سامحني لأني أحبك "
البارت السابع عشر
في المستشفى
فجر جافت نورة
فجر وهي تصيح: وين عبير؟؟
نورة وهي تأشر بإيدها: بهاي الغرفة اللي حذالج
فجر تركض وهي تحاول تسابق الزمن، تحاول تعوض كل يوم كانت فيه بعيدة عن ربيعتها وصديقة طفولتها و كاتمة أحزانها..
صداقتي لإنسان، تعني أمان
تعني حب وحنان، تعني فرح في كل مكان
فيحيى فؤادي بعيدا عن الأحزان
ويداي لا تلمس جمرة الوحدة والحرمان
فالقلب لا ينبض بالدفء إلا إذا حضنه قلب إنسان
فجر أول ما وصلت الغرفة، جافت عبير وهي ع سرير المستشفى، والتعب باين ع ويهها...
فجر ما قدرت تيود عمرها من الصياح، أما عبير فالمفاجأة خلتها تنسى كل شيء قالته حق أمل...
فجر وهي تسير وتحضن عبير وتصيح، وعبير نفس الحالة، تموا على هالوضع جم من دقيقة والكل متمسك بالثاني، كانوا خايفين يبتعدون لحظة عن بعض، خايفين لو ابتعدوا يكون هذا آخر لقاء بينهم، خايفين يكون هذا فقط مجرد حلم...
عبير وهي تصيح: سامحيني يا فجر، سامحيني أنا وحدة ما أستاهل منج
فجر تقاطعها وتحط إيدها على حلج عبير: اشششش، لا تقولين أي شيء، أهم شيء عندي الحين صحتج، دخيلج لا تعبين عمرج بالرمسة
عبير بصوت ممزوج بالتعب والصياح: مشكورة فجر
بهاللحظة دشت بشرى
بشرى وهي تسلم على عبير: ألف حمدالله على سلامتج
عبير: الله يسلمج، وينج يا بشرى ليش ما تسألين عني؟؟
بشرى: اممم أنا
عبير صدت صوب فجر: فجر وعندها عذر، لكن انتي شو عذرج؟؟
بشرى: صدقيني أنا ما دريت إلا اليوم، وأول ما دريت بغيت أموت، قلت إلا ما أييج المستشفى
فجر منصدمة من جذب بشرى
عبير:مشكورة فديتج، أنا وايد محتاية لكم خاصة بهالفترة ومسكت إيد فجر: فجر حبيبتي لا تخليني بروحي بعد اليوم
بشرى: بس عبير انتي اللي ودرتيها مب هي اللي ودرتج، يعني انتي اللي بديتي وتخليتي عنها...
فجر بعصبية: بشرى مب وقته هالرمسة، وصدت صوب عبير: لو شو ما سويتي يا عبير بتظلين غالية علي حيل
عبير وهي تصيح: رمسة بشرى كلها صح، أنا اللي ما فيني خير
فجر: حبيبتي عبير خلينا ننسى كل شيء صار، ونبدأ صفحة يديدة والأيام كفيلة تنسينا كل شيء
عبير ساكتة وهي حاسة بندم فظيع ع اللي سوته بفجر
فجر حست فيها، فحاولت تخفف عنها: عبورة حبيبتي ما قلتيلي شو قالج الدكتور بالضبط
عبير: يقول أن الإلتهابات علي زادت وايد، بحيث أنها صارت حادة، خاطري يافجر أصير زينة وأطلع من المستشفى
فجر: إن شاء الله رح تطلعين وابتسمت: صدقيني بعد اليوم ما بخليج ولا دقيقة....
بهاللحظة دشت نورة وبعد السلام: ما شاء الله عيني عليكم باردة، و بمزاح قالت: وأخيرا اجتمعت شلة المشاغبات....
