الله على الايام كم سخـرت نـاس
للنـاس قادتهـم بقـوة فـراسـه
خلت مشاعرهم من الغير تنـداس
واسقتهم المـر المعلقـم بكاسـه
وكم لبستهم لبس ماهو بمقيـاس
لكن غصب الكـل يلبـس لباسـه
وحالي لياليهم غدت كلها اتعـاس
لوكان ما يهـوون درب التعاسـه
كم واحد(ن) قدام شوره من الراس
راس قوي ماقالوا النـاس طاسـه
رجل يوردهـا المناهيـل للسـاس
واذا بنى يبني على الصلب ساسـه
واليوم كم من جدر فيهم ترمّـاس
مغيـر مستـوره بظـل اللياسـه
واللي من اول كنه الطير قرنـاس
يرقا على الهامات جـاه انتكاسـه
نزل من الهامه يـدور بالاكيـاس
جنب الغراب اللي تطور حساسـه
ايام 0حتى فالذهب شفت الابخاس
قدام صافي واختلـط بـه نحاسـه
دنيا تخلي صاحب الفكر محتـاس
اللي يحارب للـردى والخساسـه
من صغر سنه مايجاري للانجـاس
ولا غشى جسمـه غبارالنجاسـه
ياهيه ياللي عندك شعور واحساس
لا قفت الديـره لـزوم العساسـه
دور وتلقـا مانـدم كـل عسـاس
اللي يحب الخيـر يلقـا الوناسـه
وابحث على شيئ يجي منه نوماس
واللين عاملْ به وكـب الشراسـه
تصفي لك الايام والخيـر نسنـاس
تجارب الدنيـا ولا هـي دراسـه
تجـارب ماجابهـا كـل بــلاس
ماجابها الا حر مـن روس ناسـه
كم بحر حول فيه ماهر وغطـاس
بالعقل ماجاب الفكـر0 بالعماسـه
من يبتعد عن هم ترتاح الانفـاس
الهم يبقى مرتع (ن) في محاسـه