۩ رواية "الا ليت القدر" للكاتبه بقايا شتات..

[قلب الزهـــور]

رواية "الا ليت القدر" للكاتبه بقايا شتات..

بعد اسبوع..
اريام قررت قرارها ... على عبد الرحمن.. وكانت في أتم الاقتناع والرضا ..
وجاء خطبها رسمي.... والكل كان مبسوط وفرحان فيها ..
وبأخر الليل..
البيت كله مهيص...فله .. وضحك ... ووناسه ...
محمد وحمد كانوا جنب بعض ويضحكون على سلطان وهو يعرض العرضه النجديه .. وسطام يحاول يتعلم بس شكله غلط ..
دانا: سطام ودك تجلس..
لانا: هههههه تسوي خير والله.. خلينا نشوف سلطان بس..
سطام: الا بتعلم غصب... اذا جاء زواج اريام برقص...
حمد: اريام.. مافي زواج وانا ابوك كبير.. راح يكون مختصر.. شينه في حق امك..
اريام: عارفه يبه.. واصلا اهل عبد الرحمن مستعجلين..
مدى ضمتها/ اسبوعين بس وبتروحين عنا ..؟
اريام ابتسمت بحيا: الشكوى لله ..بروح اكمل دراستي مع عبد الرحمن..
لانا بهمس: ما شا الله عليك اسرع وحده تنخطب وتتزوج..
دانا: هههههههه قولي ما شا الله لا تصكينها بعين..
ابتهال: اجل ليش انا مطولين سالفتي..
مدى : انتي اسكتي احمدي ربك زوجناك..
محمد: احم... ودي واقولكم شي .. مدام الكل مجتمع..
حمد والكل لف عليه..
حط ايده على رجل اخوه: يا حمد انت ما قصرت معاي ولا مع عيالي .. اكرمتني اسبوع كامل .. بس والله شينه في حقي .. اقعد في بيتك.. واضايقك..
حمد: وش هالكلام يا بو سلطان ..
محمد: خلني اكمل كلامي ... انا دورت لي بيت قريب منكم.. وراح نعيش فيه ..انا وعيالي .. وكل واحد ياخذ راحته... ولا انت ياخوي رايتك بيضا وما قصرت ..
حمد: والله انا عن نفسي مرتاح .. ومحد متضايق.. بس اذا انت متضايق.. عاد هنا براحتك ما اقدر اغصبك..
محمد: ضروري يا اخوك الواحد يستقل في بيته هو وعياله ..
حمد: ما دام انكم قريبين منا .. ما اقدر اقول شي ..
ابتهال حزنت ولفت على البنات: بنروح عنكم...!!!
دانا خنقتها العبره: لا ... اقنعي عمي ...
لانا نفس الشي ضاق صدرها : بتو.. لا تروحين تعودنا عليك ..
مدى: بتخلوني هنا لحالي .؟؟
ابتهال تذكرت: صح مدى بتجلس هنا !!! وشلون ا روح لحالي..
اريام: بتو ... لا تكبرينها .. النوم في بيتكم .. وتعالي هنا من الصبح ..
لانا: ايوه صح .. مو من بعد البيت .. عمي يقول قريب..
دانا: بس انا متعوده تنام عندها ..
ابتهال: لا تخافين .. ما راح تفتكين مني ... بنام عندكم الليله ..
محمد وقف: سلطان ... يله وانا ابوك...خلي الخدم يشيلون اغراضكم.. بيتكم جاهز من والى .. ما نقصه الا انتم..
سلطان: ابشر ...
سطام: وانا معاك ..
وبدوا ينقلون الاغراض ... وبيت محمد فعلا ما كان يفصل عن بيت حمد الا حاره وحده ..
البنات كلهم راحوا لبيت محمد ... اللي كان حجمه متوسط .. بس حلو ورايق ويعيطك احساس دافي .. واثاثه كان جدا راقي ...


&&&&&&&&&&&&&&&&&&&&&&&&&

بعد اسبوعين ...

