يازمانٍ رحت عنا واخذت الطيّبين
ردّهم لنا عسى الحال يتبدّل بحال
والـلـه ياشيباننا يامنيس الاولين
ماتلد بامثالهم كل من تنجب عيال
ماتمرّدنا على الفطره إلا ذا السنين
ومابلغنا بالحيَل غايةٍ ولا كمال
يالنزاهه ويش باقي لنا يالتاليين
والصله بالالف تقوى وتضعف بالريال
يالبساطه ويش خلىّ للاحيا الميتين
والمظاهر في زمنّا تقاس بها الرجال
ياقناعتهم وحبلٍ ربطهم بك متين
حلّت الدنيا محلك ووثقنا الحبال
عالمٍ عنا بكل المزايا فارقين
ويش صاب الناس والاحتمال ايّ احتمال
الحضاره ياوبالٍ على المتحضرين
ياعلى الحضاره اصحابها هم الوبال
المهم نعِدّ مَن !! في عداد الذاهبين
الذهاب ذهابنا إلا بذكرٍ لايزال
واللي الافكار سلعه وهم مستهلكين
واحتلال العقل ما اخطر منه ولا احتلال
اهل غربٍ تافهه واهل شرقٍ معجبين
ليت مابين الفريقين وصلٍ واتصال
تستفز العاقل تصرفات الدايخين
ياوسيع البال هو بعد فيها وسع بال
مانودّع موضه إلا تجينا موضتين
من خلال اما لباسٍ غريب او من خلال
ياامّةٍ كانو على غيرهم متسيّدين
ويش خلىّ للسياده تحوّل وانتقال
لن يغيّر مافي القوم رب العالمين
طالما تغييرهم مافي انفسهم محال
العرض العادي
