السلام عليكم
مساكم الله بالخير
حبيت أطرح القصيده هذي
واتمنى تحوز على رضاكم
لكن قبل كل شي ترى أتقبل النقد بكل سعة صدر
أخليكم مع القصيده
اذا لك شف في شوفي تراني على شوفتك صحيت الأماني
زرعت الشوق كله بأنتظارك وأخذت الأنتظار وجيت عاني
نسيت الناس لكن مانسيتك عجزت أنساك حتى لو ثواني
مليت الكون وأشغلت الجوارح نظر عيني سماع أذني لساني
عطيتك شي ماهو عند غيرك ولا قصرت لكنك أناني
أنا أحبك واذا ودك تأكد شف الله كيف بيدينك هداني
غيابك صعب والأصعب وجودك وانا فالحالتين أتعب واعاني
حبيبي لاتواخذني ولكن ابيك تحط نفسك في مكاني
اذا جيتك وانا مشتاق تقفي تجاهلني وكأنك ماتراني
واذا صديت عنك وقلت برحل وقف قلبك على الباب ودعاني
ولو سويت نفسي ما اشوفك يميل القلب صوبك ويحداني
أنا يابن الحلال اصعب حكايه كتبني الوقت لكن ماقراني
مضى عمري وتقدر تعتبرني غريب وفي زمن ماهو زماني
زماني راح مع نصفي ونصفي نسى نفسه مع الوقت ونساني
اسافر الحزن وصحبه ثلاثه انا وصبر وسهيل اليماني
واذا مريت في بلاد الطفوله فتحت الصدر للحزن وطواني
هنا دمعه جرت من عين جاهل هنا لاقيت همي ولتقاني
هنا باعتني الديره وأهلها هنا ضحيت لفلان وجفاني
هنا حاولت اصيح وماسمعني سوى بعض الشوارع والمباني
أنا انا ياسيدي دقه قديمه بغيت أخذ من الوقت وخذاني
على الأنقاض واقف دون حيله أشوفك وجهتي بين المواني
تعال وطف بيدينك حنيني تملكني وانا اشعلك حناني
تعال وضمني ياتاج قلبي دخيلك لاتخليني عشاني
انا شاعر عيونك ياحبيبي مع التحريف في بعض المعاني
ومانيل المطالب بالتمني ولكن شوفتك كل الأماني
محبة صادق النيه قصايد محبة صاقط النيه أغاني
قسم بالله لو موتي بيدك واموت ألفين مره ماكفاني
اذا باقي من الطلقات طلقه دخيلك حطها بين المحاني
بقلم
خـواطـر بـدوي14/2/2002
ضمني ياتاج قلبـي
العرض الشجري