الكل ضحك ما عدا بشرى، كانت متضايجة من الوضع كله، أو يمكن كانت تحس بالغيرة من عبير " ما يندرى كيف تفكير بشرى صاير"
وتمت الشلة كلها تسولف وتسترجع ذكريات مال المدرسة والمقالب والمدرسات، والكل يضحك ومستانس، طبعا ما عدا بشرى.....
عند جاسم
جاسم يالس صوب البحر ويفكر بفجر وسوالفه معاها وكل شوي يطالع صورتها اللي طرشتها له
جاسم في خاطره: والله أنج ملكة جمال يا فجور، لو تعرفين بمكانتج عندي، سامحيني يا فجر، لأنج غالية علي ضروري أبتعد عنج، ماباج تتعذبين مع واحد ما تعرف عليج، إلا بس عشان ينسى حبيبته الأولية، والصراحة بكون جذاب لو قلت أني نسيتج يا شوق، وشوي وجنه انتبه على عمره: أنا شو يالس أخربط، شوق وحدة خاينة، ما قدَرت الحب ولا صانته، أنا يوم بسافر وبدرس بنسى وبرتاح، والله ماعرف أحبج يا فجر أو لا؟؟!!!
" أصعب سؤال يوم تواجه نفسك بمحبة شخص معين، تحبه أو لا"
أما الحين فجاسم شل تلفونه واتصل بربعه، يمكن سوالف الربع تنسيه فجر وشوق
عند شلة البنات
فجر: أنا سمعت أن النتايج باجر
عبير وهي متوترة: وأنا بعد سمعت نفس الشيء، وبصوت حزين قالت: أنا متأكدة أني راسبة
بشرى: صراحة انتي طول الوقت كنتي مع أمل، أربع وعشرين ساعة معاها، خاطري أعرف متى كنتي تذاكرين
عبير مستغربة من أسلوب بشرى اليديد معاها
فجر تحاول تهدي الوضع: اممم عبير ما شاء الله عليها شاطرة، وإن شاء الله بتنجح
نورة: أما أنا فأبصم لكم بالعشرة أني راسبة إما بالرياضيات أو الفيزياء
فجر: انتوا بلاكم اليوم، ليش صايرين جي متشائمين؟؟، خاصة انتي يا نورة، كنتي دوم تقولين تفاءلوا بالخير تجدوه
نورة: صح، بس أنا مول مب شاطرة بالعلمي، وانتي تعرفين يا فجر أني ما دشيت العلمي إلا عشان خاطر الوالدة، وإلا أنا بروحي منيح بالعلمي
عبير: وأمج ليش تباج تدشين علمي؟؟
نورة: خاطرها أصير دكتورة، بس أنا ما يخصني بالطب، أنا ميولي غير، يعني ديكور تنسيق، من هالسوالف، مب تشريح جثث وعمليات
بمجرد ما ذكرت نورة كلمة الطب، بدت الذكريات تشق طريقها لفجر
" فجر باستغراب: يعني انت بتصير دكتور؟؟
جاسم: ليش ما أستاهل؟
فجر: مب جي قصدي، بس ما تخاف؟؟!!
جاسم يضحك: من شو بخاف يعني، كل اللي بسويه أني بشرح جثة ميتة
فجر بخوف: انت شو يالس تقول، معقولة جثة ميتة!!!
جاسم يضحك: ليش انتي تخافين؟؟
فجر: جاسم ممكن نغير الموضوع، بتلوع جبدي لو تمينا نرمس جي...
جاسم يضحك"
عبير: فجورة وين سرتي؟؟
فجر وتوها انتبهت: لا ما شيء، بس امممم أحاتي النسبة
عبير: انتي ما شاء الله عليج شاطرة وإن شاء الله تيبين النسبة اللي تبينها
فجر: إن شاء الله
.................................................. ...................
