بديت بسم اللي عطى الوحي جبريل
الواحد اللي بأمره الكون كلّه
وأعوذ به من شر نفسي ومن ويل
في ماقف(ن)ماينفع الخل خلّه
من بعد ذكره زان سوق المباهيل
وضحن يجي صافي حلاهن بحلّه
ورد ومصادير الضوامي على النيل
وجه الروى شط الروى مدهللّه
للشعر نقاده وللشرح تفصيل
وللفتل نقاضه وللعقد فلّه
عندي مثل لأوصاف بعض الرجاجيل
وجهة نظر والكل حسب الجبلّه
بعض الرجال تضيع فيه التحاليل
ماله فصيله في جميع الأدلّه
وبعض الرجال بوقتها سم قنديل
قول وفعل يشفي من اعداه غلّه
وبعض الرجال اقناده العود والهيل
من رافقه طول الدهر مايملّه
وبعض الرجال يشوم من قوة الحيل
لو أن مافي خاطره ماوصلّه
وبعض الرجال يجود بالجود وإيكيل
يعطيك ماب إيديه كثره وقلّه
وبعض الرجال بكفه الخير وابخيل
مثل السراب اللي يغرك محلّه
وبعض الرجال احصان بالراس والذيل
يمشي على الوجهين مذهب وملّه
وبعض الرجال يفصل الحكي تفصيل
لو أن مابه قوم سيفه يسلّه
وبعض الرجال تشوف زوله تقل فيل
مخيول مايظلل عن الشمس ظلّه
وبعض الرجال اخيال خالي من السيل
يبرق ويرعد والصفا مايبلّه
وبعض الرجال أشد من حالك الليل
يكفيه من فعل الردى ماحصلّه
وبعض الرجال بعير للحط والشيل
تقلب افصول السنه جايزلّه
وبعض الرجال ليا تمعنت زنبيل
هذا مكانه ماتعداه للّه
وبعض الرجال بساقة الناس دربيل
مايتوب لين إيموت عن عادتلّه
وبعض الرجال أمثال شقرا مع الخيل
الحيل واني والدهر راضخلّه
وبعض الرجال يظلل العين تظليل
ماقال قبل إيفوتك الفرض صلّه
وبعض الرجال بريد يحمل مراسيل
كل الكلام اللي بصدره يهلّه
وبعض الرجال ايطيح وسط المحابيل
يضيع عن درب السنع مايدلّه
وبعض الرجال ايجيب كل المحاصيل
وليا بخصت السالفه نار جلّه
وبعض الرجال بعصمة أم المضاليل
يخاف من رؤوس الرموش المظلّه
وبعض الرجال ابذل من دون تذليل
الموت راحه من حياة المذلّه
وبعض الرجال مخطط(ن) للمقابيل
مسكين من هالعمر وش باقيلّه
طرقي على حافة شديد التهاويل
يبقى وحيد من البشر مع اسجلّه
وأنا بعد من ضمنهم بالتماثيل
فيني مثل ماقلت بالناس علّه
عساني الثالث بهم يالمشاكيل
وأن ماحصلّي جعلني رابعلّه
هذا حسب عرفي به العدل والميل
ما أقول أنا معصوم من كل زلّه
ماني كفيل الناس جيل(ن) بعد جيل
مثلي مثل جيلي وأنا تابعلّه
ولاني وكيل آدم على مثل ماقيل
لساني أحصاني وأنا صاحيلّه
العرض العادي
