ياوسع صدري مير للضيق مرهون
وأن ما توسْع كـله .. يضيق كـله
يـمشي تحت رهن الإشاره على الهون
وترمي عليه من السلوكـ وتتله
وسلوكها ما بـيـن ناشف ومدهون
وصدري ليا قامت تلامس نعله
أحيان أجامل وأتركـ السد مدفون
وأضحكـ ما بـيـن الخطر والمسفهله
وأحيان أجي مشحون .. واروح مشحون
وأقول من يعقد حجاجي يفله
ثـلاث تحكـمني ولا قلت وش لون
المعرفه .. والعاطفه .. والجبلًه
العقله صاحي لكـن القلب مجنون
والكـل منهم نظرته مستقلًه !
يا صاحبي ما للمحبيَن قانون
والحب لـغـز .. ولا عرفنا نحله
قلبكـ مثل قلبي مكبل ومسجون
أحرار مير قلوبها مستحله
عسى الغلا لا زال بالحفظ والصون
والله يـبـيـحـه لاتـتـغـيـر مـحـلـه
أهديتني جمره على راس غليون
وأهديتكـ من العمر شيحه وفلََه
ورغم إختلاف المـد لا زلت ممنون
والشوق ياخذني على كـل مله
فوحت دمي لـيـن صار أشقر اللون
وأخذت من مجراه فنجال دله
ما غير أغني فيكـ لو كـنت مغبون
يا ملً قلبي من غرامكـ يا من له !
دايم ضحايا العشق لإجله يضحون
كـم فاض من كـثر الضحايا سجله
وأنا غديت بـحكم فاتن ومفتون
راضي بـحكم الحب .. والحكم لله
وأن قام يكـبر بيننا شاسع البون
أرفق علي وشاسع البون فله
عز الله أن الشكـ ماهوب مامون
سيف الجفا البتار يمكن يسله
أقنع لو أن الحال من دون في دون
وأخذ الكـلام اللي عليه الأدله
لا تشتكـي لي والعرب وش يقولون
شكوا لغير الله تراها مذله !
العرض الشجري
