بسم الله الرحمن الرحيم
هذه القصيده منقوله لكم من ارشيف والدي 00 مع التحيه
قالو تهاوي قلت ماكثر هوايه = هواي ذودٍ فيه خلف ومعاشير
البل بكل الوانها من هوايه = سود البكار وحمرها والمغاتير
البل لها عند النشاما عنايه = ياحبني للي ترازم على ضير
وحس الفحل فيها يجيب الهوايه = عرضة عبيد تضرب الطار والزير
وهدب الجريد الفايدي من هوايه = الغرس من فيد الرجال الفواعير
واللي يحب الغرس مابه غوايه = يازينها لانشرت بالكوافير
وشب المناره بالحطب من هوايه = في مجلسٍ يجمع ضيوف ومسايير
وقولت هلا يامرحبا من هوايه = افرح اليا شفت النشاما مناحير
وعندي على جمع الجماعه هوايه = لهم محبه بالضماير وتقدير
ولا قلت اهاوي لابسات العبايه = البيض ولعه للوجيه المسافير
وخذيت من بيض العذاراء هوايه = بالشرع والسنه ولا مقصدي غير
وهواي له مبدى ولاله نهايه = ولاينحصر لوقلتلك بالمحاصير
درب المراجل كلها من هوايه = واحب كل الطيب من دون تفسير
يومن بعض الناس ماله نوايه = هباب نفسه عايشٍ عيشة الطير
ميت نصيب وفوق قلبه اغطايه = ماشوقنه مبعدات المشاوير
قطع الدروب الشهب هذا دوايه = مرٍ مسانيدٍ ومرٍمحادير
والهاف في الشدات غاية منايه = لاحتجت طيبه ماحصل منه تقصير
معروف طيبه مايبيله دعايه = مايشبهه في سرعته كود كونفير
لادق سلفه وانتهض باندوايه = لولا التروس تثقله كان بيطير
باقصى الضماير بانيله بنايه = به ميزةٍماشفتها فالسيايير
مشيتبه دارٍعلى الله نجايه = لا اعرفبها صاحب ولاعرفبها امير
واللي يعرف الدرب ماخذت رايه = متوكلٍ والله عليه التدابير
ماودي اشرح قصتي من سحايه = لي قصةٍ يطربلها الفكر ويحير
ماحدٍ يصدق قصتي والروايه = واضن شي مابعد صار ويصير
كم مرةٍ صكو عليه عدايه = والدرب قدامي دكاك وعثامير
ويوم التفت وشفتهم فالمرايه = عرضتهم درب الوعر والشناضير
وياقربهم من شدتي فالبدايه = وخذت الحساب بكل دقه وتحذير
قومٍ على نفسي يبون الولايه = واحضرت فكري للرياجيل تحضير
ومجهزين اسلاحهم للرمايه = ضارين في شد الحرار النوادير
ماطاح بين ايدينهم كالشوايه = مع اخذ ماله فيه سجن ٍ وتعزير
وحالو بعد بيني وبين اخويايه = والرمل قدامي خشومه مناحير
واشوفهم ناوين طية رشايه = طمعو بهافي يوم شافوني صغير
والله ماخلي القوم تقرب حمايه = على مواجهم نسوق التباشير
مادام اشوف وسالمات عضايه = اللي تبونه بعد حايل عن النير
وابعد من الخفجي لسبت العلايه = دام المحرك سالمٍ يدرج السير
مير ارجعو عني عساكم فدايه = ماتدركون من الطمع حبة شعير
كيف الضرايا يطمعون بعشايه = وانا على اللي يسخر البعد تسخير
واحضرت مجهودي وغاية جدايه = وسلمت من شر الوجيه المشارير
ومن الوهق والخوف يبست شفايه = مابين نار وبين حفرة زمهرير
اشرب وعياء المئ يقطع ضمايه = اخاف ناقع في يدين الجزازير
وذكرت شي مايوافق رضايه = قرامةٍ معها جنون وسعاطير
قالو معه جني وفيه العصايه = ولايلحق المجنون حتى الطيايير
اقرو على المجنون ياهل القرايه = وكثر القرايه زادت الفكر تفكير
ثلاث دوريات على قفايه = تسوقني من صبح سوق المضاهير
قلت ابعدو والطرد هذا كفايه = انتم وانا من طلعة الشمس لعصير
قلعتكم وانتم قلعتو مدايه = سبعين كيلو من ورا الحد تمتير
كنكم موصينٍ عليه وصايه = يانعنبو هاك الوجيه المغابير
نوبٍ على جنبي ونوبٍ حذايه = ومرات عني مد شوف النواضير
ومرٍ قدم وجهي ومرٍ ورايه = وعزمت اواجهم على الشر والخير
وان مارضيتو بالهدى والهدايه = رميتكم من قرب ماهوب تعشير
ويوم شانت المره وبذو خفايه = رجعت للي جاهزٍ بالشراشير
وحميت نفسي من خلاي بخلايه = ورفعت للنيشان فوق المعايير
وقمت اتعزوى لين سمعو ندايه = وكثيرهم راحت عضامه طمارير
وسويت من روحي لروحي حمايه = وعقب الطمع راحو مقافاً مدابير
ماواحدٍ ضني يسوي سوايه = الوقت محرج والليالي معاسير
قصيتهم يوم اوصلوني قصايه = ماعاد عن نفسي وهافي مذاخير
شفتو معاديكم وشفت معدايه = واليا وخذنا ماتفيد المعاذير
لاوخذ هافي من يقوم بقضايه = وش عذرنا قدام وجه الجماهير
يوم شفت مرتهم تزايد بلايه = وابعدت شقفان الوجيه المثابير
ورجاي فالله لايخيب رجايه = مخرج ولد يعقوب من قاعة البير
وطلبت من رب العباد الوقايه = وبرجلي الله من جميع العواثير
قيل انت مخطي قلت وشهو خطايه = الذنب له تابه وللدين تكفير
وانا بخيصٍ في خطاي وقدايه = والرزق عند الرب والي المقادير
مع الدروب البيض تمشي اخطايه = نبحث عن الارزاق مثل المداوير
حدتني الحاجه وحق عملايه = وانا مابي منة طوال الحناجير
لاحل حق الخبل قدم شكايه = قليل عرف وزود الهرج تزوير
والحظ متعبني وزود شقايه = مابين برد وبين لفح المعاصير
والوقت عاكسني وبين جفايه = مدري وش اللي عكر الجو تعكير
واهل الحضوض من التعب في كفايه = ارزاقهم تاتي براحه وتيسير
والناس ماعطيهم سراير وغايه = كم واحدٍ يزرع بدربي مسامير
نبي منه فزعه وترجع جنايه = ناسٍ تعمر شجرة الحقد تعمير
يابجاد ذاك اليوم ليتك معايه = يوم الوجيه القشر جونا مغايير
حتاك تعرف طيبنا من ردايه = بيومٍٍٍٍٍ يحرر موقف الطيب تحرير
لاونك تعرف قصتي والحكايه = كتبت عني فالمجلات تقرير
ورفعت لي في موقف العز رايه = موقف شرف يحتاج شرح وتعبير
هذي مماشينا ولابه كنايه = مشوبها قبلي رجال مناعير
قصــــة الشايب في زمانه مع حرس حدود دوله شقيقه
العرض العادي