عند ألحان
ألحان وهي تلعب بموبايلها وتفكر: اممم أتصل عليه الحين وإلا لا؟؟، آه بس لو حمد ياخذني ع الأقل حمد يعرف وضعي عدل وشوق فهمته أن اللي صار معاي كان حادثة، جان زين ياخذني اليوم قبل باجر، على الأقل بفتك من بخل أبوي وبعيش بنفس الفلة اللي تعيش فيها شوق، وبطنازة قالت: يعني شوق بشو أحسن عني، جمال وإلا شطارة، بس خقة عالفاضي، وبعد صراع مع الأفكار قررت تتصل على حمد، اللي هو طبعا خليفة
ألحان بصوت دلع: ألووو
خليفة: ألووو، يا هلا
ألحان: أهلين، شحالك؟؟
خليفة: وأخيرا حبي اتصلتي...
ألحان في خاطرها: حبي!!! بس حمد وايد يستحي، الظاهر مثل ما قالت شوق، بالتلفون وايد غير
ألحان ساكتة
خليفة: شو فديتج مستحية
ألحان: بس حمد عاد لا تحرجني
خليفة باستغراب: منو حمد؟؟، وشوي وتذكر السالفة: اممم حبيبتي لا تقولين حمد، قولي بعد اليوم حبيبي
ألحان: لا عاد مب من أول يوم
خليفة في خاطره: أف هاي شو اسمها، كيف بزقرها الحين، المشكلة سيفت الرقم بدون اسم...
ألحان: وين سرت؟؟
خليفة: وياج حبيبتي
ألحان: حمد
خليفة: يا عيون حمد
ألحان: تعرف باجر النتيجة؟؟
خليفة: هيه أدري، أنا بعد وايد أحاتي النسبة
ألحان باستغراب: تحاتي النسبة؟؟، بس انت متخرج من سنين!!!
خليفة بارتباك: هيه صح، بس أحاتيج انتي يا عمري وشوي وطلعت فكرة براسه: أقولج حبيبتي انتي عطيني اسمج بالكامل، وأنا بطلع لج نسبتج
ألحان: والله بتطلع لي النسبة
خليفة: هيه بس مب اليوم، لأن تدرين باجر بتطلع النسبة
ألحان: فديتك والله، أول مرة أحس أن حد مهتم فيني
خليفة في خاطره: أفف هاي ناوية تخبل فيني وإلا شو سالفتها، شو هالإختيار الزفت اللي اختارته لي شوق
خليفة: المهم غناتي عطيني اسمج بالكامل
ألحان: ألحان سعيد عبدالله ال.....
في اليوم الثاني
كان يوم مميز عند الكل، مفرح عند الشطار اللي اجتهدوا خلال سنة كاملة ، وبذلوا كل جهد في سبيل النجاح والتفوق، وكان يوم حزين ومخيف عند اللي أهملوا دراستهم ونسوا أن هاي الشهادة هي الممر اللي بتوصلهم لطريق النجاح الكبير...
بالنسبة لفجر حققت حلمها ويابت نسبة 96% مثل ما كانت تحلم بالضبط
بشرى: 76%
عبير: 63%
أمل: 84%
فجر وهي حدها مستانسة، كل شوي ويرن تلفونها على تهنئة يديدة من المدرسات والأهل والصديقات
فجر ترمس المديرة
المديرة: ما شاء الله عليج يا فجر، بيضتي الويه
فجر: مشكورة أبلة، ما تدرين شكثر فرحني اتصالج
المدير: تستاهلين الزود يا فجر، صحيح كنتي شوي مشاغبة ولج مقالب ترفع الضغط، بس ما شاء الله عليج شاطرة
فجر ببراءة: يحليلي أنا طول السنة هادية ومؤدبة...
المديرة تضحك
هالوضع اللي كان مع فجر، من اتصال لإتصال، ومن تهنئة لتهنئة...
