياضه ماتوا ؟؟ الله على ايام درويش سعيد وابوحيدر
الفئه الخامسه الصرقعه والهبال والضحك
هذا القسم مايدخله الا واحد مدحدر ومنسم -->> ( من تنسيمه حاط راسه بطشت مويه يبي يشوف من وين ) ومعطي الدنيا طناش
اساميهم المنسدح .... المنكفخ ... المنسم ... المهسترر ...سعيدان وعليان وهكذا
والبنات المصرقعه ... المهبوله ... المفهيه ... ام دحيم لبيع المسافع
هذه الفئه تتعامل بمبدأ خذ وهات وهي احسن فئه على المستوى العالمي والدولي
الفئه هذه تدخل لهدف الوناسه يعني مختلفه عن الفئات السابقه
وفي الاخير اقول يالله لاتبلانا -->> 
شباب وبنات المنتديات
<< صارت بي ام
العرض العادي
