الطيّب ان جانا نشيله على الراس
ولاّ الردي لاشك محدٍ يدانيه
هذي سوات الناس مع كل الأجناس
وكلٍ يميّز يا جماعة مواليه
يا ويلي ان خاويتلي بعض الأدناس
والناس تجمع بالردي من يخاويه
لا صرت مع حرٍ من الناس قرناس
دربك خضر لو كل عمرك تماشيه
ولا الردي ينكرك لا طاح لك باس
لو هو قريبٍ لك من الناس وتغليه
ينكر فعولٍ لك قديمات من ساس
ما قدّر المعروف ولا فعل راعيه
ولا بعد يمكن يجي لابس الطاس
حاربك يومك سافهه ما تراعيه
يا راعي الدرب العوج شفت الأتعاس
درب السعد يا ميّت القلب مغديه
شفلك خويٍ تتبعه من حدا الناس
رجلٍ إلى شاف الضرر قال ما بيه
واحذر خويٍ يتبع الهرج حساس
مثل "المخفة" كل هرجه توديه
يا رب زيّن صورتي من وخا الراس
لين القدم يا رب والعيب تخفيه
أعوذ بك يا رب من كل وسواس
خناس يوسوس في صدور المداريه
نمّامةٍ في كل وقتٍ ومجلاس
ما حسبوا للعمر وآخر تواليه
العرض العادي