فجر ترمس بشرى بالفون
فجر:76 اممم نسبة أوكي
بشرى: أي أوكي انتي الثانية، ماظن أن هالنسبة بتدخلني الجامعة
فجر: وليش يعني؟؟
بشرى: لا تنسين أني أنا وايد مزفتة بالسيبا
فجر: حتى أنا مزفتة بالسيبا، يعني شو ما بندش الجامعة؟؟
بشرى: أنا صراحة نسبتي مب عايبتني مول
فجر: قولي الحمدالله، عيل يحليلها عبير اتصلت فيها وهي تصيح
بشرى: ليش جم يابت؟؟
فجر:63% والله كسرت خاطري
بشرى: شو تتريين من وحدة، طول الوقت ببيت حبيبتها، والله يستر شو يسوون..!!!
فجر: مب وقته هالرمسة، المفروض كلنا نكون معاها بهالظروف، مب كافي عليها مرضها...
بشرى: ما علينا بسألج تدرين أمل جم يابت؟؟
فجر: عبير قالت لي 84%
بشرى: بل بل بل ، هاي وحدة ما تذاكر كيف يابت هالنسبة، لا وعلمي بعد
فجر: بلاج بشورة؟؟!!، اذكري ربج، قولي ما شاء الله
بشرى: لا تخافين ما بحسدها، الله يعينج عيل يا فجور،أمل بتكون معاج بالجامعة
فجر: وخير يا طير أنا شو يخصني فيها، أنا علي من دراستي وبس، وبعدين انتي بعد إن شاء الله بتكوني معاي بالجامعة...
بشرى: إن شاء الله، وشوي وجنها تذكرت شيء:هيه صح نسيت أقولج، ترى نورة راسبة...
فجر بصدمة: شووو، انتي متأكدة؟؟
بشرى: هيه والله، ربيعتها مريوم قالتلي
فجر بضيج: بشو راسبة؟؟
بشرى: بالفيزياء...
فجر بحزن: لا حرام نورة ما تستاهل
بشرى: تعالي نسيت أسألج، جاسم اتصل عليج؟؟
فجر بحزن: لا وحاولت تغير الموضوع: أقولج بشورة بتصل الحين على نورة
عند نورة
نورة وهي تصيح: أماية خليني بروحي شوي
أم نورة: فديتج يا بنيتي، سامحيني أنا السبب
نورة: أماية هالكلام ما منه فايدة يا ما قلت لج أنا ما يخصني بالعلمي مولية، بس انتي أصريتي أني أدش العلمي، زين جي الحين؟؟
الأم وهي تصيح: فديتج يا بنيتي سامحيني، أنا بس كان حلمي أجوفج دكتورة
نورة ويزيد صياحها: والحين جفتيني راسبة!!، بس لو كنت داشة أدبي، جان نسبتي الحين بتكون إما بالثمانين أو التسعين
أم نورة: خلاص يا نورة لا تعذبيني أكثر عن جي
وشوي واتصلت فجر
نورة بصوت ممزوج بالصياح: ألووو
الأم ظهرت من الغرفة وهي تلوم عمرها
فجر: نواري حبيبتي عشان خاطري لا تصيحين
نورة: مستقبلي ضاع يا فجر، كيف ما تبيني أصيح؟؟
فجر: أنا حاسة فيج والله حاسة، بس انتي عندج دور ثاني وإن شاء الله بتنجحين فيه
نورة بس يالسة تصيح
فجر: نورة أنا أدري أن السالفة واااايد صعبة عليج، والله يلوم اللي يلومج، بس انتي حاولي تشدين حيلج بالدور الثاني والله كريم
نورة: تدرين أن أمي وايد متضايجة
فجر: شيء طبيعي رح تتضايج، انتي بنتها العودة...
نورة: أمي مب متضايجة عسبة أني راسبة وبس، أمي متضايجة لأنها تحس أنها هي السبب برسوبي
فجر: هاي النتيجة يوم الأهل يغصبون العيال على شيء ما يتناسب مع ميولهم
نورة: أمي كاسرة خاطري وايد
فجر: تدرين أن الإحساس بتأنيب الضمير وايد يعذب الشخص، عشان جي لا تحسسين أمج أنها هي السبب، واللي صار صار، مهما يكون أمج بس كان خاطرها أنها تجوفج أحسن الناس...
