يا ويح حالي مايل ٍ للنهايات
كني محاصر من جميع الجهاتي
وصار الفرج من سابع المستحيلات
والظاهر انه ابتعد عن حياتي
اقفيت انادي فوق روس الطويلات
واقفى صدى صوتي يدور نجاتي
يالله تنقذني ترى صحت الآهات
وانا اشهد ان القل جرّح لهاتي
صبرت ضيمي والعطش فج الاصوات
ومن هالضما يا رب جفت شفاتي
خذو سنين لواحدن حيّ ما مات
ماكني الا كل يوم ٍ وفاتي
اموت وحيا في دقايق ولحظات
اذوق لحظة كنها من وفاتي
لو آتكلم ما تفيد .. العبارات
الحزن وجه ٍ اكتمل في حياتي
عايش وكني عايش ٍ بين الاموات
حطم عليّ اليأس كل امنياتي
والرجل من دون الوفا والكرامات
رجل ٍ تجرد من جميع الصفاتي
ما كني الا ضايع ٍ بالمتاهات
كن انعمى شوفي وضاعت عصاتي
يالله انا عبد ٍ تحدى الصعيبات
وانت الملاذ اليا استضاقت جهاتي
العرض المتطور
