يوم اخوي طويل العمر نوى يعرس تشرط مثل عادة كل الي يبي يعرسون ولا لقينا شروطه الا في بنت حلال حجازيه عزّّمنا وتوكلنا على الله وقلنا يمكن هذي اللي تدقمه وتربط شياطينه ..( مثلكم خابرين الحجازيات مدري شلووون يعرفون يظبطون رجالهم).. ( وحده تبي تتشمت)المهم راحت الوالده شافت البنيه ومعها اختي الكبيره ..يقال لها اختي بتفرحها قالت لها ان الرجال من زمان يدور له وحده شمحوطه مثلك..مالقت الا البنت تقلب وجهها وما درينا وش فيها ..أثر البنيه تحسب اختي تسبها يوم كلمت الزوج المنتظر والا تقول ..له..اختك هادي ما تعرف تتكلم ايش اللي يبغوا يجوزوك وحده شحطه!! انا شحطه؟؟ ومن يومها تعال شف مفارقات حتسيه وحتسيها..يكلمها مره بالتلفون ايام الخطبه وترفع عليهم امي السماعه تقول له يا فلان الغدا..( حوول)..قال لت امك دمها خفيف مره بتقول لك حول زي اللي بيتكلموا في اللاسلكي يعني ..
مره كانوا زايرينا وانا كنت اجغم لي مويه وشرقت..كانت هي بجنبي قال لها اخوي اطحليا اطحليا قالت له يابويا والله ما سويت لها شي اش بك انته..قال اقولتس اطحليا..قالت يعني اش اسوي والله مني عارفه.. وي
الحين انا موب كنت شرقانه الا الحين قعدت اتنطط من الضحك بغيت اموت حسبي الله عليا..
ومره كان عندنا حريم كبار في السن وحده منهن ياحول تعيبانه ومقصره الوالده قالت لها انجطلي ياام فلان انا على طول رادار على وجه مرتنا..والا العيون طالعه لبره ومجحظه..والاثم منفشخ تقل مسبهه ..تقول انا جالسه من اول اطالع في الحرمه استناها تسوي اي شي يدل على معنى كلمة الانجطال هادي..
لا وكله كوم يوم قالت لها امي شلدزي الجح..ذيك تصنمت بمكانها همن عاد راحت لرجلها قالت له..اقول لك مدري عن امك ايش قاعده تقول تعال اشرح لي ياسيبويه زمانك انته واهلك..
لا ويوم نتسبنا الغدا ذاك اليوم وقالت لها الوالده افهقي لدحيم اخو رجلتس..والا ذيك تبرطم (أنا متجوزة لي واحد من العجم الظاهر هادولا من فين جايبين هادا الكلام)
سمعتها امي وهي تخرطم ومير تقول لها يامال البلا اللي يندر عيونتس يافتو ..زين؟؟ فهمتي ذي الحين والا اجي امعط شعرس وافهمس؟؟
منقووووووووول