نورة: لا تشيلين هالهم، أنا أمي عندي أهم شيء بهالدنيا، بس الشعور بالفشل وايد صعب
فجر: انتي دوم تقولين أن هذا اختبار دنيا والإختبارالأهم هو يوم القيامة، أنا أدري أن هذا مستقبل
نورة تقاطعها: انتي تعرفين، أنا أصلا بشكل عام ما رح أكمل لا تقنية ولا جامعة..
فجر: ليش؟
نورة: اممم أنا بس أبا شهادة الثانوية العامة
فجر: ريلج ما يباج تكملين؟؟
نورة: مول ما يخصه، بس فكري معاي يا فجر الحين أنا عندي دور ثاني والله يعلم لو بنجح فيه أو لا، وإن شاء الله لو نجحت مافي كلية أو جامعة بتقبلني
فجر: ليـــــــش؟؟
نورة: فجر أنا نسبتي وايد ضعيفة
فجر: جم؟؟
نورة بأسف: 67%
فجر: انزين ليش ما تعيدين السنة؟؟
نورة: انتي تخبلتي، صعب وايد علي أني أعيد السنة، خاصة أني مالجة وعرسي إن شاء الله شهر 9
فجر: الله يسهل عليج يارب، ويهنيج بحياتج
نورة: كان خاطري أبوي يكون معاي بهاليوم
فجر: الله يرحمه، وأنا بعد كان خاطري يدي يكون معاي بيوم مثل هذا، وبحزن قالت: جان واااااااايد أشياء تغيرت
.................................................. ..............
عند جاسم
أم جاسم وهي تصيح: ألف ألف مبروك يا ولدي
جاسم يبوس راس أمه: فديتج الغالية لا تصيحين
بو جاسم: خلها تصيح، هاي دموع الفرح
حصة: تستاهل يا بومحمد
شمة بصوت طفولي: مبروك جاسم
جاسم يشيلها: الله يبارك فيج يا أحلى شيامي
شمة: الحين انت بتروح مستثقى " مستشفى" وتصير دكتور
جاسم يضحك: لا شيامي، أنا الحين بسير أدرس برع إن شاء الله وبعد سنين بيي هني وبروح المستثفى " يالس يعيب عليها"
أم جاسم تصيح: والله بتوله عليك جسوم
جاسم : فديتج الغالية، اللي يجوفج تصيحين جي بيقول أني مسافر باجر...
أحمد: عيل متى رح تسافر؟؟
جاسم: ماعرف أنا مقدم على بعثة وإن شاء الله يصير خير
ريم: باباتي المفروض نسوي عزيمة بمناسبة نجاح جاسم
عبدالله: مب بس أي نجاح، ما شاء الله نسبة 95%
بو بجاسم: أكيد يبالها عزيمة، بس جاسم بغيت أسألك
جاسم: هلا أبوية
بو جاسم: خليفة ولد عمك جم نسبته؟؟
جاسم يضحك: تقصد الصايع...
بو جاسم: لا تقول جي عن ولد عمك
جاسم: السموحة منك، بس خليفة طول الوقت هياتة وبنات
بو جاسم: المهم جم نسبته؟؟
جاسم: 47%
بو جاسم: شووو
جاسم يضحك: أسولف معاك أبوية، اقراها بالمجلوب
شمة: يعني 74%
جاسم: شطورة
بو جاسم: ما شاء الله، نسبته بعد زينة ولا تنسى أن هو بعد علمي
أم جاسم: إنزين متى بتسوون العزيمة؟؟
بو جاسم: إن شاء الله باجر
جاسم: انزين أبوية وين هديتي اللي وعدتني فيها ؟؟
بو جاسم يضحك: حشى انت ما تنسى...
