شبيه الريح ..
وش باقي.. من الآلام ..
والتجريح
وش باقي من الأحلام..
وش باقي من الأوهام..
غير إني.. ألاقي في هجيرك في..
ألاقي في ظلامك ضي..
وأوقد شمعتي في الريح
شبيه الريح..
إذا تسمح بغيب شوي..
أبجمع همي الباقي..
وأدفن صبري الذابل.. في أوراقي..
وابرجع لك..إذا باقي في نفسك شي
شبيه الريح
أنا مقدر أكدر صفوك العاصف
شبيه الريح ..
أنا من لي سوى إحساسك الجارف..
بقايا زيف أشواقي..
سما أمطار أحداقي..
شبيه الريح.. وش باقي ؟
أبي أعرف..
متي تسكن رياحك؟
وابي أعرف ..
غرورك هو متي يطلق سراحك؟
وابي أعرف..
متى تعصف..
متى تعطف..
متى تترف جراحك؟
وابي اعرف إذا باقي في بحرك..موج..
أكسر فيه مجدافي..
وأبي أعرف ..
إذا باقي في همك .. هم ..
ماشا لته أكتافي
وابي أعرف ..
إذا باقي في هالدنيا..حزن ..
مامرني واستوطن أطرافي
وابي اعرف..
إذا باقي من المعجز في هالدنيا ..
سوى ((العنقاء))..
والا ((الغول))..
والا خلك الوافي؟!!
بقايا زيف أشواقي ..
سما أمطار أحداقي..
شبيه الريح.. وش باقي ؟!!
سنيني يم..
وقلبي المركب المتعب..
وأنت الريح..
مجاديفي عذاب وهم..
وزادي الوجد والتبريح..
وصبري صبر بحاره..
بغوا في البحر محاره..
غشاهم موج.. كان من الغضب أغضب..
وكانوا للهلاك أقرب..
لولا كثروا التسبيح..
شبيه الريح..
حبيب الأصدق الأكذب..
عجزت أوصل شواطي.. طبعك الكذاب..
تعبت أنظر .. في وسط العاصفه..
قلب وشعور وعاطفه..
تعبت أجمع ألم كل الموادع..
في المواني..
واحضن أطيافك
تعبت السهد في ليل الشوارع..
والثواني ..
تنظر إنصافك..
تعبت الظلم.. واجحافك..
شبيه الريح
أنا ودي أكدر صفوك العاصف ..
شبيه الريح
أنا كني نسيت إحساسك الجارف..
بقايا زيف أشواقي..
سما أمطار أحداقي
شبيه الريح..
كيف أسألك : وش باقي ؟!
وأنا الباقي من إحساسي...
ذرته الريح