أي بالله أخطوا و الخطا اللي جابهم عين الصواب :: :: مبطي وأنا اشوف الطمع يكشف رداهم و استـره
مايملي عيون الحسود بها الزمن غيـر التـراب :: :: و من لايتوب من الخطا تحـرم عليـه المعـذرة
اللي من أولهـا خـراب أكيـد تاليهـا خـراب :: :: و البنـدق اللـي ماتثـور فـي هدفهـا تذعـره
ودّك ليامن جاتك الغلطـة مـن النـاس القـراب:: :: الصاحـب اللـي ماكسبـت محبتـه ماتخسـره
مشكلتي اني ماعرفت احسب لصدتهـم حسـاب:: :: قلطتهم صدري على ذكـري قصيـد و حنجـرة
صوت يصول بمنبرة و اخطاب ما بعده خطـاب:: :: و الطيبة اللي زعزعت صوت الخطيب و منبـره
مافيه دمعٍ صوبـوه أحبابـي بوجهـي و خـاب:: :: و لا زرق حزني على غالـي و لا فـج انحـره
كل الزهاب اللي معي ذكرى من أصحاب الزهاب:: :: و اللي بقالي من عذاب اشرس طريقي و اخطره
لأني تجنبت الغرق ..عديت من فـوق السحـاب:: :: لأن أكثر اصحابي ورق ..ماشفت للطيب ثمـره
و الله ماحطيت بيـن الحقـد و الخـوه حجـاب:: :: حتى غدوا ربعي يحدوني على الضيـق أشكـره
البارحة ثارت علـي رقـاب و آوتنـي رقـاب:: :: البارحـة ياثقـل دم البـارح و يــا محـقـره
أهب ياوجه الحسـد وشلـون جمعهـم و غـاب :: :: كيف السنيـن اللـي عطتنـي بعثرتهـم بعثـره
أثر المصايب ماتجيك إلا مـن النـاس القـراب :: :: و بها الزمن حتى الخوي اللي تثق فيـه احـذره
لابارك الله فـي رفيـق تزعلـه كلمـة عتـاب:: :: و لاجمَّـع الله الرجـال اللـي تفرقهـم مَــرَه
عـودت نفسـي كـل ماشـددت ليّمـه ركـاب :: :: ماأصد وجهي عن طريق إلا ليـا جبـت خبـره
الصاحب اللي مايجي من صحبته غيـر العـذاب :: :: نذر علي إن ماهجرني و إلا انا اللـي بـأهجـره
من يفتح لفرقاي باب أفـك لـه عشريـن باب :: :: و إذا خويـي مايقـدّر خـوتـي مــا أقــدره
إن روّحوا فأنـا بـري منهـم ليـوم الحسـاب :: :: و إن جرّحوا قولوا لهم ماحركـوا فـيَّ اشعـره
شفهم لهم حول السنة و لاخـذوا منـي جـواب :: :: أحسـن دوا للـي يحـاول يستفـزك تحـقـره
أنا جمعت اوراقهـم بكتـاب و أغلقـت الكتـاب :: :: يا وقت لـم اللـي تلمـه و انثـر اللـي تنثـره
ماكنت احاتيهم صغيـر ..عـاد احاتيهـم شبـاب :: :: إن ما ذخرني صاحبي لليـوم الأسـود مااذخـره
عقب اكتئاب البارحة ما عاد انا احمـل اكتئـاب :: :: الطيب جرجرني و أنا مانـي بناقـص جرجـره
اللي يخاف من الظما يترك لنـا طـرد السـراب :: :: و اللي ماهو بقـد الظـلام و وحشتـه لايسهـره
انا تجرعت الظما ليـن احتـرق وجهـي و ذاب :: :: انا كسـرت بخاطـري قبـل الصداقـة تكسـره
أنا خسرت اللي غيابه غيـر عـن كـل الغيـاب :: :: أنـا غفـرت لعالـم مـا تستـحـق المغـفـرة
أنا أكثر (انسان) تعلم من كثر ما أخطأ و أصـاب :: :: أنا آخـر (لسـان) يتكلـم فـي زمـان الثرثـرة
أنا القصيد اللي نزع مـن دفتـره مليـون نـاب :: :: وأنا الوحيد اللـي جمـع مليـون نـاب بدفتـره
جفني و جرحه السهر ,حيلي و هدتـه الصعـاب :: :: دمعي هدر, ضحكي ندر, عمري و ضيعت أكثره
شيبت بعقول العرب ..هيبـت روس مـا تهـاب :: :: جمهرت ناس عمرهـم مـا يعرفـون الجمهـره
ما صرت ذيـب إلا لأن اللـي حوالينـي ذيـاب :: :: ما كنـت أغيـب إلا لأن العفـو عنـد المقـدرة
ترى حلاتك لاحملـت لصاحبـك كلمـة عتـاب:: :: أن مانطقـت بهـا بوجهـه مـا تذمـه بظهـره
في ها الزمن ما يملي عيون الحسود إلا التـراب:: :: و إلا الحظيظ ..الطلقة اللـي ماتصيبـه تذعـره
ودّك ليامن جاتك الغلطـة مـن النـاس القـراب :: :: الصاحب اللي ما كسبـت محبتـه مـا تخسـره
^^