أولا يا هلا ومرحبا بأخواني الكرام..
هالقصيده لها قصه:في يوم من الايام جاني اتصال من أحد الاصحاب((هالشخص مو من عادته يتصل غريبه))المهم سلم وهليت به وأخبار وعلوم ثم انتهى الاتصال((بسرعه انتهى)) المهم أنا مستغرب كأني حاس إنه يبي شي من اتصاله شوي ويجي التأكيد منه اتصال ثاني..سلمت عليه شوي قالي أبغاك في طلب..قلتله سم آمر بس
قال أبغاك تكتب لي قصيده عن موقف قلت أبشر عسى خير قال لا إن شاء الله خير
واحد من أعز خوياي كان بينا عيش وملح كنا خويا على السراء والضراء المهم يوم من الايام تزاعلنا والغلط لا هو مني ولا منه((يعني تقدر تقول بينا الاثنين))
المهم أنا ندمت وودي أرجعله بس من باب عزة النفس ما ودي أروحله ويوم من الايام جاني واحد وقال لي وش فيك يا فلان مهموم؟؟
قلت له ما فيه شي قال فضفض همومك أزين لك قلت لا خلها يمكن إذا فكرت فيها ارتاح وتونسني
قال لي أبيك تكتب قصيده عن هالموقف تجاوب فيه هاللي سأل وش فيك مهموم؟
وهذي القصيده أتمنى تعجبكم: 
يا حروفي ساعديني كيف ردّي للسؤال=كيف أجاوب والهموم أكبر من حدود الإجابه
جاوبيهم كيف همي صار في راسي عقال=جاوبيهم يا همومي وردّي للسائل جوابه
من بعد عشره وخوّه شارفت حد الكمال=من بعد ما كنت أشوفه شخص أغلى من قرابه
من بعد ما كل كيدٍ ما تركنا له مجال=كانو أعدائي عداه وكل أصحابي صحابه
كل كيدٍ من ورانا كنّا قدامه جبال=كنت أنا زنده وجنده لو طلب قلبي حظابه
مير جار الوقت فينا وانقطع حبل الوصال=واختفت كل المعاني الساميه مثل السحابه
افترقنا عن بعضنا لكن فقلبي محال=ما تركته يوم واحد مير شوقي ما درابه
ابتعدت وفابتعادي كِبْر من كِبر الرجال=شي من مبدا الرجوله ما اتّوانى فارتكابه
مبدأي ما انسى خويي ولو حكى فيني وقال=لن دربي اللي مشيته هو بعد مثلي مشا به
ضاق صدري من بعاده وصرت أشوفه فالخيال=ما ظننت إني أبندم والسبب حضرة جنابه
يا حروفي أكدّي له وان بعد بعده وطال=ما نسيته لو نساني والقلم يشهد كتابه
وثّقي له يا حروفي واكتبي بشعرك مثال=إن آخر ما كتبته هم وأحزان وكآبه
الزعل اللي كتمته انمحى فيني وزال=ما بقى إلا حنين ومستعد أنسى عتابه
اذكرو له في جوابي قولتي لمه: تعال=لا تخلّي الضيف ينطر من بعد ما دق بابه
لا تبيع اللي شراكم من أجل قصة جدال=اللي صار إنّا خطينا وما حسب كلٍ حسابه
وآخر أبياتي صلاتي للنبي عدّ الرمال=ما ذكر ذاكر فمسجد وما نطق ناطق خطابه
وسلامة من قرا 
المخلص&ذايع&
$$$رد الســــــؤال$$$
العرض الشجري