جاسم: أكيد مستحيل أنسى
بو جاسم: تعال معاي الغرفة وبعطيك مسويج السيارة
أم جاسم تزعرد من الوناسة
أحمد: عقبالي يارب
وسار جاسم مع أبوه عشان يستلم مسويج سيارته اليديدة....
عند سيف
سيف: اتصلتي عليها؟؟
أميرة: هيه من شوي، وباركت لها، ما شاء الله عليها
سيف: هيه فجر تستاهل
أميرة: انزين انت ما بتتصل عليها وتبارك لها؟؟
سيف: أنا ما بتصل، لأني ناوي أسير لها
أميرة باستغراب: انت؟؟
سيف: انتي بلاج لا تنسين أن هاي إختي
أميرة: آسفة أنا ما قصدت، بالعكس أنا بستانس وايد يوم بجوفك مهتم بإختك، خاصة فجر يحليلها محتاجة تجوف الفرحة بعيون الكل، بس استغربت شوي
سيف: عيل خلاص إن شاء الله باجر بسير لها
أميرة: وأنا بعد ولهت عليها، انزين ليش ما نسير لها اليوم؟؟
سيف: اليوم عندي شوية أشغال، خلاص ولا يهمج وعد مني أسير باجر، لأني صج ولهان عليها...
عند فجر
فجر في المطبخ تشرب ماي وشوي وسمعت صوت أبوها...
بو سيف بوناسة: ألف مبروك يا بنيتي، والله تستاهلين...
فجر من غير نفس: الله يبارك فيك
بو سيف: شو خاطرج فيه، أي شيء بخاطرج بسويلج إياه، اليوم يومج يا فجر..
فجر ساكتة
بو سيف: انتي بس آمري
فجر: اللي أباه ما تروم عليه انت
بو سيف: شو قصدج؟؟
فجر وهي تسير غرفتها: ماشيء
بو سيف حس بالحزن على بنته الوحيدة
بو سيف: إلا نسيت أقولج...
فجر ساكتة
بو سيف: باجر نحن معزومين عند عمتج دانة، مسوية حفلة عودة بمناسبة نجاحج، هي ماتصلت عليج وخبرتج؟؟
فجر: ماعرف، أنا مارد على أرقام غريبة
فجر في خاطرها: هذا اللي ناقص، أسير أرمس عمتي، أي حد من طرف أبوي أنا ماحبه، ليش ما يحسون...
بو سيف: انزين باجر لا تنسين العزيمة
فجر: باجر ربيعاتي مسويين لي عزيمة... وكتفت إيدها وصدت صوب أبوها: شو يعني ماسير عند ربيعاتي عشان خاطر إختك؟؟
بو سيف بعصبية: احترميني شوي، ترى أنا أبوج، وإلا انتي ما حد علمج الأدب..!!!
فجر في خاطرها: أكيد بيذبحني الحين
بو سيف: ليش ما تردين، وإلا تعقين رمسة وبعدها تنطمين..
فجر تزاعج: جم مرة قلت لك أنا ماحبك، لا تتعب عمرك والله لو شو ما سويت مستحيل أحبك، وبعدين أي أدب هذا اللي تتكلم عنه، أنا بس مع الناس اللي تستاهل بكون مؤدبة، وبصوت عالي صرخت: لكن انت وإختك ناس مجرمين وأنا أكرهكم، تفهم شو يعني أكرهكم..
وسيدة ركضت صوب غرفتها
بو سيف حط إيده ع قلبه: الله يسامحج يا فجر، والله أني أحبج يا بنيتي، معقولة تكرهيني وأنا أبوج، تكرهين أبوج يا فجر؟؟!!!