اليوم ملكة وزواج اريام ..
كانت الحفله بسطيه ومختصره ... على الاهل القريبين من حمد.. والقريبين من اهل عبد الرحمن..
وتم كل شي على خير ..
وعند البوابه حقت القصر.. الكل مجتمع حولها..
دانا: اريوم بتروحين وتخلينا ..
لانا: والله ماني متخيله البيت بدونك..
مدى ضمتها وباستها: اريام والله بنشتاق لك.. انتبهي لنفسك والله يوفقك ... وحطي عينك على زوجك.. ..وربي يسعدك..
اريام بكت: والله انا اللي بشتاق لكم ..
ابتهال ضمتها: اريام.. انتي في مقام اختي مدى .. وربي اعزك واحبك اكثر مما تصورين والله بفقدك.. وربي يوفقك..
لطيفه سلمت عليها : حطي بالك على نفسك وزوجك وربي معاك يا بنتي ...
لانا ودانا ضموها..
رهام ومأثر.. وريماس واشواق وجانيت سلموا عليها... والحزن مالي قلوبهم ..
سطام : ودكم تخلصون علينا ...
جاء حمد ومحمد وضاري وودعوا اريام ... وراحت مع عبد الرحمن ..
بالفندق..
بعد ما دخلت غرفتها .. فسخت عبايتها وجلست بفستانها ..
صلى عبد الرحمن ركعتين وبعدها.. جلس جنبها .. ووده يرفع عينه عليها ..
طال الصمت بينهم .. اريام ماتت حيا ... عبد الرحمن حيوي بزياده ..
ولفوا على بعض بنفس الوقت..
عبد الرحمن ابتسم ابتسامه صغيره: الف مبروك علينا..
اريام: الله يبارك فيك ..
عبد الرحمن استغل الفرصه وحط عينه بعينها .. كان جمالها الهادي جذاب .. وثقلها وشخصيتها المتزنه ساحره .. وكان هذا اكثر شي عاجب عبد الرحمن فيها ...

اريام.. ربي يقدرني اني اسعدك وأعوضك واكون زوج يستاهلك .. انتي بعيوني دايم ملاك.. وغلاتك في قلبي كبير .. ربي يجمعنا على خير .. ويرزقنا الذريه الصالحه .. ونكون مع بعض على طاعة الرحمن... وارضيك في الله وترضيني فيه ..
اريام طالعت عبد الرحمن... هو من الرجال الملتزمين ... كلامه هادي ..ويدخل القلب ... حنون في نظرته .. حساس قلبه ... واهم شي انه دايما حاط ربه بين عيونه ... وراح يخاف الله فيها ..وهذا اكثر شي مطمنها ..
ربي يقدرها تعطيه مثل ماهو يعطيها واكثر... وتقدر تتجاوز كل شي صار معاه .. وتبدا معاه حياة جديده...


>>>>>>>>>>>>>>>>>>>>>>>>>>>>>>

البيت صار فاضي عليها ... ابتهال مو موجوده ... وصارت لاهيه بالايام الاخيره باستعدادات الزواج .. والبنات معاها دايم ..
اريام راحت وخلتها... سلطان اخوها مع ابوها دايما ..
عمها وضاري مشغولين ... تقريبا ما عاد باقي لها الا سطام.. اقرب واحد لها ..
دخلت المطبخ ... البيت فاضي.. الخدم من بعد الساعه تسعه يرتاحون في غرفهم لحد وقت العشا ..
فتحت الثلاجه وسكرتها .. اخذت لها كاس ومن الطفش ما تدري وش تحط فيه ..
: عصير !! ولا مويه ؟؟
وبطفش راحت تعبيه مويه ..
شرب منه شوي ..
: والله هالبيت بيجيب لي الجنان.. مره طفش ..
وفجأه حست بدوخه ..
: الحمل مره متعبني ... ما ادري ايش فيني .. بروح بكره اسوي فحص..
حطت الكاس ومشت بتطلع بس حست توازنها اختل وبتطيح خلاص.. وفجأه حست بأيدين مسكتها وسندتها على صدرها ..
ما بعد صحت وماتدري مين ... تسمع صوته بس كأنه بعيد عنها ؟؟
: مدى !... مدى !!... انتي معاي ؟؟
فتحت عينها من جديد... ورفعت راسها بشويش... الصدمه كانت وجه سطام ..
فتحت عيونها بقوه ... وهي مازالت بحضنه.. ما بعد استوعبت السالفه..
: سطام !!
سطام عينه بعينها .. ما قدر يرفعها... قلبه يدق بقووووه .. مدى بحضنه .. ولا حتى قدر يتركها ..
مدى نزلت راسها وحاولت تبعد عنه بهدوء.. بس هو ما رضى يفك ايدينه من حول خصرها .. رفعت عينها من جديد عليه .. وفي عيونه نظره ثانيه !!!!
سطام: مدى ..... أنا ......انا ..............!!!


@@@@@@@@@@@@@@@@@@@@

نهـــــــــــاية الفصل الثالث..
انتظروا الفصل الرابع والاخير ...