وقرر يسر لها يرمسها مرة ثانية، وشل معاه الهدية اللي يايبنها حقها
يوم وصل عند غرفتها، جافها تحضن دبدوبها وتصيح صياح
بو سيف بصوت تعبان: سامحيني يا فجر، لو تبين تكرهيني اكرهيني، لكن أنا أبوج وأحبج
وحط الهدية عند طاولتها وسار
فجر وهي تشاهق من الصياح وتتذكر جملة أبوها " لكن أنا أبوج وأحبج"
فجر وهي تصيح: على شو تباني أسامحك، لو سويت أي شيء ثاني كنت ممكن أسامحك، لكن تحرمني من أمي وإختي، تحرمني من الأمان يا حسن، وتمت تكمل صياح وماهتمت للهدية موليه
.................................................. ............................
عند شوق
شوق يالسة مع ألحان
شوق: جم نسبتج قلتي؟؟
ألحان بوناسة: 82%
شوق بغيرة: كيف جي وانتي مول ما تذاكرين؟؟!!!
ألحان: لا والله، انتي تعرفين أني أذاكر، لكن بعد سالفة سليمان شوي أهملت، لكن الحمدالله عوضت بفترة الإمتحانات
شوق: تظنين نسبة 77 ممكن تدخلني الجامعة؟؟
ألحان: هيه ليش لا، لا تنسين ترى نحن علمي
شوق: والله ماعرف، المهم ما علينا شخبار أخوي معاج؟؟
ألحان: فديته والله، أصلا هو اللي طلع لي النسبة
شوق في خاطرها: والله ممثل الدور عدل يا خليفة
ألحان: شو رايج نظهر نغير جو بعد كراف الإمتحانات؟؟
شوق ماهتمت لرمسة ألحان: تدرين أن جاسم ياب نسبة 95%؟؟
ألحان: ما شاء الله بس كيف عرفتي؟؟
شوق: من الغبي خليفة
ألحان: وانتي ليش متضايجة؟؟
شوق: أنا أموت و أعرف هاي الحيوانة جم يابت؟؟
ألحان: تقصدين فجر؟؟
شوق: ليش في حيوانة غيرها؟؟
ألحان ساكتة
شوق: بموت من القهر لو يابت نسبة أعلى مني!!!
ألحان: هي علمي وإلا أدبي؟؟
شوق: ماعرف، ما سألت خليفة...
ألحان: ما شاء الله خليفة صار منبع المعلومات
شوق: أقولج خلينا نظهر لنا أي مكان وايد أحسن لنا من الرمسة عن النتيايج
ألحان: أوكي بس بتصل بحمد
شوق بخوف: ليش بتواعدينه؟؟
ألحان: لا مب جي، بس أكيد حمد ما بيرضى أظهر أي مكان من غير ما أخبره
شوق في خاطرها: معقولة ألحان تحب أخوي، هي مستحيل تحبه، هي اللهم تبا ترمس واحد يستر عليها بعد فضيحة سليمان...
عند فجر
فجر بعد ما هديت نفسيتها شوي، خاصة بعد الموقف اللي صار لها مع أبوها...
فجر وهي بعدها تصيح: آآآآآآآآه تعبت خلاص، لين متى بتم عايشة جي، والله ولهت عليك وااااااايد وااااايد يا يدي، وانت يا جاسم، شو العذر اللي منعك أنك تتصل علي، الإمتحانات وخلصت والنتايج وظهرت، ياربي شو السبب اللي يمنعه، أتصل فيه أنااا؟؟؟ لا المشكلة ما عندي جرأة...
وبعد تفكير قررت أنها تطرش له مسج تهنيه في على نجاحه
" مبــــــــــروك على النجاح"
جاسم بصدمة: فجر؟؟، معقولة فجر مطرشة لي هالمسج، أحسن شيء أتصل عليها...
واتصل جاسم على فجر
فجر يوم جافت رقم جاسم، نست عمرها ونست الموقف الصعب اللي صار لها مع أبوها
فجر: ألووو
=====